पोखराको मेयरमा पराजित कृष्ण थापालाई प्रश्न– प्रदेश पनि छोड्नुभो, मेयर पनि हार्नुभो, अब के गर्नुहुन्छ ? (अन्तर्वार्ता)

पोखराको मेयरमा पराजित कृष्ण थापालाई प्रश्न– प्रदेश पनि छोड्नुभो, मेयर पनि हार्नुभो, अब के गर्नुहुन्छ ? (अन्तर्वार्ता)

A+ A A-

गत ३० वैशाखको चुनावमा पोखरा महानगरपालिकाको मेयरमा पराजित भएसँगै दोस्रोपटक पोखरा हाँक्ने नेकपा एमाले नेता कृष्णबहादुर थापाको सपना अधुरै रह्यो ।

२०५४ सालका मेयर थापा गठबन्धनका साझा उम्मेदवार एकीकृत समाजवादीका धनराज आचार्यसँग ६ हजार ४५ मतान्तरले पराजित भए । गण्डकी प्रदेश सभा सदस्यबाट राजीनामा दिएर मेयर उम्मेदवार बनेका थापा व्यक्तिगत काम र भेटघाटमा व्यस्त छन् ।

मेयरमा पराजित हुनुमा एमालेभित्रको आन्तरिक गुट पनि एउटा कारण मानिन्छ । गण्डकीमा एमालेभित्र उपमहासचिव पृथ्वीसुब्बा गुरुङ, एमाले संगठन विभाग प्रमुख खगराज अधिकारीको गुट छ । उम्मेदवार थापा अधिकारी समूहका हुन् ।

गुटको राजनीति झाँगिएर कास्कीमा एमालेलाई नै असर गर्ने विश्लेषण पनि भइरहेका छन् । एमाले केन्द्रीय सदस्यसमेत रहेका थापा पोखरा महानगरको चुनावले एमालेभित्रको राजनीति गुटतर्फ उन्मुख भएको स्वीकार्छन् ।

प्रस्तुत छ, स्थानीय चुनाव, कास्कीमा एमालेको भविष्य र गुटीय राजनीतिबारे मेयरका उम्मेदवार कृष्ण थापासँग शिलापत्रकर्मी अनुप पौडेलले गरेको कुराकानीः

चुनावको नतिजा आएको दुई महिना हुँदैछ । त्यसपछिका दिन कसरी बिताइराख्नुभएको छ ?

पार्टी केन्द्रीय सदस्य छु । पार्टीकै गतिविधि र धेरै समयदेखि थाँती व्यक्तिगत कामहरूमा समय व्यवस्थापन गरेको छु ।

उपमेयर उम्मेदवारले जित्दा तपाईं पराजित हुनुभयो । पार्टीले के समीक्षा गर्‍यो ?

पहिलो कुरा, म चुनाव हार्नु व्यक्तिलाई भन्दा पनि एमालेलाई नै ठूलो धक्का हो । २०७४ सालको चुनावमा म पार्टीको जिल्ला अध्यक्ष भएर चुनाव हाँकेको हो । कास्की जिल्लालाई त्यतिबेला लालकिल्ला बनाएका थियौँ ।

२०७४ सालको स्थानीय चुनावमा पनि एक्लै लडेको हो । त्यतिबेला पनि पोखरामा कांग्रेस र माओवादीको गठबन्धन थियो । अहिले ठूलो धक्का, नोक्सान पार्टीले व्यहोरेको छ । चुनावपछि महानगर र जिल्ला कमिटीको बैठक भयो । महानगर र जिल्ला कमिटीका ९० प्रतिशत सदस्यहरू अन्तर्घातकै कारण पोखरा महानगरको चुनाव हारेको हो भन्ने निचोडमा पुग्नुभएको छ । त्यसको रिपोर्ट महानगर र जिल्ला कमिटीले कसरी पेस गर्छ आफ्नो ठाउँमा छ ।

अर्को कुरा सबैलाई थाहा छ । सार्वजनिक रूपमा अडियो आएको छ । २०७९ सालको पोखरा महानगरको चुनाव ‘हटकेक’ रह्यो । तथ्यांक हेर्ने हो भने १३ हजार ८७४ मत मेयरमा क्रस छ । मेयरमै १६ सय भोट खाली पनि छ । यो तथ्यले पनि अन्तर्घात स्पष्ट देखाउँछ ।

पोखरामा कृष्ण थापालाई हराउन एमालेकै पंक्ति धनराजको पक्षमा (अडियो वार्तासहित)

अरु कारण पनि छन्, समयमा उम्मेदवारी घोषणा नहुनु । पहिला भएका उम्मेदवारको घोषणा रद्द हुनु, पार्टीभित्रको संगठनात्मक अराजकता मौलाइरहेको अवस्था, पार्टीका जिम्मेवार मान्छेले जवाफदेही ढंगले काम नगर्दिनु पनि कारण हुन् ।

त्यति हुँदाहुँदै पनि जनताले पत्याएको, जनताले विश्वास गरेको, मत दिएको तर आफैँभित्रबाट मत संरक्षण र इमानदारीपूर्वक काम नहुँदा अन्तर्घात भयो । पार्टीको बैठकले पनि यिनै कुरालाई इंगित गरेको छ ।

पार्टी अध्यक्षले चुनावी नतिजापछि के भन्नुभयो ?

