संसदबाट प्रचण्डको सन्देश : सत्ता गठबन्धन अझै आवश्यक, ओलीसँग गठबन्धन असम्भव

A+ A A-

स्थानीय चुनावपछि संघ र प्रदेशसभाको निर्वाचनमा एमाले र माओवादी केन्द्र मिल्न सक्ने चर्चा भइरहेको बेला माओवादी केन्द्रका अध्यक्ष पुष्पकमल दाहाल प्रचण्डले एमाले अध्यक्ष केपी शर्मा ओलीको नेतृत्वको वाम गठबन्धन असंभव रहेको सन्देश दिएका छन् । सत्ता गठबन्धन कमजोर बनेमा मुलुक दुर्घटनामा जाने बताउँदै उनले आगामी निर्वाचनमा पनि यसलाई कायमै राख्ने संकेत गरेका छन् ।

संसदमा सरकारको नीति तथा कार्यक्रमको छलफलमा सहभागी हुँदै प्रचण्डले एमालेसँग सहकार्यको निम्ति आफू सकरात्मक रहेको भए पनि त्यस पार्टीका अध्यक्ष ओलीको दम्भी र निषेधात्मक प्रवृत्तिका कारण एमालेसँगको गठबन्धन असंभव रहेको बताएका हुन् । एमाले अध्यक्ष ओलीले आत्मालोचनाको साटो अहंकार प्रस्तुत गरेको भन्दै प्रचण्डले एमालेमा ओलीको नेतृत्व रहुन्जेलसम्म सहकार्य संभव नदेखिएको बताए ।

'एमालेका धेरै नेता कार्यकर्ताप्रति मेरो भरोसा र विश्वास छ । ओलीजी अहंकार दम्भ र निषेधात्मक प्रवृत्तिबाट पछि हट्नुभएको छैन भन्ने देखियो । यो प्रवृत्ति अन्त्य हुने देखिँदैन । अन्यथा एमालेसँग मिलेर काम गर्ने कुरामा कठिन हुने त देख्दिनँ,' उनले भने ।

पार्टीको आन्तरिक झगडाको कारण दुईपटक संसद विघटनको क्षति व्यहोर्दा पनि अध्यक्ष ओलीमा अझै अहंकार देखिएको प्रचण्डको भनाइ छ । 'असंवैधानिक रुपमा संसदको विघटन गर्दा पार्टी फुट्यो । सात प्रदेशको सरकार गुम्यो । राष्ट्रियसभामा हार व्यहोर्नुपर्‍यो । स्थानीय चुनावमा पनि असर पर्‍यो । अब त आत्मालोचना गर्नुहुन्छ कि भनेको त उहाँ त गाली र बदनाम गर्ने तथा झुट बोल्नेमा केन्द्रित हुनुभयो,' प्रचण्डले भने ।

एमाले अध्यक्ष ओलीले वापन्थी एकताको निम्ति आत्मालोचना नगरेर कम्युनिस्ट आन्दोलनलाई राष्ट्रको हितमा अघि बढाउने अवसर गुमाएको प्रचण्डको भनाइ छ । 'केपी ओली कम्युनिस्ट आन्दोलनको हितको निम्ति तत्पर रहेको कुरा गर्नुहुन्छ कि भन्ने थियो । वामपन्थी एकताको कुरा गर्नुहुन्छ कि भनेको को त उहाँ त दम्भबाट पछि नहटेको देखियो उहाँले अवसर गुमाउनुभयो,' प्रचण्डले भने ।

स्थानीय चुनावको परिणामबारे एमालेले विरोधाभास कुरा गरेको प्रचण्डको आरोप छ । एमालेले माओवादी केन्द्रलाई होच्याए पनि आफ्नो पार्टी निर्णायक शक्ति भएर उभिएको उनको भनाइ छ । 'आन्तरिक बैठकमा ओलीले लज्जास्पद अर्न्तरघात भन्नुभएको थियो । संसदमा फेरि धाँधली भन्नुभयो यो त विरोधाभास भयो', प्रचण्डले भने, 'माओवादी केन्द्र गुगलमा खोज्नुपर्छ भन्नुहुन्थ्यो हामी निर्णायक शक्ति भएर फर्कियौँ ।'

