धनराजको राजनीतिक यात्रा : पीएन क्याम्पस स्ववियुदेखि पोखराको मेयर उम्मेदवारसम्म

धनराजको राजनीतिक यात्रा : पीएन क्याम्पस स्ववियुदेखि पोखराको मेयर उम्मेदवारसम्म

A+ A A-

नेकपा (एकीकृत समाजवादी) ले पोखरा महानगरपालिकाको मेयरमा धनराज आचार्यलाई उम्मेदवार बनाउने निर्णय गरेको छ ।

१३ वर्षको हुँदा अनेरास्ववियुको सदस्यता लिएका आचार्य आफ्नै पूर्वपार्टी नेकपा एमालेका सहयात्रीसँग प्रतिस्पर्धाका लागि ३० वैशाखमा हुने चुनावको मैदानमा उत्रिएका छन् । सत्तारुढ गठबन्धनका उम्मेदवार ५३ वर्षीय आचार्य नेकपा (एकीकृत समाजवादी) का केन्द्रीय सदस्यसँगै कास्की जिल्ला अध्यक्ष हुन् ।

एमाले टुक्रिँदा माधव नेपाललाई साथ दिएका आचार्यको कम्युनिस्ट यात्राले चार दशक पूरा गरेको छ । २०२६ साल चैतमा कास्कीको भरतपोखरीमा जन्मिएका आचार्यले २०३९ सालमा विद्यालयमै अनेरास्ववियु प्रारम्भिक कमिटीबाट विद्यार्थी राजनीति सुरु गरेका थिए ।

पोखरालाई गरिबीमुक्त, महानगरका कर्मचारीलाई जवाफदेही र जनतालाई कर तिर्न प्रेरित गर्ने वातावरण बनाउनेलगायत योजना धनराजका छन् । तर, चुनाव जितेर उनले आफ्ना योजना पूरा गर्न पाउँछन्–पाउँदैनन् त्यो जेठ पहिलो हप्तासम्म थाहा हुनेछ ।

विद्यार्थी राजनीति
विद्यार्थी राजनीतिमा लाग्नेहरुका लागि देशकै ठूलो आंगिक क्याम्पस पृथ्वीनारायण क्याम्पस (पीएन) आज पनि एउटा गतिलो खुड्किलो हो । यहाँ राजनीतिमा सक्रिय भएर निरन्तर हुनेहरु राजनीतिमा स्थापित हुन्छन्।

क्याम्पस पढ्न पृथ्वीनारायण क्याम्पस छिरेपछि उनको राजनीतिक हिँडाइको गति बढेको हो । २०४४ सालमा एमाले निकट अनेरास्ववियु प्रारम्भिक कमिटी पृथ्वीनारायण क्याम्पस पोखराबाट उनी अझ सक्रिय भएर कम्युनिस्ट आन्दोलनमा लागेका हुन् । त्यहीँबाट आचार्य राजनीतिमा अझ निखारिए । २०४५ सालमा अनेरास्ववियुको जिल्ला कमिटी सदस्य, २०४६ सालमा सचिव र २०४७ सालमा अध्यक्ष बने ।

धनराज अनेरास्ववियुको जिल्ला अध्यक्ष हुँदा दिलीपविक्रम शाही सचिव थिए । धनराज २०५१ सालमा स्ववियु सभापति हुँदा शाही उपसभापति भए । धनराजको विद्यार्थीकालीन राजनीतिका साथी शाही उनको वाक कलाको प्रशंसा गर्छन् । शाही धनराजबारे सुनाउँछन्, ‘आज हाम्रो पार्टी फरक भयो । विद्यार्थी राजनीतिबाटै दुईबीच चिनजान भएको हो । धनराजजी सैदान्तिकभन्दा पनि प्राविधिक हिसाबले जान सक्नुहुन्छ । उहाँ निकै राम्रो वक्ता हो । भिडलाई आफूसँग तान्न सक्ने क्षमता छ ।’

विद्यालय, क्याम्पस, जिल्ला हुँदै २०४८ सालमा धनराज अनेरास्ववियु गण्डकी अञ्चल अध्यक्ष चुनिए । २०४९ सालमा अनेरास्ववियुको केन्द्रीय कमिटी सदस्य बने । त्यही वर्ष उनी स्वतन्त्र विद्यार्थी युनियन (स्ववियु)को पृथ्वीनारायण क्याम्पस कोषध्यक्ष बने । तीन वर्ष कोषाध्यक्ष बनेका उनी २०५१ सालमा स्ववियु पृथ्वीनारायण क्याम्पस सभापति चुनिएका थिए । स्ववियुको जिम्मेवारी लिइरहँदा २०५० देखि २०५४ सालसम्म संगठनकै पश्चिमाञ्चल प्रमुख, २०५४ देखि २०५८ सालसम्म केन्द्रीय सचिवालय सदस्य भएका थिए ।

मालेदेखि समाजवादीसम्म
धनराज १५ वर्षको उमेरमा तत्कालीन नेकपा मालेमा जोडिएका थिए । २०४२ सालमा उनी नेकपा माले युवा लिगमा संगठित भए । २०४४ सालमा नेकपा माले पार्टी सक्रिय दल र त्यही वर्ष पार्टी सदस्य उम्मेदवार बनेका थिए । २०४४ सालमै नेकपा माले विद्यार्थी इलाका कमिटी (जेल विभाग) को जिम्मेवारी पाएका थिए ।

