एन्फा नेतृत्वका लागि कर्मा र नेम्वाङबीच तीव्र प्रतिस्पर्धा, कसको एजेण्डा के ?

एन्फा नेतृत्वका लागि कर्मा र नेम्वाङबीच तीव्र प्रतिस्पर्धा, कसको एजेण्डा के ?

A+ A A-

अखिल नेपाल फुटबल संघ (एन्फा) मा चुनावी माहाैल तातेको छ । ६ असारमा हुने २१औँ साधारणसभा तथा केन्द्रीय निर्वाचनबाट एक अध्यक्ष, एक वरिष्ठ उपाध्यक्ष, चार उपाध्यक्ष र दुई महिलासहित १५ सदस्य गरेर २१ जना निर्वाचित हुनेछन् ।

एन्फा अध्यक्षका लागि वर्तमान अध्यक्ष कर्मा छिरिङ शेर्पा र वरिष्ठ उपाध्यक्ष पंकजविक्रम नेम्वाङ छुट्टाछुट्टै प्यानल बनाएर चुनावी मैदानमा उत्रिएका छन् । चार वर्षअघि ‘चेन्ज एन्फा’ को नारा लिएर एउटै क्याम्पमा रहेका शेर्पा र नेम्वाङ यो पटक भने मुख्य प्रतिस्पर्धी भएर चुनावी मैदानमा होमिएका छन् ।

यद्यपि अध्यक्षकै लागि फ्रेन्ड्स क्लबका पूर्वउपाध्यक्ष राजीवराज पौड्यालले पनि उम्मेदवारी दिएका छन् । तर, शेर्पा र नेम्वाङबीच नै कडा प्रतिस्पर्धा हुने अनुमान देखिएकाे छ । कुल २१ पदका लागि ५४ जनाको उम्मेदवारी परेको र चार जना सदस्यको उम्मेदवारी फिर्ता भएको एन्फाका प्रवक्ता इन्द्रमान तुलाधरले जानकारी दिए ।

उम्मेदवारी फिर्ता लिनेहरूमा विमला पौडेल, शम्भुकुमार सिंह ठकुरी, लालकुमार साउद र मनि चेम्जोङ छन् । अध्यक्षबाहेक वरिष्ठ उपाध्यक्षका लागि शिक्षित पराजुली र वीरबहादुर खड्काको उम्मेदवारी परेको छ ।

त्यस्तै, चार उपाध्यक्षका लागि आठ जना मैदानमा उत्रेका छन् । उपेन्द्रमान सिंह, रत्नकुमार श्रेष्ठ, दीर्घबहादुर केसी, विज्ञानराज शर्मा, दावा लामा, विराटजंग शाही, दीपक खतिवडा, सुन्दरनरसिंह जोशीले दाबेदारी पेस गरेका छन् । हाल निर्वाचन समितिले उम्मेदवारीमाथि छानबिन गरिरहेको छ । उम्मेदवारहरूमाथि दाबी विरोध गर्ने समय २४ जेठसम्म रहेको तुलाधरको भनाइ छ ।

अध्यक्षका उम्मेदवार पंकजविक्रम नेम्वाङकाे प्यानलबाट वरिष्ठ उपाध्यक्षमा वर्तमान उपाध्यक्ष वीरबहादुर खड्का तथा चार उपाध्यक्षका लागि काठमाडौं जिल्ला फुटबल संघका अध्यक्ष विराटजंग शाही, वर्तमान केन्द्रीय सदस्य दावा लामा, एनआरटीका अध्यक्ष सुन्दरनरसिंह जोशी र धादिङ जिल्ला फुटबल संघका अध्यक्ष दीपक खतिवडा छन् ।

