कस्तुरीको बिनासहित पक्राउ परेका लिम्बूलाई आफ्नै पार्टनरले फसाएको खुलासा

A+ A A-

प्रहरीले कस्तुरीको बिनासहित चाबहिलबाट २३ असारमा पक्राउ गरेका पाँचथर तुमविया गाउँपालिका– ५ का ४२ वर्षीय शिव लिम्बूलाई पाँचथरकै आदम भन्ने सुभास राईले फसाएको खुलेको छ ।

जग्गासम्बन्धी काम गर्ने लिम्बू र राईबीच सोही विषयमा विवाद भएको र राईले गुल्मी– ३, मदानेका नारायण कार्की भन्ने कृष्ण श्रेष्ठलाई प्रयोग गरेर लिम्बूको चाबहिलको एक खाजा घरअगाडि पार्किङमा राखेको बा८२प ५७९ नम्बरको मोटरसाइकलमा कस्तुरीको बिनाजस्तो देखिने वस्तु राखेको खुलेको हो ।

लिम्बूको मोटरसाइकलमा अर्कैले बिना राखेर प्रहरीले नै लिम्बूलाई फसाउन खोजेको आरोप लिम्बूको परिवारले लगाएका थिए । सीसीटीभी फुटेजमा समेत लिम्बूको मोटरसाइकलमा अर्कैले रातो झोलामा शंकास्पद वस्तु राखेको देखिएको थियो ।

सोही विषयमा प्रहरीमाथि नै आलोचना हुन थालेपछि उपत्यका प्रहरी कार्यालय रानीपोखरीले एसपी दिलीप घिमिरेको नेतृत्वमा तीन सदस्यीय छानबिन समिति नै बनाएको थियो । सोही समितिको अनुसन्धानले राईले व्यक्तिगत रिसइबी साँध्न श्रेष्ठलाई प्रयोग गरेर लिम्बूलाई फसाएका हुन् ।

उनीहरूले जग्गासम्बन्धी विवाद हुँदा लिम्बूले राईलाई कुटपिटसमेत गरेका थिए । प्रहरीको अनुसन्धानले लिम्बू निर्दोष देखिएको र राई र श्रेष्ठले फसाएको खुलाएको हो । श्रेष्ठलाई मोटरसाइकलमा बिना राख्न लगाएर राईले नै प्रहरीलाई फोन गरेर पक्राउ गर्न लगाएका थिए । प्रहरीको भने कुनै भूमिका देखिएको छैन ।

सो अभियोगमा श्रेष्ठलाई प्रहरीले पक्राउ गरेर अनुुसन्धान थालेको छ । राई भने हाल फरार छन् । उनको खोजतलास तीव्र पारिएको प्रहरीले जनाएको छ ।

यसरी पक्राउ परेका थिए लिम्बू

२३ असार दिउँसो १ बजेर ३५ मिनेटमा लिम्बू चाबहिलको एक खाजाघरमा पुगेका थिए । लिम्बूले चढ्दै आएको आफ्नो बा८२प ५७९ नम्बरको मोटरसाइकल खाजा घरअगाडि नै पार्किङ गरेका थिए ।

साँझ ६ बजेर ४० मिनेट जाँदा उनको मोटरसाइकलमा श्रेष्ठले रातो झोलामा ल्याएको वस्तु उनको मोटरसाइकलमा राखेका थिए । त्यसपछि उनी लिम्बू बसेको खाजाघरको ठीकविपरीत रहेको सोलु एण्ड संखुवासभा मःमः सेन्टरभित्र पसे ।

त्योलगत्तै सादा पोशाकमा आएका प्रहरीले लिम्बूको मोटरसाइकलभित्र राखेको फोटो खिचेर उनलाई पक्राउ गरेको थियो । त्यो सबै क्रियाकलाप सीसीटीभी फुटेजमा देखिएपछि प्रहरीले छानबिन समिति बनाएर अनुसन्धान गरेको थियो ।

याे पनि पढ्नुहाेस्:

निर्दोष व्यक्तिलाई पनि फसाउँछ प्रहरी ? चाबहिलबाट कस्तुरीको बिनासहित पक्राउ परेको घटना के हो ?

प्रकाशित मिति: सोमबार, साउन २, २०७९ १२:३८