वैशाखयता कुन विधाका कुन-कुन किताब छापिए ? (विशेषता र मूल्यसहित)

A+ A A-

अमेरिकी लेखक मार्क ट्वेनका अनुसार पढ्नेहरूका लागि किताब एक मित्र हो । भलै किताब पढ्नुका अनेक उद्देश्य हुन सक्छन् । कसैले आफ्नो शब्दकोश सुधार्न पढ्छन् । कसैले कुनै विषयमा ज्ञान बढाउन पढ्छन् । कसैले मनोरञ्जनका लागि पढ्ने गर्छन् । उद्देश्य जेसुकै हाेस्, किताब पढ्नु वा योसँग दोस्ती गर्नुका फाइदैफाइदा छन् ।

पुस्तक हात पार्न हिजोआज धेरै दुःख पनि छैन । अनलाइन प्लेटफर्ममार्फत आफू बसेकै ठाउँमा झिकाउन सकिन्छ । तर, बजारमा केकस्ता पुस्तक आएका छन्, आफूले पढ्न खोजेको पुस्तक कस्तो हो भन्नेबारे प्रस्ट भएमा अनलाइनमार्फत झिकाउन सजिलो हुन्छ । शिलापत्र हाटबजारकाे आजकाे अंकमा हामी वैशाखयता प्रकाशित विभिन्न विधाका पुस्तकबारे संक्षिप्तमा जानकारी दिँदै छाैँ । यसमा २९५ देखि २५०० रुपैयाँसम्मका पुस्तक समावेश छन् ।

०००

फाइन प्रिन्टबाट यस वर्ष पाँचवटा पुस्तक प्रकाशित छन् । सुरेश प्राञ्जलीको ‘पानीघट्ट’, खिमलाल गौतमको ‘पन्ध्रौँ चुली’ अर्थशास्त्री स्वर्णिम वाग्लेको ‘अतृप्त अवसर’, प्रशान्त खनालको ‘टिमुर’ र ताकाशी मियाहाराको ‘अ रे अफ लाइट इन द हिमालय’ नयाँ पुस्तक हुन् ।

‘पानीघट्ट’ आख्यानकार सुरेश प्राञ्जलीको दोस्रो उपन्यास हो । मध्यपश्चिमको आञ्चलिक भाषा समेटिएको यो उपन्यासको मूल्य ४९८ रुपैयाँ छ । लैङ्गिक विभेदको कठोर सामाजिक यथार्थबाट उपन्यास सुरु हुन्छ । गुरुङ जातिमा प्रचलित रोधी संस्कृति र लाहुरे परम्परासँगै हुर्किएकी एउटी बाहुनी केटी जूनमाया र गुरुङ केटाे रनबहादुरबीचको प्रेमकथा हो पानीघट्ट ।

खिमलाल गौतमले लेखेको ‘पन्ध्रौँ चुली’ किताबमा नेपालको हिमशृङ्ला र हिमालहरूबारे लेखिएको संस्मरणत्मक वर्णन छ । ५८८ रुपैयाँ मूल्य रहेको यो पुस्तक गैरआख्यान हो । तपाईं हिमाल आरोहण गर्ने सोचमा हुनुहुन्छ भने यो पुस्तक उपयोगी हुन सक्छ । लेखक गौतमका अनुसार, पन्ध्रौँ चुली भावना र भूगोलको सम्मिश्रण हो।

‘अतृप्त अवसर’ पनि गैरआख्यान हो । अर्थविद् स्वर्णिम वाग्लेले विभिन्न समयका पत्रपत्रिकामा लेखेका लेखहरू यस किताबमा समावेश गरेका छन् । पुस्तककाे मूल्य ४७५ रुपैयाँ छ । नेपालको अर्थ-सामाजिक विषयमा रुचि राख्नेहरूका लागि पुस्तक उपयोगी हुन सक्छ ।

