लगानीकर्ता भन्छन्– पुँजीबजार राजनीतिक विषय होइन, नेताहरूले नबोलेकै राम्रो

लगानीकर्ता भन्छन्– पुँजीबजार राजनीतिक विषय होइन, नेताहरूले नबोलेकै राम्रो

A+ A A-

पुँजीबजारलाई लिएर राजनीतिक दलहरूले विभिन्न समयमा दिँदै आएको अनावश्यक प्रतिक्रियाले बजारलाई तरंगित बनाउने गरेको भन्दै त्यस्ता प्रतिक्रिया नदिन लगानीकर्ताहरूले आग्रह गरेका छन् ।

१९ बुँदे मागसहित पुँजीबजार सुधारका लागि आन्दोलनमा उत्रिएका लगानीकर्ताहरूले सरकार तथा राजनीतिक दलका नेताहरूले पुँजीबजारबारे दिने अभिव्यक्तिमा बन्देज लगाउनुपर्ने माग राखेका हुन् ।

'सरकारका मन्त्री, राजनीतिक दलका नेता र सार्वजनिक ओहोदामा रहेकाहरूले शेयरबजारबारे दिने सकारात्मक वा नकारात्मक दुवै किसिमका अभिव्यक्तिमा बन्देज लगाइनुपर्छ' लगानीकर्ताले राखेको मागपत्रमा उल्लेख छ ।

नेपालको शेयरबजारमा राजनीतिक घटनाक्रम मात्रै नभएर व्यक्तिविशेषले दिएका प्रतिक्रियाले पनि छिट्टै असर गर्दै आएको छ । मास साइकोलोजीलाई सजिलै डाइभर्ट गर्ने हुँदा पनि यस्ता प्रतिक्रिया पुँजीबजारका लागि घातक भएको उनीहरूको ठहर छ ।

शेयरबजारमा लगानीकर्ताको संख्या नै ५० लाखभन्दा माथि छ । जसका कारण राजनीतिक दलका नेताहरूले पनि पुँजीबजारलाई लिएर विभिन्न धारणा व्यक्त गर्दै चर्चामा आइरहेका छन्, कोही नराम्रो भन्दै त कोही राम्रो भन्दै । यसरी पुँजीबजारलाई लिएर सार्वजनिक अभिव्यक्ति दिनेमा जसपाका संघीय परिषद् अध्यक्ष बाबुराम भट्टराई, पूर्वअर्थमन्त्री युवराज खतिवडादेखि सांसद र पूर्वगभर्नरहरूसमेत छन् । उनीहरूले सकारात्मक वा नकारात्मक टिप्पणीसहित पुँजीबजार क्षेत्रका विषयमा बोलिरहेका भेटिन्छन् ।

बजेट छलफलकाे समयमा एक सांसदले पुँजीबजारलाई लक्षित गर्दै दिएकाे ४/१२ को शेयकर्जा सीमा हटाउन नहुने अभिव्यक्ति होस् या नेकपा माओवादीका अध्यक्ष पुष्पकमल दाहाल प्रचण्डले 'सामन्तवादको अड्डा पुँजीबजार' भन्दै दिएको अभिव्यक्ति, यस्ता सबै खालका अभिव्यक्तिले पुँजीबजारमा असर पारिरहेको लगानीकर्ताहरूको बुझाइ छ ।

यसरी हचुवाका भरमा शेयरबजारबारे अभिव्यक्ति दिँदै लगानीकर्ताकाे मनाेविज्ञानसँग खेल्ने भन्दै लगानीकर्ताले यस्ता अभिव्यक्ति दिने कार्य बन्द गर्नुपर्ने माग राखेका छन् ।

यसरी कहिले सरकारी ओहोदाका व्यक्ति त कहिले राजनीतिक दलका नेताहरूले दलीय राजनीतिमा पुँजीबजारलाई पनि मुछिरहँदा बजार स्वतन्त्र हुन नसकेको लगानीकर्ताले आरोप लगाएका छन् ।

पछिल्लो समय शेयरलगानीकर्ताको संख्या बढेसँगै राजनीतिक दलका नेताहरू भोटकै लागि भए पनि लगानीकर्ता रिझाउने अभिव्यक्ति दिन थालेका छन् । यसले पुँजीबजारमा सकारात्मक र नकारात्मक तरंग पैदा गर्दै आएको छ । लगानीकर्ताहरू भन्छन्, 'पुँजीबजार राजनीतिक विषय होइन, नेताहरूले नबोलेकै राम्रो ।'

सम्बन्धित समाचार