त्यस्तै, हालका अध्यक्ष कर्माछिरिङ शेर्पाको प्यानलबाट वरिष्ठ उपाध्यक्षमा सरस्वती क्लबका अध्यक्ष शिक्षित पराजुली तथा चार उपाध्यक्षमा विज्ञानराज शर्मा, उपेन्द्रमान सिंह, दीर्घबहादुर केसी र रत्नकुमार श्रेष्ठ चुनावी मैदानमा छन् ।

यसअघि मणि कुवँरलाई हराउँदै एन्फाको नेतृत्व सम्हाल्न पुगेका कर्मामाथि एन्फालाई सही दिशा दिन नसकेको आरोप लागेको छ । १४ वैशाखमा राष्ट्रिय फुटबल टिमका १० जना र प्रशिक्षक अब्दुल्ला अलमुताइरीबीचको विवादसमेत समाधान गर्न नसकेको आरोप उनीमाथि छ ।

एसियन कप छनोटको तयारीमा रहेका रोहित चन्द, विशाल श्रेष्ठ, तेज तामाङ, अनन्त तामाङ विमल घर्तीलगायतका १० खेलाडीलाई बन्द प्रशिक्षणबाट नै अल्मुताइरीले निकालेकाे आराेप छ । खेलाडीहरूले १५ वैशाखमा पत्रकार सम्मेलन गरेर नै प्रशिक्षक अल्मुताइरीको ज्यादतीबारे सार्वजनिक गरेका थिए ।

तर, एन्फा अध्यक्ष कर्माले भने चुनावको मुखमा आफू विवादमा नपर्ने भन्दै याे विवादबाट टाढै रहने अभिव्यक्ति सार्वजनिक रूपमै दिएका थिए । प्रशिक्षक अलमुताइरीले बन्द प्रशिक्षण छोडेका १० जना खेलाडीबाहेक नै टिम बनाइसकेका छन् ।

राष्ट्रिय टिमका १० जना खेलाडी अन्यायमा पर्दासमेत कर्मा एन्फा अध्यक्षमा दोहोरिने लालसाले मौन बसेकाे आराेप उनीमाथि छ । त्यो बाहेक कर्माले नेतृत्व सम्हालेको चार वर्षमा खेलाडीको सुवा सुविधाबारे केही काम गर्न नसकेको आरोप पनि लगाइन्छ ।

यद्पि कर्मा समूहले एन्फाको संस्थागत विकासका लागि आफ्नो नेतृत्व आवश्यक रहेको एजेण्डासहित चुनावी प्रचार गरिरहेकाे छ ।

हालका वरिष्ठ उपाध्यक्ष नेम्वाङ भने पहिलोपटक एन्फाको नेतृत्वमा पुग्ने दौडमा छन् । पहिलो कार्यकालका लागि कर्मालाई नै सहयोग गरेका नेम्वाङ योपटक भने आफैँ नेतृत्वमा पुग्न उनीसँग भिडिरहेका छन् ।

नेम्वाङ निर्णय क्षमता भएका र खेलाडीको हकहितका लागि काम गर्ने पदाधिकारीमा पर्ने गर्छन् । १० जना खेलाडीका बारेमा समेत छलफल गरेर समाधान गर्नुपर्ने भन्दै एन्फाको कार्यसमितिको बैठकको माग राखेका थिए । नेम्वाङ समूहले खेलाडी हाम्राे सम्पत्ति र एन्फा सुधारको मूलमन्त्रका साथै सुशासनलाई एजेण्डा बनाएर प्रचार गरिरहेकाे छ ।

एन्फा चुनावका लागि ४५ जिल्ला, १४ ‘ए’ डिभिजन क्लब, ११ ‘बी’ डिभिजन क्लब र ९ ‘सी’ डिभिजन क्लब, एन्फाअन्तर्गत रहेका खेलाडी संघ, प्रशिक्षक संघ, महिला संघ र रेफ्री संघ, राष्ट्रिय लिगका लागि छनोट भएका चार क्लबले मतदान गर्न पाउँछन् ।

प्रकाशित मिति: आइतबार, जेठ २२, २०७९ १४:२५