यस्तै पाकशिक्षासम्बन्धी किताब पनि यसवर्ष बजारमा आएको छ । ‘टिमुर’ नामको यो किताबले पकाउने कलाबारे धेरै कुरा बुझाउन मद्दत गर्छ । यसको मूल्य २५०० रुपैयाँ छ । किताबमा प्रशान्त खनालले आफ्ना अनुभवहरूलाई मिहिन रूपले समेटेका छन् ।

‘अ रे अफ लाइट इन द हिमालय’ ताकाशी मियाहाराको संस्मरणात्मक कृति हो । किताबको मूल्य ९९८ रुपैयाँ छ । सुरुमा जापानी भाषामा आएको पुस्तक अहिले अङ्ग्रेजीमा पढ्न पाइन्छ । जापानमा जन्मेका ताकाशीले लामो समय नेपालको पर्यटन क्षेत्रमा काम गरेका थिए ।

साङ्ग्रिला बुक्सले वैशाखयता ४ वटा किताब ल्याएकाे छ । यीमध्ये ‘रिटायरमेन्ट एट फिप्टी’ संस्मरण एक हाे, जसका लेखक बैंकर भुवन दाहाल हुन् । किताबको मूल्य ५५५ रुपैयाँ छ । लेखकको अनुभवमा आधारित पुस्तकमा बैंकिङ क्षेत्रसम्बन्धी विस्तृत जानकारी समेटिएको छ ।

आञ्चलिकता सिद्धान्तमा आधारित भएर महानन्द ढकालले लेखेकाे उपन्यास बुह्रान पनि बजारमा उपलब्ध छ । उपन्यासको मूल्य ५९५ रुपैयाँ छ । बुह्रान क्षेत्र भनेर चिनिने पश्चिम तराईका बाँके, बर्दिया, कैलाली र कञ्चनपुरका गरिब थारू तथा पहाडी समुदायको अन्तरसम्बन्ध अनि सहकार्यलाई उपन्यासको मुख्य विषयवस्तु बनाइएको छ ।

त्यस्तै, पत्रकार सञ्जय घिमिरेद्वारा लेखिएको ‘पात्रहरू’ नामको संस्मरणात्मक कृति यसै वर्षदेखि बजारमा उपलब्ध छ । यसको मूल्य ४७५ रुपैयाँ छ । जीवनयात्रामा जोडिएका पात्र, घटना र स्मृतिका विशेष क्षणबारे लेखिएकाे याे गैरआख्यान कृति हाे ।

पत्रकार प्रताप विष्टले लेखेकाे ‘छेलिएका अनुहार’ पनि बजारमा पाइन्छ । अल्पसंख्यक चेपाङ, बनकरिया समुदाय र राणाकालमा गाडी बोक्नेहरूको विषयमा तयार पारिएको गैरआख्यान पुस्तकको मूल्य ८५० रुपैयाँ राखिएकाे छ ।

भरतपुर अस्पतालका मेडिकल सुपरिटेन्डेन्ट प्रा.डा. कृष्णप्रसाद पौडेलले लेखेको संस्मरणात्मक कृति ‘लय छुटेको समय’ पनि बजारमा उपलब्ध छ । डा. पौडेलले कोरोना महामारीका बेला लेखेको पुस्तकमा केही डायरी तथा बिरामी र चिकित्सकको सम्बन्ध, समस्यालगायत विषय समेटिएका छन् । किताबको मूल्य ४९५ रुपैयाँ छ ।

फिनिक्स बुक्सबाट वैशाखयता प्रकाशित दुई पुस्तक बजारमा पाइन्छन् । दिपा मेवाहाङ राईको कविताकृति ‘यादको सन्दुक’ बजारमा उपलब्ध छ । जीवनका अनुभूतिहरू, अन्तरमनका द्वन्द्व अनि जिन्दगीमा झेल्नुपरेका बाधा अवरोधलाई राईले बिम्बमा उतारेकी छिन् । यो कृतिकाे मूल्य ३०० रुपैयाँ छ । तपाईंलाई बताइदिहालौँ, यो कृति यसवर्षको मदन पुरस्कार मनोनयनमा परेको छ ।