सत्ता गठबन्धन कमजोर भए मुलुक अझै पनि दुर्घटनामा जाने खतरा रहेको भन्दै प्रचण्डले यसलाई अझै बलियो बनाउनुपर्ने धारणा व्यक्त गरेका छन् । मुलुकमा संविधान र लोकतान्त्रिक प्रणालीलाई बलियो बनाउने र त्यसकाविरुद्ध लाग्ने दुईथरी गठबन्धन रहेकाले संविधान र लोकतन्त्रको पक्षधर बलियो हुनुपर्ने बताए । 'पार्टीभित्रको झगडाले जनता र संविधानलाई दु:ख दिने काम भएपछि सत्ता गठबन्धन बनेको हो । यो गठबन्धन नबेनेको भए देश दुर्घटनामा जान्थ्यो । अहिले पनि गठबन्धन कमजोर भयो भने मुलुक दुर्घटनामा जाने खतरा छ,' उनले भने ।

चितवनमा आफूले गठबन्धनको उम्मेदवारलाई मत नहालेमा मुलुक दुर्घटनामा जाने नभनेको प्रचण्डको भनाइ छ । आफूले मतदातालाई कुनै धम्की नदिएको प्रचण्डको स्पष्टोक्ति छ । 'प्रतिपक्षी दलका नेताले भन्नुभयो चितवनमा प्रचण्डले मतदाता धम्क्याए । जनतालाई संविधान र लोकतन्त्रको पक्षधरको गठबन्धनलाई बलियो बनाउनुस् भनेर अपिल गर्नु के धम्की हो?' प्रचण्डको प्रश्न छ ।

निर्वाचन परिणामलाई सबै राजनीतिक दलले स्वाभाविक ढंगले लिनुपर्ने उनको भनाइ छ । परिणामको गणितभन्दा पनि संविधान कार्यान्वय र संघीय लोकतान्त्रिक गणतन्त्र संस्थागत गर्ने विषय मुख्य कुरा रहेको उनले बताए । 'केही सिट बढी वा घटी ल्याउनु कुनै विषय होइन । संविधान ट्र्याकमा राखेर कार्यान्वयनमा जाने कुरा महत्वपूर्ण कुरा हो,' उनले भने ।

आर्थिक संकट समाधानमा राष्ट्रिय सहकार्यको प्रस्ताव, महँगीबारे ध्यानाकर्षण

प्रचण्डले मुलुकमा देखिएको आर्थिक संकट समाधान गर्न दलहरूबीच राष्ट्रिय सहकार्य हुनुपर्ने बताए । यस्ता विषय समाधानमा सरकारको मुख्य भुमिका रहे पनि राजनीतिक दलहरूबीच पनि सहकार्य जरुरी रहेको उनको भनाइ थियो ।

एकअर्काप्रति दोषारोपण र घोचपेचभन्दा पनि संकट समाधानमा सर्वपक्षीय सहकार्य जरुरी रहेको प्रचण्डको भनाइ छ । 'दोषारोपण मात्रै गरेर समस्याको समाधान हुने स्थिति छैन । संवाद सहकार्य र एकताको माध्यमबाट समाधान गर्दै अघि बढ्नुपर्छ,' प्रचण्डले भने, 'आज पनि देशलाई राजनीतिक सहमति र समझदारीको आवश्यकता छ । परिस्थितिको गम्भिरतालाई आत्मासाथ गर्दै नयाँ दृष्टिकोण र रणनीति अघि बढाऔँ।'

प्रचण्डले कर घटाएर भए पनि मूल्यवृद्धि रोक्न प्रधानमन्त्री शेरबहादुर देउवासँग माग गरेका छन् । मूल्यवृद्धि नरोकिए भान्साबाटै विद्रोह सुरु हुनसक्ने भन्दै उनले कर घटाएर भए पनि महँगी रोक्नुपर्ने बताएका हुन् । ‘महँगीको मारले नेपाली जनताको ढाड सेकिएकै छ । भान्साबाट विद्रोह सुरु हुन्छ कि भन्ने परिस्थिति बनेकै छ’, प्रचण्डले भने।

छिमेकी मुलुकहरूमा पनि कर छुट दिएर मुल्य समायोजन भएकाले प्रधानमन्त्रीले यस्तो निर्णय लिनुपर्ने उनको माग छ । ‘पेट्रोलियम पदार्थमा छिमेकी देशहरूले कर छुट दिएर मूल्य समायोजन गर्ने प्रयास गरेका छन् । प्रधानमन्त्रीलाई भनेको छु कर घटाएर भए पनि मूल्य वृद्धि रोक्नुपर्‍यो । अन्यथा जनतामा आक्रोश बढ्न सक्छ,' उनले भने ।

अन्तर्राष्ट्रिय राजनीति युद्ध, र कोरोनालगायतका कारण नेपाल पनि असर परेको भन्दै उनले सबै राजनीतिक दलबीच सहकार्य जरुरी रहेको बताए ।

प्रकाशित मिति: शनिबार, जेठ १४, २०७९ १५:४८