सरकारले सस्तो बनाइदिएको हाइब्रीड गाडी कस्तो हुन्छ ?

A+ A A-

सरकारले आगामी आर्थिक वर्षको लागि ल्याएको बजेटमार्फत हाइब्रीड इञ्जिन भएको गाडीको मूल्य परम्परागत इञ्जिन भएको गाडीको तुलनामा निकै सस्तो पर्ने देखिएको छ ।

आगामी आर्थिक वर्षको लागि ल्याइएको बजेटमा हाइब्रीड इञ्जिन भएको गाडीमा भन्सार र अन्तशुल्क ५०/५० प्रतिशत छुट दिने व्यवस्था गरिएको छ ।

यस्तो छुटपछि ३८ लाख रुपैयाँ पर्ने गाडी अब करिब २५ लाख रुपैयाँमा नै पाइने भएको छ । सो सम्बन्धी समाचार ३८ लाख पर्ने यी गाडी अब पाइन्छ २५ लाख रुपैयाँ क्लिक गरी हेर्न सकिन्छ ।

तर, हाइब्रीड इञ्जिन भएको गाडी भनेको के हो ? यी गाडीका के कस्ता विशेषता हुन्छन् ? भन्ने जिज्ञासा पनि हुन सक्छ । यस्तो हुन्छ हाइब्रीड इञ्जिन भएका गाडीः

पछिल्ला वर्षमा वातावरणीय सुरक्षाका लागि प्रविधि रुपान्तरणको अभ्यास तीव्र पारिएको छ । वातावरण र इन्धन जोगाउने भन्दै आजभोलि हाइब्रीड कारको प्रयोग बढ्दै गएको छ ।

हाइब्रीड कारमा पेट्रोल वा डिजेलबाट चल्ने इञ्जिनसँगै विद्युतीय शक्तिबाट चल्ने इञ्जिन पनि राखिएको हुन्छ । यस्ता कारमा सडकको अवस्था हेरेर चालकले इन्धन वा विद्युत प्रयोग गरेर सवारी चलाउन सक्छन् ।

हाइब्रीड गाडीमा प्रयोग गरिएको विद्युतीय प्रणाली भने दुई थरीको हुन्छ । एकथरीमा ब्याट्री छुट्टै चार्ज गर्नुपर्ने हुन्छ । अर्कोथरीमा इन्धनबाट चल्ने इञ्जिन चलिरहँदा ब्याट्री आफै चार्ज हुने गर्छ । ब्याट्री आफसेआफ चार्ज हुने हाइब्रीड गाडीको विद्युतीय इञ्जिन ब्याट्री छुट्टै चार्ज गर्नुपर्नेको भन्दा कमजोर हुन्छ ।

सहरी सडकमा वा समथल सडकमा यस्ता सवारी साधन निकै उपायोगी भएका छन् । सहरी र समथल भेगका सडकमा इन्धन बचत गर्दै विद्युतीय माध्यमबाट यस्ता सवारी चलाउन मिल्छ । कम गतिमा हिड्नुपर्ने सडकमा पनि विद्युतीय इन्जिन प्रयोग गर्न सकिन्छ ।

तीव्र गतिमा गुड्नुपर्ने, पहाडी बाटोमा भने हाइब्रीड गाडीको इन्धन इञ्जिन नै प्रयोग गरिन्छ । गाडीको गति, सडकको अवस्था जस्ता कुराहरु हेरेर गाडी आफैले विद्युतीय वा इन्धन इञ्जिन कुन चलाउने निक्र्योल गर्छ ।

प्रदुषण कम गर्न र इन्धन तथा इन्धन खर्च बचत गर्न यस्ता सवारी साधन उपयुक्त मानिन्छन् ।

पछिल्लो समय टोयटा, बिएमडब्लु, महिन्द्रा जस्ता प्रख्यात कम्पनीले पनि हाइब्रीड कार निर्माणमा जोड दिएका छन् । अन्य कम्पनीले पनि हाइब्रीड कार उत्पादन गर्न लागेका छन् । यस्ता कारको मूल्य न्यूनतम १८ लाख रुपैयाँदेखि ४ करोड रुपैयाँसम्म पर्ने अन्तराष्ट्रिय संचारमाध्यमहरुले उल्लेख गरेका छन् ।

सम्बन्धित सामाग्री
२० लाखको गाडी नेपालमा किन पर्छ ८५ लाख ?

३८ लाख पर्ने यी गाडी अब पाइन्छ २५ लाख रुपैयाँमै

प्रकाशित मिति: सोमबार, असार ३०, २०७६ ०१:५६