३५० रुपैयाँ मूल्य रहेको ‘केन्द्र र परिधि’ निबन्धसंग्रह हो । रामबाबु घिमिरेले लेखेका निबन्धहरूको संग्रह रहेको यस किताबलाई फिनिक्स प्रकाशनले बजारमा ल्याएको हो ।

अब बेला प्रकाशनबाट आएका किताबबारे चर्चा गराैँ । हरिशरण परियारको कविता संग्रह ‘कैँची’ बजारमा आइसकेको छ । जात व्यवस्थाविरुद्ध सिर्जनामार्फत प्रतिवाद गर्दै आएका लेखककाे कैँचीमा ४२ वटा कविता संगृहीत छन् । कथित् उपल्लो जातका मानिसले तल्लो जाति बनाइएकामाथि गरेको अन्याय, अत्याचार, दमन र शोषणबारे कैँचीमा सविस्तार लेखिएकाे छ । कविता सङ्ग्रहको मूल्य ३३५ रुपैयाँ छ ।

नेपालय प्रकाशनबाट प्राचीन् हिती प्रणालीमाथि लेखिएको अनुसन्धानात्मक कृति ‘हिति प्रणाली’ प्रकाशित छ । यसको मूल्य १४९५ रुपैयाँ तोकिएको छ । पुस्तक देशका सबै प्रमुख पुस्तक पसलहरूमा उपलब्ध हुनेछ । ई-बुकको प्रतिलिपि thuprai.com बाट पनि किन्न सकिन्छ । यो पुस्तक विश्वव्यापी रूपमा भने Amazon मार्फत उपलब्ध छ ।

बजारमा नवीन प्राचीनकाे कविता 'प्वाँख' पनि उपलब्ध छ । ८७ वटा कविताहरू रहेका याे पुस्तककाे मूल्य २९५ रुपैयाँ छ । यो पुस्तक पनि ई-बुक thuprai.com र अमेजनमा उपलब्ध छ ।

शिखा बुक्सबाट आएकाे ‘कविताको कथा गीतको कथा’ कवि तथा गीतकार दिनेश अधिकारीको कथा सङ्ग्रह हो । यसमा सयौँ चर्चित गीतसँगै लोकप्रिय कविता तथा गीतहरूको रचनागर्भ समेटिएको छ । अर्थात् ११ वटा कविता र १८ गीतहरूको यात्रा कथा छ । शिखा बुक्सद्वारा प्रकाशित यस किताबको मूल्य ३५० रुपैयाँ छ ।

त्यस्तै, ‘गजल देउराली’ किताब सुमन भण्डारीद्वारा लिखित गजल सङग्रह हो । यसमा विभिन्न विषयमा लेखिएका गजलहरू समावेश गरिएको छ । २५० रुपैयाँ मूल्य रहेको यस किताब शिखा बुक्सले बजारमा ल्याएको हो ।

कृष्ण भण्डारीले लेखेकाे ‘संस्कृत व्याकरण’ किताब पनि बजारमा आइसकेको छ । शिखा बुक्सले प्रकाशित गरेको यस किताबले संस्कृत भाषा व्याकरणलाई सजिलो गरी बुझाउने प्रकाशकले जनाएको छ । किताबको मूल्य ५२५ रुपैयाँ छ ।

‘मुक्तक मानुषी’ र ‘खुसीबिनाको मुस्कान’ नामक किताबहरू सुशीला पौडेलद्वारा लिखित मुक्तक संग्रह हुन् । ‘खुसीबिनाको मुस्कान’ नामक मुक्तकमा पौडेलले आफ्ना अनुभव र अनुभूतिलाई गजलका माध्यमबाट सार्वजनिक गरेकी छिन् । पौडेलको यस गजल संग्रहले मनमा खुसी नहुँदा पनि मुस्काउनुपर्ने अवस्थालाई स्पष्ट रूपमा संकेत गरेको छ । यस्तै ‘मुक्तक मानुषी’मा विभिन्न विधाका मुक्तकहरू समावेश छन् । शिखा बुक्सले बजारमा ल्याएको उक्त किताबहरूको मूल्य क्रमशः ३५१ रुपैयाँ र २०१ रुपैयाँ छ ।