पार्टी अध्यक्षले धेरै ठाउँबाट रिपोर्ट बुझ्नुभएको छ । मेरो एकपटक भेट भयो । पोखराको अवस्था सोध्नुभएको थियो । सबै कुरा बताएँ । पोखराको अन्तर्घातबारे फोरमहरूमा उहाँले पटकपटक कुरा गरिराख्नुभएको छ ।

पोखराको चुनावी सभामा पनि उहाँले फोटोलाई भोट हाल्ने होइन, चुनाव चिह्नलाई हो भनेर भन्नुभएको थियो । तर, अध्यक्षको मर्म, भावना र अपिललाई जसरी गम्भीरतापूर्वक पार्टीको जिल्ला नेतृत्वले लिनुपथ्र्यो त्यसरी नलिँदा नै यस्तो परिणाम झेल्यौँ ।

प्रदेश सांसद पनि जनताले बनाएका थिए । उता छोडेकोमा ग्लानी छैन ?

व्यक्तिगत रुपमा मेरो कुनै निर्णय हुँदैन । पार्टीले हिजो प्रदेश सांसदमा लडायो, म लडेँ । अहिले यता आउनुपर्‍यो । अप्ठेरो अवस्थामा उम्मेदवार बनेर आएको हो । उम्मेदवार बनिरहनुपर्ने परिस्थितिमा थिइनँ । किनभने पार्टीले एउटा निर्णय गरेको थियो । पार्टीलाई परेको अप्ठेरो अवस्थामा गरेको निर्णय मैले स्वीकारेको हुँ ।

४० वर्षको राजनीतिक जीवनमा पार्टीले जे भनेको छ, जे आदेश गरेको छ त्यो मानेको छु । म स्वास्थ्यको विद्यार्थीलाई जागिर छोडेर पार्टीमा लाग्न भन्यो म लागेँ । पृथ्वीनारायण क्याम्पसमा भर्ना भएर विद्यार्थी संगठनको काम अघि बढाउनपर्‍यो भन्यो, त्यो पनि गरेँ । पुरै समय पार्टीलाई दिएँ । जनपक्षीय चुनाव हाँकियो, राजकाज मुद्दा लागेर जेल परियो । हरहमेसा पार्टीको निर्णय मानेको अवस्था छ ।

एक जना नेताको टिकट खोसेर तपाईंलाई दिइयो । यसले आन्तरिक गुट अझ झाँगिने विश्लेषण भइरहेका छन् । कास्कीमा एमाले कमजोर बन्नेसम्मको अवस्था आउने पो हो कि ?

औपचारिक ढंगले पार्टीको निर्णय भइसकेको थिएन । जब पार्टीले सही गरेर तपाईं चुनाव लड्नु भनेर दिन्छ त्यो बल्ल औपचारिक निर्णय हो । त्यो काम बाँकी नै थियो । त्यहीबेला एउटा फुटेज बाहिर आयो । पछि थप निर्णय भयो ।

पार्टीको निर्णय मन नपर्न पनि सक्छ । गौरवशाली, अनुशासित पार्टी, फलामे अनुशासन भएको कम्युनिष्ट पार्टी भन्ने मान्यतामा छौँ । तर, त्यही पार्टीका मान्छे आफ्नै उम्मेदवारलाई भोट नहाल्ने तर अनुशासन नभएको, अराजक र बुर्जुवाहरूको पार्टी भनेको कांग्रेसका मान्छेले अर्को पार्टीको मान्छेलाई भोट हालेर निर्णायक भूमिका खेले । यो नयाँ दृश्य देखियो । त्यसो भएकाले पार्टीले गरेको निर्णय मान्नु हरेक पार्टी सदस्यको अनुशासन हो ।

चुनावको दृश्यले पार्टीभित्रको गुट झाँगिनेतर्फ उन्मुख गरेको छ । पार्टीलाई ठूलो चुनौतीको रुपमा छ । हिजो प्रदेशमा कम्युनिष्ट पार्टीको सरकार बनिरहँदा कास्कीबाट ११ जना सांसद पठाएका थियौँ । संघमा ३ जना पठायौँ । ६० सदस्यीय प्रदेशसभामा २७ जना एमालेका हुँदा कास्कीका ११ जना थियौँ । स्वाभाविक हो, नतिजा र पछिल्ला घटनाले हामीलाई ठूलो चुनौती थपेको छ ।

तपाईंलाई हराएर धनराज आचार्य मेयर हुनुहुन्छ । उहाँलाई पोखरा हाँक्न कत्तिको सजिलो देख्नुहुन्छ ?

