यसरी भयाे दुई दशकअघि एन्फा छिरेका पंकजकाे अध्यक्षमा आराेहण

A+ A A-

अखिल नेपाल फुटबल संघ (एन्फा) को चारवर्षे कार्यकाल सम्हाल्ने गरी झापाका ५१ वर्षीय पंकजविक्रम नेम्वाङ नेतृत्वमा पुगेका छन् । सोमबार भएको २१औँ साधारणसभा तथा केन्द्रीय निर्वाचनबाट उनी एन्फाको अध्यक्षमा निर्वाचित भएका हुन् ।

उनी मात्रै होइन, एन्फाको कार्यसमितिमा स्पष्ट बहुमतसहित उनको टिम नै विजयी भएको छ । नेम्वाङ कुल खसेकाे ८४ मध्ये ४५ मत पाएर विजयी भएका हुन् ।

उनीसँग प्रतिस्पर्धा गरेका निवर्तमान अध्यक्ष कर्मा छिरिङ शेर्पाले ३९ मत मात्रै पाए । कार्यसमितिको वरिष्ठ उपाध्यक्षमा नेम्वाङ समूहकै वीरबहादुर खड्का र अन्य तीन उपाध्यक्षले समेत जित हात पारेका छन् ।

शालीन स्वभावका नेम्वाङ दुई दशकअघि केन्द्रीय सदस्यका रूपमा एन्फामा प्रवेश गरेका थिए । त्यसयता उनी निरन्तर एन्फाको कार्यसमितिमा बसेर काम गरिरहेका थिए ।

२०७४ मा शेर्पा एन्फा अध्यक्षमा चुनिँदा उनी सोही समूहबाट वरिष्ठ उपाध्यक्षमा निर्वाचित भएका थिए । तर, शेर्पाले आफू नेतृत्वमा पुगेपछि नेम्वाङलाई साथमा राख्न सकेनन् ।

अझ उनलाई एक्ल्याएर एन्फाको कामकारबाही अघि बढाए । जसका कारण उनीहरूको सम्बन्ध तिक्ततापूर्ण बन्दै गयो र उनीहरू एकअर्काविरुद्ध प्रतिस्पर्धा गर्ने अवस्थामा आइपुगेका हुन् ।

अन्ततः चुनावमा शेर्पालाई हराउँदै नेम्वाङ नेतृत्वमा पुगे । उनी नेपाली फुटबलको अवस्था प्रतिकूल हुँदाको परिस्थितिमा नेतृत्वमा पुगेका छन् । राष्ट्रिय टिमका खेलाडी र मुख्य प्रशिक्षक अब्दुल्ला अल्मुताइरीबीचको विवादित सम्बन्धका कारण फुटबल खेल नै ओरालो लागेको छ ।

खेलाडी मात्रै होइन, शर्पाले अल्मुताइरीलाई प्रयोग गरेर नेम्वाङलाई कमजोर पार्ने खेलसमेत खेलेकाे आराेप छ । जसले गर्दा अल्मुताइरी र नेम्वाङबीचको सम्बधसमेत समधुर छैन ।

जितलगत्तै प्रतिक्रिया दिएका नेम्वाङले एन्फा नेतृत्वलाई सही सुझाव दिँदा त्यसको अनुसरण नहुँदा धेरै निर्णयहरूमा नोट अफ डिसेन्ट लेख्नुपर्ने अवस्था आएको बताए । बाहिर हल्ला भएको जस्तो शेर्पासँग कुनै तिक्तता नभएको र आफू नेतृत्वमा रहँदा उनीहरूबाट पाएको सही सुझावलाई पालना गर्ने प्रतिबद्धता पनि उनले गरे ।

त्योबाहेक एन्फाको आर्थिक विषयलाई पनि पारदर्शी बनाउने उनले घाेषणा गरे । काठमाडौं महावीर फुटबल क्लबका पूर्वखेलाडी नेम्वाङसँग झापाको रोलिङ फुटबल क्लबको तीन कार्यकाल अध्यक्ष भएर काम गरेको अनुभव छ । नेम्वाङ निर्णय क्षमता भएका र खेलाडीको हकहितका लागि काम गर्ने पदाधिकारीमा पर्ने गर्छन् ।

वरिष्ठ उपाध्यक्ष हुँदा उनले एसियन छनोट खेलमा बाहिरिएका १० जना खेलाडीका बारेमा समेत छलफल गरेर समाधान गर्नुपर्ने भन्दै एन्फाको कार्यसमिति बैठकमा कुरा राखेका थिए । नेम्वाङ समूहले खेलाडी हाम्रो सम्पत्ति र एन्फा सुधारको मूलमन्त्रका साथै सुशासनलाई एजेण्डा बनाएर चुनावी प्रचार गरेकाे थियाे ।

याे पनि...

प्रकाशित मिति: मंगलबार, असार ७, २०७९ ०९:३०