निर्दोष व्यक्तिलाई पनि फसाउँछ प्रहरी ? चाबहिलबाट कस्तुरीको बिनासहित पक्राउ परेको घटना के हो ?

निर्दोष व्यक्तिलाई पनि फसाउँछ प्रहरी ? चाबहिलबाट कस्तुरीको बिनासहित पक्राउ परेको घटना के हो ?

A+ A A-

प्रहरीले कस्तुरीकाे बिनासहित काठमाडाैंमा एक जनालाई नियन्त्रणमा लिएकाे घटनामा अहिले प्रहरीकै भूमिकामाथि प्रश्न उठिरहेकाे छ । याे प्रकणमा प्रहरीको भूमिका विवादास्पद बनेको छ ।

प्रहरीले २३ असारमा काठमाडौं महानगरपालिका– ७, चाबहिलस्थित एक खाजा घरअगाडि पार्किङमा राखेको बा८२प ५७९ नम्बरको मोटरसाइकलबाट कस्तुरीको बिना बरामद गर्‍यो । सो मोटरसाइकल पाँचथर तुमविया गाउँपालिका– ५ घर भई हाल काठमाडौं कपन बस्ने ४२ वर्षीय शिव लिम्बूको थियो ।

लिम्बू सोही खाजाघरबाट पक्राउ परे । प्रहरीले सो घटनाबारे आफ्नो दैनिक बुलेटिनबाट नै सार्वजनिक गरेको थियो ।

बुलेटिनमा सार्वजनिक समाचारअनुसार कस्तुरीको बिना लुकाई राखेको भन्ने सूचनाका आधारमा प्रहरी वृत्त गौशालाबाट खटिएको सादा पोशाकको प्रहरीले उनलाई पक्राउ गरेको थियो ।

तर, घटनाबारे सीसीटीभी फुटेज सार्वजनिक भएपछि भने प्रहरीको सादा पोशाकको टोलीको भूमिकासमेत शंकास्पद देखिएको छ । लिम्बूको परिवारले प्रहरीकै मिलेमतोमा शिव लिम्बूलाई फसाइएको भन्दै सार्वजनिक अभिव्यक्ति दिँदै आएका छन् ।

के देखिन्छ सीसीटीभी फुटेजमा ?

सीसीटीभी फुटेजमा २३ असार दिउँसो १ बजेर ३५ मिटनेमा बिनासहित पक्राउ परेका भनिएका लिम्बू चाबहिलको एक खाजाघरमा पुगेको देखिन्छ । लिम्बूले चढ्दै आएको आफ्नो बा८२ प ५७९ नम्बरको मोटरसाइकल खाजा घरअगाडि नै पार्किङ गरेको देखिन्छ ।

उनी भने खाजाघरभित्र छिरेको सीसीटीभीमा देखिन्छ । उनी ६ बजेसम्म त्यहीँभित्र हुन्छन् । साँढे २ बजेसम्म उनको बाइकमा केही हुँदैन ।

साँझ ६ बजेर ४० मिनेट जाँदा उनको मोटरसाइकलमा एक जना नीलो ज्याकेट र कालो क्याप लगाएको युवाले आफ्नो खल्तीबाट रातो झोलामा ल्याएको वस्तु उनको मोटरसाइकलमा राखेको देखिन्छ । ती युवाले उक्त झोला राखेपछि लिम्बू बसेको खाजाघरको ठीक विपरीत रहेको सोलु एण्ड संखुवासभा मःम: सेन्टरभित्र पस्छन् ।

त्यसको केही समयपछि लिम्बू खाजाघरबाट निस्केर आफ्नो मोटरसाइकमा पुग्छन् र रातो झोला राखेकै ठाउँमा हेर्छन् र फेरि उनी खाजाघरभित्रै पस्छन् ।

त्यसपछि भने उनी बसेको खाजाघरमा तीन जना प्रवेश गर्छन् । पहेँलो ज्याकेट लगाएका एक जना, अर्को रातो क्याप लगाउने र सेतो धर्सा भएको ज्याकेट लगाउने तीन युवाहरू लिम्बू बसेको खाजाघरभित्र छिरेको सीसीटीभी फुटेजमा देखिन्छ ।

उनीहरू गौशाला वृत्तबाट खटिएको सादा पोशाकका प्रहरी भएको पुष्टि भएको छ । उनीहरूमध्ये फेरि पहेँलो ज्याकेट लगाउने प्रहरीले लिम्बूको मोटरसाइकलमा वस्तु राख्ने व्यक्तिलाई लिम्बू भएतिर बोलाउँछन् । तर, एकैछिनमा बाहिरिन्छन् । त्यसलगत्तै नीलो ज्याकेट लगाउने सादा पोशाकका प्रहरीले मोटरसाइकलको फोटो खिच्छन् ।

