पोखराका करोडपति मेयर : चारवटा घर, २६ करोडको शेयर–लगानी

A+ A A-

शपथ लिएको डेढ महिनापछि पोखरा महानगरपालिकाका मेयर धनराज आचार्यले सम्पत्ति विवरण सार्वजनिक गरेका छन् । उनले बुधबार ४३ करोड ६१ लाख ४५ हजार ६१६ रुपैयाँ आफ्नो सम्पत्ति रहेको विवरण सार्वजनिक गरेका हुन् ।

करोडौँ पर्ने घरजग्गा, गाडीका मालिक आचार्यको २ करोड ८५ लाख रुपैयाँ दायित्व छ । बैंक, फाइनान्स, आफन्त र साथीभाइलाई उक्त रकम तिर्न बाँकी रहेको मेयर आचार्यले सम्पत्ति विवरणमा उल्लेख गरेका छन् । ऋण घटाउँदा उनको खुद सम्पत्ति ४० करोड ७६ लाख ४५ हजार ६१६ हुन्छ । उनको बैंक ब्यालेन्स १५ लाख रुपैयाँ छ ।

उनले सार्वजनिक गरेको सम्पत्ति आफैँले आर्जेका हुन् । ‘बुवाको नाममा भएको सम्पत्ति यो विवरणमा उल्लेख गरेको छैन,’ सम्पत्ति विवरणमा उनले भनेका छन्, ‘म घोषणा गर्दछु, मैले वित्तीय संस्थाबाट लिएको ऋण तिर्न कुनै विलम्ब गरेको छैन ।’

पोखरा, काठमाडौंदेखि दोलखासम्म जग्गा

मेयर आचार्यको पोखरामा तीन र काठमाडौंमा एउटा घर छ । मेयर आचार्यको पोखरा ९ नयाँबजारमा २८९ वर्गफिटमा दुई वटा घर छन् । जसको मूल्य ९ करोड २५ लाख रुपैयाँ पर्ने उनले सम्पत्ति विवरणमा उल्लेख गरेका छन् । यो घर श्रीमती पुष्पाकुमारी पौडेल आचार्यको नाममा छ ।

पोखरा ११ मा दुई कित्तामा तीन करोड ५० लाख रुपैयाँ मूल्य पर्ने घर छ । मेयर आचार्यकै नाममा रहेको साढे ३ करोड रुपैयाँ पर्ने दाबी गरिएको यो जग्गा कति क्षेत्रफलमा छ भन्ने खुलाएका छैनन् ।

श्रीमती पुष्पाकै नाममा काठमाडौंको सीतापाइलामा घरजग्गा छ । जसको मूल्य १ करोड ८५ लाख रुपैयाँ पर्ने मेयर आचार्यको सम्पत्ति विवरणमा उल्लेख छ । त्यो जग्गा ९२५.६० वर्गफिटमा छ ।

दोलखामा ५८ रोपनी ७ आना जग्गा छ । जसको मूल्य ८७ लाख रुपैयाँ पर्ने मेयर आचार्यले उल्लेख गरेका छन् ।

२६ करोड लगानी, करोडका गाडी

मेयर आचार्यले विभिन्न कम्पनीमा २६ करोड रुपैयाँ लगानी गरेका छन् । सम्पत्ति विवरणअनुसार २५ करोड ९९ लाख ४५ हजार ६१६ रुपैयाँ शेयर र लगानी छ ।

मेयर आचार्यसँग ५४ तोला सुन, ३८ तोला चाँदी र पाँच तोला हिरा छ । आचार्यसँग घर जग्गामात्रै होइन गाडी पनि करोड रुपैयाँका छन् । उनीसँग लाखदेखि करोडसम्मका तीन वटा कार छन् ।

उनको टोयटा र्‍याभ फोरको नेपाली बजार मूल्य हाल १ करोड ४५ रुपैयाँ पर्छ । अर्को रेनल्ड क्विडको हालको बजार मूल्य २५ लाख रुपैयाँ छ भने सुजुकी स्विफ्टको हालको बजार मूल्य ३३ लाख रुपैयाँ छ । मारुती सुजुकी कम्पनीकै ओम्नी भ्यानको बजार मूल्य हाल १४ लाख रुपैयाँ हाराहारी छ ।

कार र भ्यानबाहेक मेयर आचार्यसँग तीन वटा स्कुटर छन् । यी कार, भ्यान, स्कुटरको मूल्य २ करोड रुपैयाँ रहेको मेयर आचार्यको सम्पत्ति विवरणमा उल्लेख छ ।

तीन दशकको कमाइ

मेयर आचार्यले परिवारका अरु सदस्यको नाममा सम्पत्ति भए/नभएको उल्लेख गरेका छैनन् । उनले जति सम्पत्ति कमाएका छन् त्यो राजनीतिक सक्रियता घटाएपछि कमाएका हुन् ।

२०५० सालतिर पोखराको बगरमा उनले किराना पसल चलाएका थिए । २०५१ सालमा पृथ्वीनारायण क्याम्पस स्वयिवु सभापति हुँदा क्याम्पस गेटमै ‘हेल्लो स्टेसनरी’ खोले । तीन दशकभित्रै उनले व्यवसायमा लोभलाग्दो छलाङ मारेका छन् ।

धनराजको राजनीतिक यात्रा : पीएन क्याम्पस स्ववियुदेखि पोखराको मेयर उम्मेदवारसम्म

पाठयपुस्तक प्रकाशन गृह, शैक्षिक सामग्री उद्योग, स्कुल–कलेज, रासायनिक मल उद्योग, हाइड्रो पावर, कृषि, पर्यटन, बैंकिङ, हस्पिटालिटीजस्ता दुई दर्जनभन्दा बढी व्यावसायिक प्रतिष्ठानमा उनको लगानी छ ।

एमालेबाट माधवकुमार नेपाल नअलग्गिँदासम्म उनी एमालेमा थिए, तर राजनीतिक सक्रियता निकै कम थियो । उनी पार्टीका विभिन्न व्यावसायिक विभाग र संगठनमा भने क्रियाशील थिए ।

तीन दशकपछि अवस्था ठ्याक्कै फेरिएको छ । उनी एमाले फुटेसँगै व्यवसायमा कम, राजनीतिमा बढी सक्रिय बनेका छन् । एमालेबाट अलग्गिएर माधवकुमार नेपालले नयाँ पार्टी खोलेपछि उनी राजनीतिमा नेतृत्व तहमा सक्रिया बनेका हुन् । आचार्य नेकपा एकीकृत समाजवादीको केन्द्रीय सदस्य र कास्की जिल्ला अध्यक्ष हुन् ।

प्रकाशित मिति: बिहीबार, साउन ५, २०७९ १४:१७