२०४५ सालमा राष्ट्रिय पञ्चायतका सदस्य प्रत्याहृावनविरुद्ध आन्दोलन गर्दा गिरफ्तारीसँगै घाइते पनि भए । त्यसपछिको दुई वर्ष २०४७ सालसम्म जेलका राजबन्दी र पार्टीबीचको सम्पर्क सुत्रको जिम्मेवारी पाएका थिए । २०४७ सालमा नेकपा माले संगठित सदस्यता पाएका आचार्य २०४६ देखि २०५१ सम्म पार्टी विद्यार्थी इलाका कमिटी सदस्य र सचिव भए ।

२०५२ सालमा उनी नेकपा एमाले कास्की जिल्ला कमिटी सदस्य भए । पार्टी विभाजन भएपछि आचार्य २०५४ सालमा नेकपा माले कास्की जिल्ला कमिटी सचिवालय सदस्य बनेका थिए ।

राजनीतिसँगै उनी व्यावसायिक संगठनमा पनि सक्रिय रहे । २०६० सालमा नेकपा एमाले कास्की उद्योग व्यवसाय विभाग प्रमुखको जिम्मा पाएका थिए । २०६४ देखि २०६९ सम्म नेपाल पुस्तक तथा स्टेसनरी व्यवसायी महासंघको फ्रयाक्सन सचिव बनेका थिए ।

२०६९ देखि २०७४सम्म एमाले सम्बद्ध नेपाल राष्ट्रिय वाणिज्य संघ केन्द्रीय कमिटी अध्यक्ष भए । त्यहीबीच २०७१ देखि २०७६ सम्म नेपाल उद्योग तथा व्यवसायी महासंघ स्थायी कमिटी सदस्य, २०७१ देखि २०७५ सम्म नेकपा एमाले केन्द्रीय उद्योग तथा श्रम व्यवसाय विभाग सदस्य र २०७५ देखि २०७८ सालसम्म नेकपा उद्योग तथा व्यवसाय विभाग सदस्य थिए ।

२०७७ सालको अन्तिममा एमालेभित्रको विवादले देशभर समानान्तर गतिविधि भए । सुरुमा कतै नखुलेका आचार्य पछि माधव नेपालले थालेको समानान्तर गतिविधिमा संलग्न भए । २०७७ चैतमा समानान्तर कमिटीको अध्यक्ष बनेका उनी नेकपा (एकीकृत समाजवादी) स्थापनादेखि एमालेबाट अलग भएका छन् ।

पुस्तक पसलदेखि व्यवसायको साम्राज्यसम्म
राजनीतिसँगै व्यवसायलाई पनि अघि बढेका उनी व्यवसायमा पनि सफल रहे । पुस्तक पसलबाट व्यवसाय सुरु गरेका आचार्य उनी अहिले प्रकाशन गृह नै चलाइरहेका छन् । २०५१ सालमा स्वयिवु सभापति हुँदा ‘हेल्लो स्टेसनरी’ थियो । तीन दशकभित्रै उनले व्यावसायिक छलाङ मारेका छन् ।

पाठयपुस्तक प्रकाशन गृह, शैक्षिक सामग्री उद्योग, स्कुल–कलेज, रासायनिक मल उद्योग, हाइड्रो पावर, कृषि, पर्यटन, बैंकिङ, हस्पिटालिटीजस्ता दुई दर्जनभन्दा बढी व्यावसायिक प्रतिष्ठानमा उनको आबद्धता छ । यी व्यवसायमा उनी कतै अध्यक्ष, कतै सञ्चालक र कतै प्रोमोटर छन् । व्यवसायमा स्थापित हुँदाका वर्ष उनी सक्रिय राजनीतिबाट भने केही टाढा थिए ।

उनले पोखरामा पुस्तक पसल पनि चलाए । नेपाल पुस्तक तथा स्टेसनरी व्यवसायी महासंघको महासचिव हुँदै राष्ट्रिय अध्यक्ष बने । पोखरा उद्योग वाणिज्य संघको कार्यकारिणी सदस्य पनि भए । २०५८ सालमा उच्चस्तरीय पुस्तक नीति मस्यौदा समिति, नेपाल सरकारको विज्ञ सदस्य २०५८, २०६६ सालमा पाठयपुस्तक मूल्य निर्धारण समिति, नेपाल सरकारको विज्ञ सदस्य र २०७५ सालमा पोखरा महानगरपालिकाको शिक्षा विज्ञ बनेका थिए । आचार्यले एमबीए र एमएड गरेका छन् ।

उनी लायन्स क्लबमा पनि सक्रिय थिए । २०१२/१३ मा लायन्स क्लब अन्तर्राष्ट्रिय डिस्ट्रिक्ट ३२५ बी १ को क्याबिनेट सेक्रेटरी, २०१७/२०१८ मा त्यही डिस्ट्रिक्टको गभर्नर भएका थिए ।

उनी पढाऔँ अभियान नेपालका कल्पनाकार हुन् । सयौँ तालिमका स्रोत व्यक्ति उनले ४५ देशको भ्रमण गरेका छन् । आचार्य स्वर्गीय नेता रवीन्द्र अधिकारीका सहपाठी हुन् । धनराज स्व. रवीन्द्र अधिकारी स्मृति प्रतिष्ठानको महासचिव छन् । गत वर्षमात्रै उनी आफू राजनीतिमा उदाएको पृथ्वीनारायण क्याम्पस व्यवस्थापन समिति सदस्य बनेका छन् ।

प्रकाशित मिति: शनिबार, वैशाख १०, २०७९ २०:४१