एकपक्षीय बहसका भरमा बलात्कारका अभियुक्त सिद्धबाबालाई सफाइ दिने फैसला उच्च अदालतद्वारा बदर

एकपक्षीय बहसका भरमा बलात्कारका अभियुक्त सिद्धबाबालाई सफाइ दिने फैसला उच्च अदालतद्वारा बदर

A+ A A-

आफ्नै अनुयायीलाई बलात्कार गरेको अभियोग लागेका धर्म गुरु ‘सिद्धबाबा’लाई सफाइ दिने जिल्ला अदालत सुनसरीको फैसला उच्च अदालते उल्टाइदिएको छ । उच्च अदालत विराटनगरका कामु मुख्य न्यायाधीश सत्यमोहन जोशी थारु र न्यायाधीश किरणकुमारी गुप्ताको इजलासले जिल्लाको फैसला बदर गरेर पुनः सुनुवाई गर्ने फैसला सुनाएको हो ।

पीडित महिला र सिद्धबाबाबीच भएका एसएमएस कुराकानी, अडियो संवादको स्वतन्त्र परीक्षण गर्ने, विशेषज्ञको राय लिने लगायका काम गरी पुनः मुद्दा सुनुवाइ गर्न आदेश भएकाे विराटनगर उच्च अदालतका प्रवक्ता ओमराज सुवेदीले बताए । यसका साथै स्वास्थ्य परीक्षण गर्ने चिकित्सकको बकपत्र गराउन र पीडित र आरोपित दुवै पक्षका साक्षीको बयान लिएर मुद्दा छिन्न पनि अदालतले भनको छ ।

सुवेदीकाअनुसार १४ असारमा जिल्ला अदालत सुनसरीमा पेसी खेप्ने मितिसमेत उच्चले तोकिदिएको छ । ‘जिल्लाको फैसाल बदर भएको छ । अब नयाँ मुद्दा दर्ता भएर सुनुवाई हुनेछ,’ प्रवक्ता सुवेदीले भने ।

‘सिद्धबाबा’ भनिने कृष्ण गिरीले ४ कात्तिक ०७६ मा आफ्नै महिला अनुयायीलाई आश्रममा बोलाएर बलात्कार गरेको आरोप छ । सुनसरीको बराह क्षेत्रमा रहेको आश्रममा भेट्न आएकी महिलालाई ‘सिद्धबाबा’ले जबरजस्ती करणी गरेको अभियोग छ ।

सुनसरी जिल्ला अदालतका न्यायाधीश अर्जुनप्रसाद कोइरालाले पीडित पक्षको बहस नै नसुनिकन ‘सिद्धबाबा’लाई सफाइ दिएका थिए । बलात्कारजस्तो गम्भीर आरोपमा एकतर्फी बहसमै मुद्दा टुंगाइदिएको भन्दै न्यायाधीश कोइरालाविरुद्ध न्याय परिषद्मा समेत उजुरी परेको छ । तर उनी कारबाहीकाे दायरामा आएनन् ।

याे मुद्दाभन्दा अघि समेत काेइरालाकाे न्याय सम्पादनकाे क्षमतामा प्रश्न उब्जेकाे थियाे । कोइरालाले २०७१ मा ललितपुर जिल्ला अदालतमा छँदा दिएको एउटा आदेशका कारण ९२ रोपनी सरकारी जग्गा व्यक्तिको नाममा दर्ता भएको थियो । यसविरुद्ध न्याय परिषद्मा परेकाे उजुरीबाट सफाइ दिएकाे पाँच महिनापछि नै बलात्कारजस्ताे जघन्य कुसुरमा प्राकृतिक न्यायकाे सिद्धान्तसमेत पालना नगरी एकपक्षीय सुनुवाइ गर्दै अभियुक्तलाई सफाई दिएका थिए ।

न्यायपरिषद्काे कारबाहीबाट जोगिएलगत्तै न्यायाधीश कोइरालाले गरेका थिए सिद्धबाबालाई सफाइ दिने फैसला

पीडितलाई लाञ्छना लगाउने अदालतको फैसला

१६ मंसिर २०७६ मा पक्राउ परेका सिद्धबाविरुद्ध १० पुसमा सुनसरी जिल्ला अदालतमा मुद्दा दर्ता भएको थियो । चार दिनपछि भएको सुनुवाइमा न्यायाधीश राधाकृष्ण उप्रेतीले ‘सिद्धबाबा’ लाई तीन लाख रुपैयाँ धरौटीमा थुनामुक्त गर्दै तारेखमा राख्न आदेश दिएका थिए ।

