पोखरामा कृष्ण थापालाई हराउन एमालेकै पंक्ति धनराजको पक्षमा (अडियो वार्तासहित)

पोखरामा कृष्ण थापालाई हराउन एमालेकै पंक्ति धनराजको पक्षमा (अडियो वार्तासहित)

एमालेका कृष्ण थापा ।

A+ A A-

पोखरा महानगरपालिकाको निर्वाचनमा नेकपा एमालेभित्रकै समूह एमालेबाट मेयर उम्मेदवार कृष्णबहादुर थापालाई हराउन लागेको पाइएको छ ।

गण्डकी प्रदेशमा एमालेभित्र उपमहासचिव पृथ्वीसुब्बा गुरुङ र संगठन विभाग प्रमुख खगराज अधिकारीको समूह छ । एमालेबाट पोखराको मेयर उम्मेदवार थापा खगराज समूहका हुन् । उनलाई मेयरमा हराउन गठबन्धनका धनराज आचार्यलाई पृथ्वीसुब्बा समूहका नेता-कार्यकर्ता लागेका हुन् ।

पृथ्वीसुब्बा समूहका कार्यकर्ताले धनराजलाई भोट मागेको दुईवटा अडियो सार्वजनिक भएको छ । त्यसमा एउटा अडियो एमाले केन्द्रीय सदस्य राजीव पहारीको सचिवालयको हो । पहारी पृथ्वीसुब्बा समूहका हुन् । राजीवका स्वकीय सचिव मनोज पहारीले कृष्ण थापालाई मत नदिन भन्दै फोनमा धनराज आचार्यलाई मत मागेको अडियो सार्वजनिक भएको छ । कृष्ण थापाले टिकट पाएलगत्तै मनोज उनको विपक्षमा खुलेर लागेका थिए ।

थापालाई हराउन एमालेकै समूह लाग्नुको कारण हो नेता दीपक पौडेलको टिकट खोसिनु । पोखराको मेयरको टिकट सुरुमा नेता पौडेलले पाएका थिए । पछि उनको सुन चोरेको आरोप लागेपछि टिकट खोसेर कृष्ण थापालाई दिइएको थियो । दीपक पृथ्वीसुब्बा समूहका हुन् । आफ्नै समूहको टिकट खोसेर खगराज समूहलाई दिएपछि पृथ्वीसुब्बानिकट नेता-कार्यकर्ता कृष्ण थापालाई हराउन लागेका हुन् ।

सार्वजनिक भएको अडियोमा कृष्ण थापालाई हराउन पृथ्वीसुब्बा गुरुङ, केन्द्रीय सचिव पद्मा अर्याल, केन्द्रीय सदस्य राजीव पहारी, केन्द्रीय सदस्य एवं इन्चार्ज भीम कार्की, कास्की जिल्ला अध्यक्ष मनबहादुर गुरुङ, एमाले प्रदेश कार्यालय सचिव माधव बाँस्तोला लागेको दाबी गरिएको छ । माथि नाम उल्लेखित व्यक्ति सबै खगराजइतर हुन् ।

भर्खर २२-२३ वर्ष पुगेका पहारीले अपत्यारिलो दाबी गरेका छन् । ईश्वर पोखरललाई आफूले टिकट खोसिएका नेता पौडेललाई भेटाउन लगेका बताएका छन् । १३ मिनेट ५४ सेकेण्डको फोन वार्तामा मनोजले अर्का व्यक्तिलाई भनेका छन्, 'वडा जसै एमालेलाई जिताउनुपर्छ । मेयरमा त दाइले बुझनुभा'छ ।'

मेयर उम्मेदवार धनराज आफ्नो अकंल भएकाले आफूले सिधा पैसा नमाग्ने अर्का व्यक्तिले फोनमा बताएका छन् । एउटा क्लबको नाम नै लिएर ती व्यक्तिले सहयोग गर्ने तर धनराजबाट आर्थिक सहयोग मागिदिन पहारीलाई भनेका छन् । उनले धनराज आफ्नो व्यावसायिक पाटर्नर भएको र पैसाको कुरा गर्न समस्या नभएको दाबी गरेका छन् ।

पहारीले प्रश्न गरेका छन्- वडा नम्बर ३३ बाट एमालेको कति भोट काट्न सकिन्छ ?