त्यसलगत्तै उनीहरूले बर्दीमा भएको प्रहरीलाई बोलाएर मुचुल्का उठाउँछन् र लिम्बूको मोटरसाइकलमा कस्तुरीको बिना भएको पुष्टि हुन्छ । त्यसपछि शिवलाई खाजाघरबाट पक्राउ गरेर गौशाला प्रहरी वृत्तमा ल्याउँछन् ।

सो सीसीटीभी फुटेजमा शंकास्पद भूमिकामा गौशाला प्रहरीकै सादा पोशाकका प्रहरी देखिएपछि घटना विवादित बनेको छ । सीसीटीभी फुटेज सार्वजनिक भएपछि प्रहरीले आन्तरिक अनुसन्धान गर्न छानबिन समितिसमेत बनाएको छ ।

प्रहरीका केन्द्रीय प्रवक्ता डीआईजी टेकप्रसाद राईले घटना शंकास्पद नै देखिएकाले आन्तरिक समिति बनाइएको जानकारी दिए । उनले भने, ‘घटना शंकास्प नै छ । त्यसैले समिति बनाएका हौँ । प्रहरीको कमजोरीले निर्दोष व्यक्ति फस्नु हुँदैन । प्रहरीलाई सूचना दिनेमाथि पनि अनुसन्धान हुन्छ ।’

छानबिन समितिमा प्रहरी उपरीक्षक (एसपी) दिलीप घिमिरे, एक जना डीएसपी र प्रहरी निरीक्षकसहित तीन जनाको समितिले अनुसन्धान थालिसकेको प्रवक्ता डीआईजी राईले बताए ।

प्रहरीले यसरी बरामद गरेका घटना विवादमा यसअघि पनि आएका छन् । कतिपय घटनाहरूमा प्रहरी नै निर्दाेषलाई फसाउन लागेकाे पुष्टि पनि भएकाे छ । यसको एक उदाहरण गत वर्ष ३२ साउनमा फक्राउ परेका रौतहटका पत्रकार महमद मोजिबुल्ला हुन् । उनी सवार बीआर ३० एस १८८५ नम्बरको भारतीय मोटरसाइकलसहित महमद पक्राउ परेका थिए ।

उनी सवार मोटरसाइकल जाँच गरेको प्रहरीले लागुऔषध नाइट्राभेट फेला पारेपछि उनलाई पक्राउ गरेको थियो । तर, पक्राउ परेका महमद आफैँलाई आफ्नो मोटरसाइकलमा कसरी लागुऔषध नाइट्राभेट राखियो, अचम्मित परे ।

तर, कानुनले अज्ञानतालाई माफी दिन सकिँदैन भनेझैँ उनलाई प्रहरीले अनुसन्धानका लागि थुनामा राख्यो । महमदले लागुऔषध नाइट्राभेट आफ्नो नभएको इन्कारी बयान दिइरहे । तर, प्रहरी छोड्ने मनिस्थितिमा थिएन ।

पछि रौतहटको एक होटलमा भेट्न प्रहरीले नै बोलाएर बाहिर पार्किङमा राखिएको उनको मोटरसाइकलमा प्रहरीले नै लागुऔषध राखिदिएको सीसीटीभी फुटेज बाहिरिएपछि उनी थुनामुक्त भए ।

उनको मोटरसाइकलमा सादा पोशाकमा खटिएका प्रहरी सहायक निरीक्षक उदयप्रसाद यादव र प्रहरी जवान मनोज साहले लागुऔषध राखेका थिए ।

सीसीटीभी फुटेजका आधारमा प्रहरीले आफ्नै कर्मचारी पक्राउ गरेर थुनामा राख्यो । हाल उनीहरू पुर्पक्षका लागि थुनामा छन् । मोजिबुल्ला पक्राउ घटनामा रौतहटकै अर्का पत्रकार सञ्जय सहनीको योजनामा प्रहरीले उनलाई फसाएका थिए ।

उनी पनि हाल पुर्पक्षका लागि थुनामा छन् । तर, सीसीटीभी फुटेज सार्वजनिक नभइदिएको भए निर्दोष पत्रकार मोजिबुल्ला जेल पर्नबाट जोगिने अवस्था आउने सम्भावना नै थिएन ।

अहिले कस्तुरीकाे बिनासहित पक्राउकाे घटनामा पनि राैतहटकै अवस्था दाेहाेरिने आशंका बढेकाे छ ।

प्रकाशित मिति: आइतबार, साउन १, २०७९ १५:२९