मेयरको बारेमा तीन महिना केही पनि नबोल्ने पक्षमा छु । हनिमुन पिरियडसम्म केही बोल्दिनँ । साउन ११ गते दुई महिना पुग्छ । भदौ ११ मा तीन महिना पुगेपछि उहाँले गरेका कामबारे बोल्छु, आफ्नो धारणा सार्वजनिक गर्छु ।

तपाईंले ५३ हजार हारहारी मत पाउनुभएको थियो । ती मतको सम्मान गर्नुहुन्छ कि हारेँ भनेर छोड्नुहुन्छ ?

एमाले महानगरको सबैभन्दा ठूलो पार्टी हो । नगरसभामा हाम्रो बहुमत छ । उपमेयर पनि हाम्रै छ । उपमेयरको नेतृत्वमा हामीले भनेका काम अघि बढ्छन् ।

५२ हजार ८ सय जनताले दिएको मतको कदर गर्दै पाँच वर्ष जवाफदेही भएर जनताकै सेवामा रहने छु । मैले महानगरको काम नजिकबाट हेरिरहेको छु । तीन महिनापछि यो कुरा ठीक भए, यो भएनन् भन्ने फेहरिस्त सार्वजनिक गर्छु । म जनताका मुद्दा महानगरसम्म पुर्‍याउन निरन्तर सक्रिय हुने छु ।

यो मेरो अन्तिम चुनाव हो, अब लड्दिनँ भन्नुभएको थियो । त्यसमा अडिग हुनुहुन्छ ?

मेरो व्यक्तिगत इच्छा छैन । पटकपटक एउटै व्यक्ति किन चुनाव लड्ने ? मैले पटकपटक मौका पाएँ । मैले चुनाव अब लड्दिनँ भनेकै हो, त्यसमा अडिग छु ।

एउटा कुरा के याद गर्नुस् भने म पार्टीको अधिनस्थ हुँ । पार्टीले गर्ने निर्णय म पार्टीमा रहँदासम्म मेरा लागि स्वीकार्य हुन्छ । मेरो व्यक्तिगत विचार अब चुनाव नलड्ने नै हो ।

प्रकाशित मिति: बुधबार, साउन ४, २०७९ १५:२८

अनुप पौडेल

प्रतिक्रिया दिनुहोस्

भर्खरै

सूचना प्रविधि क्षेत्रमा लगानी बढाउन सरकार दृढतापूर्वक लागेको छ: मन्त्री शर्मा

नेतृत्वले जोखिम मोल्नुपर्ने अवस्था आएको छः अर्थमन्त्री पुन

धादिङमा घरमा आगलागी हुँदा वृद्ध दम्पतीको मृत्यु

सुदूरपश्चिमका मुख्यमन्त्री सोडारीले शुक्रबार विश्वासको मत लिने

तीनवटा संसदीय समितिको बैठक बस्दै

लोकप्रिय

सहकारी ठगीले इलाम २ मा तनाव दिएपछि रवि लामिछानेको नयाँ स्टन्ट, धन्यवाद दिन गृह मन्त्रालय पुग्ने को हुन् ?

इलाम २ः प्रारम्भिक मतपरिणाममा एमाले र 'पूर्वएमाले'बीच टक्कर

श्रीमती रञ्जितासँगकाे सहमति भंग भएपछि रेशम विक्षिप्त, २० मिनेटमा सात स्टाटस

इलाम २ अपडेटः यस्तो छ प्रारम्भिक मतपरिणाम

भीम रावललाई प्रश्न– एमाले छाेड्‌ने निर्णयमा पुग्नुभएको हो ?

विचार

पसिना बगाउनेहरूलाई हेलाहोचो गरेर कसरी आऊला समृद्धि ?

लगानी सम्मेलन : यसअघि गरिएका लगानी प्रतिबद्धता कार्यान्वयन भए कि भएनन्, खाेजी हुनुपर्छ

चीनमा एउटै भूकम्पले लिएको थियो ८ लाख ३० हजारको ज्यान (भिडियो)

ब्लग

कसरी हटाउने सार्वजनिक सवारीको बेथिति ?

सधैँ हाँसीखुसी देखिने गाउँकी काकी, डाक्टर र अर्जुन मैनालीले राेजेकाे गलत बाटाे

छोटो तर मनमोहक पदयात्रा 'लाङटाङ'

शिक्षा

सरकारी स्कुलप्रतिको नकारात्मक धारणा बदलेर यसरी उत्कृष्ट बन्यो ज्ञानोदय मावि

आफ्नै छोराछोरी पढाउन राजा वीरेन्द्रले भित्र्याएका थिए ए–लेभल, कस्ता विद्यार्थीले पढ्ने ?

जनकपुरकाे याज्ञवल्क्य स्कुलमा विद्यार्थीकाे आकर्षण, प्रवेश परीक्षा दिने आधाले मात्रै पाए भर्ना