दोस्रो व्यक्ति- हामीले डेढ दुई सय भोट दिन सकिन्छ । ७० जना क्लबको सदस्य हाम्रै भोट छ । डेढ-दुई सय भोट यताउती गर्न सकिन्छ ।

पहारी : म पैसाको कुरा राख्छु ।

दोस्रो व्यक्ति : मेरो नाम लिएर पैसाको कुरा नगर्नू । पियोर एमालेले २ सय भोट दिन सक्छन् भन्ने सुनाइदिनुहोला ।

पहारी : एमालेले कारबाही गर्छ भन्ने डर छैन । पीएस, पद्मा, जिल्ला अध्यक्ष, इन्चार्जले गर्नुहुन्न । गुटिया टोलीले के भन्छ, फरक पर्दैन । २१, २४ बाट मैले काट्छु । १९ बाट भोट कत्ति पनि आउँदैन दीपक सरलाई नदिएपछि । ईश्वर पोखरेललाई मैले पुरन्चौर लिएर गएँ । एक भोट कलमलाई भनेर साथीभाइ, आफन्तलाई भनेर म बेस्सरी लागेको छु । कसैले रोकेर पनि म रोकिनेवाला छैन । हामीले हराएकोजस्तो थाहा हुँदैन । उम्मेदवार बलियो नभएर हो भन्ने हुन्छ । दलित समुदायले हराएको भन्ने हुन्छ । व्यावसायिक मान्छे, हाम्रै भूगोलको मान्छे मेयरमा आउँदा राम्रो हुन्छ । मेरो पछाडि मान्छे छन् । कुरा मिल्यो भने अझ प्रभावकारी हुन्छ भनेर कुरा गर्छु । धनराजले आर्थिक सहयोग नगरे पनि कृष्ण थापालाई जुनसुकै हिसाबमा हराउनुपर्छ । त्यो गाइनेलाई । कृष्ण थापा गएपछि राजीव पहारीको पालो हो । उहाँलाई अप्ठेरो पर्दैन । कृष्ण थापाले चुनाव जित्यो भने आफैँले जितेको हुँ भन्छ । हारे भने दोष लगाउने पृथ्वीसुब्बा, राजीव पहारी, मनबहादुर गुरुङ, माधव बाँस्तोला, भीम कार्कीलाई हो । कृष्ण थापाले चुनाव कुनै हालतमा जित्दैन ।

शिलापत्रलाई प्राप्त अर्को अडियोमा पनि थापालाई हराउन पृथ्वीसुब्बा नै लागेको दाबी गरिएको छ । त्यो अडियोमा पृथ्वीसुब्बानिकट कार्यकर्ताले भनेका छन्, 'एमालेको एउटा ठूलो पंक्ति कृष्ण थापालाई हराउन हिँडेको छ । त्यही विषयमा राजीव र पृथ्वीसुब्बाको टोली काठमाडौं गएर आएको छ । धनराजलाई हराउँदा फाइदा हुन्छ कि जिताउँदा फाइदा हुन्छ, त्यो विषयमा मिटिङ भइरा'छ ।'

अडियो सुन्दा कृष्णको विपक्षमा मत मागेका व्यक्ति युवासंघनिकट बुझिन्छ । उनको पहिचान खुलेको छैन । यो अडियो १८ मिनेटको छ । पोखरामा गुटको लडाइँले एमालेलाई ठूलो धक्का लाग्ने देखिएको छ । प्रारम्भिक नतिजामा पनि मेयर र उपमेयरमा फरकफरक नतिजा आएको छ । मेयरमा कृष्ण थापा पछाडि पर्दा उपमेयरमा एमालेकै मञ्जुदेवी गुरुङले अग्रता लिएकी छन् । एमालेको कृष्ण विपक्षको समूहले धनराजलाई जिताउन मेयरमा एक भोट कलममा अभियान भित्रभित्रै चलाएको चर्चा पोखरामा छ ।

प्रकाशित मिति: सोमबार, जेठ २, २०७९ १२:१७