एएफसीमा नेपालकाे लज्जास्पद हारकाे समीक्षा नगरेरै एन्फा चुनावकाे रस्साकस्सीमा कर्मा-पंकज

एएफसीमा नेपालकाे लज्जास्पद हारकाे समीक्षा नगरेरै एन्फा चुनावकाे रस्साकस्सीमा कर्मा-पंकज

A+ A A-

अखिल नेपाल फुटबल संघ (एन्फा) भित्र चुनावी रौनक बढ्दै छ । ठीक यहीबेला एएफसी एसियन कप २०२३ अन्तर्गत तेस्रो चरणको छनोटका खेलहरूमा नेपालले लज्जास्पद हार व्यहोरेर फर्किँदैछ ।

समूह ‘ए’ मा रहेको नेपाल लगातार तेस्रो खेल हारेर फर्किन लागेको हो । बुधबार बिहान कुवेत सिटीमा सकिएको खेलमा नेपालमाथि इन्डोनेसिया ७-० गोलको फराकिलो अन्तरले विजयी भएको छ ।

नेपाल पहिलो खेलमा जोर्डनसँग २-० र दोस्रो खेलमा आयोजक कुवेतसँग ४-१ गोल अन्तरले पराजित भएको थियो । एसियन कपको तेस्रो चरणको छनोटमा सहभागी २४ टिममध्ये नेपालले सबैभन्दा कमजोर प्रदर्शन गरेको छ । योसँगै नेपाल अंकविहीन भएर घर फर्किन लागेको हो ।

नेपाली फुटबलकाे याे दुर्दशाकाे समीक्षा गर्नुपर्ने बेला एन्फामा त्यसप्रति चासाे देखिँदैन । एन्फा पदाधिकारीहरूकाे ध्यान ६ असारमा हुने २१औँ साधारणसभा तथा निर्वाचनमा छ । एन्फाकाे नेतृत्वमा आउन आकांक्षीबीच रस्साकस्सी छ।

खेल सुधार र खेलाडीको हीतमा लाग्नुपर्ने एन्फा आफैँभित्रको राजनीतिक किचलाेले थलिएको छ । उसो त, सुरुमा एएफसी छनोट खेलको बन्द प्रशिक्षणमा रहेका १० जना खेलाडी र प्रशिक्षक अब्दुल्लाह अलमुताइरीबीचकाे चर्काे विवादमा पनि एन्फा खेलाडीको पक्षमा उभिन सकेन ।

विवादले खेलाडीले बन्द प्रशिक्षणबाट बाहिरिनु परेकाे थियाे । १४ वैशाखमा राष्ट्रिय फुटबल खेलाडी रोहित चन्द, विशाल श्रेष्ठ, तेज तामाङ, अनन्त तामाङ विमल घर्तीलगायतका १० खेलाडीलाई बन्द प्रशिक्षणबाट नै अल्मुताइरीले निकालेका थिए ।

खेलाडीहरूले १५ वैशाखमा पत्रकार सम्मेलन गरेरै प्रशिक्षक अल्मुताइरीले आफूहरूमाथि ज्यादती गरेको आराेप लगाएका थिए । तर, खेलाडीको हकहितको लागि बनेको एन्फाका अध्यक्ष कर्माछिरिङ शेर्पाले चुनावको मुखमा आफू विवादमा नपर्ने भन्दै यो विवादबाट टाढै रहने अभिव्यक्ति दिएका थिए ।

प्रशिक्षक अलमुताइरीले बन्द प्रशिक्षण छोडेका १० जना खेलाडीबाहेक नयाँ खेलाडी लिएर एएफसी खेल्न हिँडेका थिए । राष्ट्रिय टिमका १० जना खेलाडी अन्यायमा पर्दासमेत कर्मा एन्फा अध्यक्षमा दोहोरिने लालसाले मौन बसेको उनीमाथि आरोप छ ।

एएफसी छनोट खेलमा लज्जास्पद हारको एक कारण छनोट चरणको मुखैमा भएकाे प्रशिक्षक-खेलाडी विवादसमेत रहेको तर्क एन्फाकै केही पदाधिकारीले स्वीकारेका छन् ।

अर्काे कर्माले नेतृत्व सम्हालेको चार वर्षमा खेलाडीको सेवासुविधाबारे केही काम गर्न सकेका छैनन् । खेलाडीकाे पक्षमा काम नभएकाेभन्दै खेलाडी तथा एन्फाका पदाधिकारीले बारम्बर एन्फा कार्यसमिति बैठकको माग राख्दै पत्रसमेत लेखेका थिए । तर, उनले कुनै सुनुवाइ गरेनन् ।