जिल्ला अदालतले धरौटीमा हिरासत मुक्त गर्ने आदेश दिएसँगै जिल्ला सरकारी वकिलको कार्यालय ‘सिद्धबाबा’ लाई धरौटीमा छाड्न नहुने माग बोकेर विराटनगर उच्च अदालत पुग्यो ।

धरौटी लिने जिल्ला अदालतको आदेश खारेज गनुएपर्ने र साधारण तारेखमा बसेर मुद्दा लड्न पाउनुपर्ने भन्दै ‘सिद्धबाबा’ पनि विराटनगर उच्च अदालत पुगे । उच्च अदालतले ‘सिद्धबाबा’को माग खारेज गरेर थुनामै राखेर सुनुवाइ गर्न भन्यो । उच्च अदालतको आदेशविरुद्ध ‘सिद्धबाबा’ सर्वोच्च अदालत पुगे । १२ मंसिर ०७७ मा सर्वोच्च अदालतले उच्च अदालतकै आदेश सदर गरिदियो ।

सर्वोच्चले थुनामै राखेर मुद्दा सुनुवाइ गर्नु भनेको १० दिनपछि नाटकीय तरिकाले न्यायाधीश कोइरालाले पीडित पक्षको बहस नै नसुनिकन ‘सिद्धबाबा’लाई सफाइ दिए । जिल्ला सरकारी वकीलको कार्यालयले मिसिलसँग सम्बन्धित कागजात थुनछेक बहसका लागि सर्वोच्च अदालत पठाइएको कारण देखाउँदै १२ मंसिरको सुनुवाइ स्थगित गर्न माग गरेका थिए । तर, न्यायाधीश कोइरालाले पीडित पक्षको अनुरोध अस्विकार गरिदियो । कानून व्यवसायीले बहस वहिष्कार गरे । त्यही मौकामा न्यायाधीश कोईरालाले ‘सिद्धबाबा’लाई ७५ पृष्ठको फैसला लेख्दै सफाई दिए ।

न्यायाधीश कोईरालाले पीडितमाथि नै शंका गर्दै फैसला लेखे । पीडित आश्रममै बसेको, ढोकामा प्रहरी हुँदा पनि खबर नगरेको र बलात्कार हुँदा नरोएकोले अभियोग दाबी पुष्टि नहुने कोइरालाले फैसलामा लेखे । फैसलामा भनिएको छ, ‘आफूउपर त्यस्तो जघन्य घटना घटेको भए जाहेरवालीले मौकामा हारगुहार माग्नु वा घटनाबारे बताउनुपर्नेमा सो गरेको भन्ने देखिदैंन ।’

बारम्बार विवादस्पद फैसला गर्ने न्यायाधीश अर्जुनप्रसाद काेइराला ।

एकपक्षीय बहसकै भरमा मुद्दा छिन्ने जिल्ला अदालतको फैसलाउपर सरकार वकिलको कार्यालयले २८ फागुन ०७७ उच्चमा पुनरावेदन दिएको थियो । एक वर्ष कटेपछि उच्चले जिल्लाको फैसला त्रुटिपूर्ण ठहर्दै पुनः सुरुदेखि मुद्दा छिन्न भनेको हो ।
दबाउन खोजे घटना

राजनीतिक र प्रशासनिक पहुँच बनाएर सिद्धबाबा आरोपबाट छलिँदै आएका छन् । ‘सिद्धबाबा’ले उजुरी नदिन पीडितले धम्काएका समेत थिए । परिवारबाट बलियो साथ पाएपछि पीडित महिला उजुरी दिन महानगरीय प्रहरी परिसर काठमाडौं गइन् । तर उनको उजुरी लिन प्रहरीले इन्कार गरिदियो । पीडितले प्रहरीको केन्द्रीय अनुसन्धान ब्युरो (सीआईबी)मा उजुरी गरिन् । सीआईबीले जिल्ला प्रहरी कार्यालय सुनसरीलाई घटनाबारे अनुसन्धान गर्न निर्देशन दिएपछि यो अपराध बाहिरिएको थियो ।

उजुरी परेको थाहा पाए लगत्तै ‘सिद्धबाबा’ उपचारको बहाना बनाउँदै मोरङको विराट नर्सिंग होमको आईसीयूमा बसेका थिए । प्रहरीले उनलाई आईसीयुबाटै पक्राउ गरेको थियो । तर धरौटीमा छुटे । मुद्दा पनि लम्बिँदै गयो र फेरि सुरु घुमीफेरी सुरु अदालतमा पुगेको छ ।

‘सिद्धबाबा’ को तागत : शक्तिकेन्द्र सधैँ दाहिने

प्रकाशित मिति: मंगलबार, जेठ ३, २०७९ २०:३१