‘अनुभूतिको अवतरण’ किताब रञ्जना निरौलाले लेखेकी हुन् । रञ्जनाले जीवनको अनुभव र अनुभूतिलाई निबन्धमार्फत अवतरण गराएकी छन् । यस संग्रहमा समाविष्ट २३ वटा निबन्धमा अनुभव, अनुभूति, भावना र संस्मरणलाई शब्द, शैली र सुन्दर भावपूर्ण अभिव्यक्तिका माध्यमबाट प्रस्तुत गरिएको छ । शिखा बुक्सद्वारा प्रकाशित उक्त निबन्ध संग्रहको मूल्य ३५० रुपैयाँ छ ।

यस्तै डा. ढाकाराम सापकोटाले लेखेका ‘एकतादेखि विभाजनसम्म’ किताब राजनीतिक किताब हो । यो पुस्तकमा नेकपा एमाले र नेकपा माओवादी केन्द्र मिलेर बनेको तत्कालीन नेपाल कम्युनिस्ट पार्टी (नेकपा) भित्रको विवाद र विघटनसम्मका घटना केलाइएको छ । नेपालको वामराजनीतिमाथि विश्लेषण गर्दै आएका ढकालले यस किताबमा नेकपा गठन हुने चरणदेखि आन्तरिक कलहहुँदै फुटसम्मको परिघटना चित्रण गरेका छन् । ६२५ रुपैयाँ मूल्य रहेको उक्त किताब शिखा बुक्सले बजारमा ल्याएको हो ।

‘सफलता सूत्र’ मार्केटिङ विषयमा उच्च शिक्षा हासिल गरी अमेरिकाको युनिभर्सिटीमा अध्यापन गरिरहेका विश्वराज अधिकारीद्वारा लिखित प्रेरणदायी किताब हो । विभिन्न क्षेत्रमा सफल व्यक्तिको अनुभव र असफल व्यक्तिको उदाहरण प्रस्तुत गरिएको उक्त किताबको मूल्य ४२५ रुपैयाँ छ ।

यसैगरी, ‘कसुर’ डा. डीआर उपाध्यायले लेखेको उपन्यास हो । प्रेम विषय समेटिएको यो उपन्यास तराईदेखि काठमाडौंसम्मको परिवेश घुमेको छ ।

‘सफलताको राज’ प्रेरणादायी प्रवचन दिने डिल्ली बस्नेतले लेखेको प्रेरणादायी किताब हो । जीवनमा मानिस सफल हुन आवश्यक जीवनमा सफलता यी दुवै पुस्तक शिखा बुक्सले बजारमा ल्याएको हो । शिखा बुक्सका अनुसार उक्त किताबको मूल्य क्रमशः ४२५ रुपैयाँ र ३७५ रुपैयाँ छ ।

वामदेव शर्माद्वारा लिखित ‘कम्प्रिहेन्सिभ एस्से’ किताब पनि शिखा बुक्सले प्रकाशन गरेको हो । माध्यमिक तहका विद्यार्थीलाई लक्षित गरी तयार पारिएको निबन्धहरूको संगालो हो । खासगरी निजी विद्यालयका विद्यार्थीलाई लक्षित गरी तयार पारिएको भए पनि सामुदायिक विद्यालयका विद्यार्थीहरूका लागि समेत यो किताब उपयोगी हुने शिखा बुक्सले जनाएको छ ।

प्रकाशित मिति: शनिबार, साउन २८, २०७९ ०९:४६