पछिल्लो समय प्रशिक्षक र खेलाडीबीचको मनमुटाबको विषयमासमेत समाधानको उपाय खोज्नुपर्ने भन्दै एन्फाका वरिष्ठ उपाध्यक्ष पन्कजविक्रम नेम्वाङसहित उपाध्यक्षद्वय वीरबहादुर खड्का र कृष्णबहादुर थापाले बैठकको माग गरेका थिए । तर, मागको सम्बाेधन भएन । आफ्नो चार वर्षे कार्यकालमा खेलाडीको हकहितको लागि काम गर्न नसकेको आरोप लागेका कर्मा फेरि एन्फाको संस्थागत विकासका लागि आफ्नो नेतृत्व आवश्यक रहेको एजेण्डासहित चुनावी प्रचार गरिरहेका छन् । सन् २०१८ मा मणि कुवँरलाई हराउँदै कर्मा एन्फा अध्यक्ष निर्वाचित भएका थिए ।

एएफसी छनोटमा नेपालको कमजोर प्रर्दशनबारे उनले अहिले कुनै प्रतिक्रिया नदिने बताए । उनले शिलापत्रसँग भने, ‘यो विषयमा म अहिले केही बोल्दिनँ । एन्फाबारे बुझ्ने भए प्रवक्तासँग बुझ्नु होला ।’

एन्फामा कुनै सुधार नआएको भन्दै चार वर्षअघि ‘चेन्ज एन्फा’ को नारा लिएर कर्माकै क्याम्पमा रहेका वरिष्ठ उपाध्यक्ष पंकजविक्रम नेम्वाङ पनि यसपटक अध्यक्षको चुनावी दाैडमा छन् । नेम्वाङले 'खेलाडी हाम्रो सम्पत्ति' र 'एन्फा सुधार र सुशासन'लाई मुख्य एजेण्डा बनाएका छन् ।

आफू एन्फा नेतृत्वमा आए खेलाडी नै मुख्य प्राथमिकतामा पर्ने नेम्वाङले बताए । ‘म कुनै पदभन्दा पनि खेलाडीको हकहितको लागि एन्फाको नेतृत्वमा आउन खोजेको हो । एन्फाले पछिल्लो चारवर्ष के काम गर्‍यो ? त्यो खेलाडी र नेपाली फुटबलप्रेमीले देखिसकेका छन् । मैले केही भन्नै पर्दैन,’ नेम्वाङ भन्छन्, ‘म नेतृत्वमा पुगे यो सबै कुराको अन्त्य हुन्छ । राम्रो खेल्ने खेलाडीको हौसला बढ्छ ।’

अध्यक्षका लागि कर्मा र नेम्वाङ छुट्टाछुट्टै प्यानल बनाएर चुनावी मैदानमा उत्रिएका छन् । यी दुईबाहेक अध्यक्षमा फ्रेन्ड्स क्लबका पूर्वउपाध्यक्ष राजीवराज पौड्यालले पनि उम्मेदवारी दिएका छन् ।

नेम्वाङको प्यानलबाट वरिष्ठ उपाध्यक्षमा वर्तमान उपाध्यक्ष वीरबहादुर खड्का तथा चार उपाध्यक्षका लागि काठमाडौं जिल्ला फुटबल संघका अध्यक्ष विराटजंग शाही, वर्तमान केन्द्रीय सदस्य दावा लामा, एनआरटीका अध्यक्ष सुन्दरनरसिंह जोशी र धादिङ जिल्ला फुटबल संघका अध्यक्ष दीपक खतिवडा छन् ।

त्यस्तै, हालका अध्यक्ष कर्माको प्यानलबाट वरिष्ठ उपाध्यक्षमा सरस्वती क्लबका अध्यक्ष शिक्षित पराजुली तथा चार उपाध्यक्षमा विज्ञानराज शर्मा, उपेन्द्रमान सिंह, दीर्घबहादुर केसी र रत्नकुमार श्रेष्ठ चुनावी मैदानमा उत्रिएका छन् ।

एन्फाको चुनावबाट एक अध्यक्ष, एक वरिष्ठ उपाध्यक्ष, चार उपाध्यक्ष र दुई महिलासहित १५ सदस्य गरेर २१ जना निर्वाचित हुनेछन् । एन्फा चुनावका लागि ४५ जिल्ला, १४ ‘ए’ डिभिजन क्लब, ११ ‘बी’ डिभिजन क्लब र ९ ‘सी’ डिभिजन क्लब, एन्फाअन्तर्गत रहेका खेलाडी संघ, प्रशिक्षक संघ, महिला संघ र रेफ्री संघ, राष्ट्रिय लिगका लागि छनोट भएका चार क्लबले मतदान गर्न पाउँछन् ।

प्रकाशित मिति: बुधबार, असार १, २०७९ १२:५६