९ महिनापछि संसद अवरोध हटाएर सरकारलाई एमालेको तीनबुँदे ध्यानाकर्षण

A+ A A-

संसद अवरोधलाई ९ महिनापछि हटाएर सरकारलाई एमालेले तीनबुँदे ध्यानाकर्षण गराएको छ । एमालेले सरकारलाई लोकतान्त्रिक आचरण प्रस्तुत गर्न, अर्थतन्त्रका नकारात्मक सूचकप्रति गम्भीर हुन र बाह्य सम्बन्धमा देखाएको विचलन सुधार्न ध्यानाकर्षण गराएको हो ।

सरकारले एमालेलाई षड्यन्त्रपूर्वक कमजोर बनाउन खोजेर अलोकतान्त्रिक चरित्र देखाएको एमालेको भनाइ छ । संसदमा बोल्दै सांसद प्रदीप ज्ञवालीले एमालेलाई घेराबन्दी गरेर सरकारले अलोकतान्त्रिक चरित्र प्रस्तुत गरेको बताए । एमालेलाई कमजोर बनाउन पहिलेदेखि नै षड्यन्त्र भए पनि स्थानीय चुनावमा राज्यशक्ति नै दुरुपयोग गरेर सरकार अघि बढेको ज्ञवालीले बताए । 'एमालेलाई कमजोर बनाउन जस्केलाबाट अध्यादेश ल्याइयो । एमालेलाई कमजोर बनाउन विभिन्न अलोकतान्त्रिक गतिविधि भयो तर हामी धुलो टक्टक्याएर फेरि उठ्नेछौँ,' ज्ञवालीले भने ।

निर्वाचनमा सत्तालाई अनुकूल हुनेगरी विभिन्न स्थानमा सेटिङ भएको उनले बताए । 'एमालेको पक्षमा बढी मत खस्दैछ भन्ने थापाएपछि मतदान नै स्थगित गराउने तारतम्य भयो । हाम्रा प्रतिनिधिलाई धम्क्याउने काम भए । हामीले एमाले सखाप हुन्छ भनेको सुन्यौँ । धुलोमा पुरिन्छ भन्ने सुनियो तर हामी सार्वजनिक भएका परिणामले यही भनाइलाई गलत बनाएकाले हामी खुसी छौँ,' उनले भने ।

लोकतान्त्रिक विधिबाट एमाले कमजोर भए पनि त्यसलाई स्वीकार गर्ने ज्ञवालीले बताए । 'हामी सार्वजनिक भएका परिणाम स्वीकार गर्छौं । लोकतान्त्रिक तरिकाले योभन्दा पनि कमजोर हुनुपर्छ भने हामी तयार छौँ तर सत्ता गठबन्धनको चरित्रले लोकतन्त्रलाई थप कमजोर बनाउँछ,' ज्ञवालीले भने ।

एमालेले अर्थतन्त्रका नकारात्मक सूचकप्रति गम्भीर हुन पनि सरकारको ध्यानाकर्षण गराएको छ । अर्थतन्त्रका सूचक नकारात्मक अवस्थामा रहँदा सरकार त्यसलाई सुधार्नभन्दा नियामक निकायलाई कमजोर बनाउन क्रियाशील रहेको उनले बताए । अर्थतन्त्रका नकारात्मक सूचकलाई सकारात्मक बनाउन संसदमा आवाज उठाउन निजीक्षेत्रले एमालेलाई आग्रह गरेकाले त्यसका निम्ति पनि आफूहरूले संसद खुलाएको उनले बताए । 'विदेशी मुद्रा सञ्चिति निकै कम छ । अर्थतन्त्रका नकारात्मक सूचक बढिरहेका छन् । यसलाई सुधार्नभन्दा सरकार कालो धनलाई साबुनपानीले धोएर चोख्याउनमा लागिपर्‍यो,' ज्ञवालीले भने ।

अन्तर्राष्ट्रिय जगत्‌मा मुलुकको विश्वसनीयता गुम्न नदिन अर्थतन्त्रलाई सबल बनाउने विषयमा एमालेले संसदमा सशक्त आवाज उठाउने उनले बताए । 'अर्थतन्त्र सुधार्ने विषयमा सरकारले नसुने पनि सरकारलाई यसका असर सुनाउन हामीले संसद खुलाएका हौँ,' उनले भने ।

सत्ताको सेटिङमा व्यस्त सरकारलाई यस्ता विषयले नछोएको एमालेले बताएको छ । 'अर्थतन्त्रका कारण सिर्जित समस्याले हामीलाई पिन्च गरेको छ । त्यसमा छलफल गराउन हामीले अवरोध खुलाएका हौँ । सत्ताको सेटिङमा व्यवस्थाहरूलाई यो कुराले छुँदैन पनि होला,' उनले भने ।

एमालेले नेपालको बाह्य सम्बन्धमा पनि गम्भीर विचलन देखिएको भन्दै त्यसमा समेत सरकारको ध्यानाकर्षण गराएको छ । विकसित भूराजनीतिप्रति सरकार गम्भीर नदेखिएको भन्दै ज्ञवालीले कूटनीतिक अवयव धर्मराउँदै गएको बताए । 'मुलुकको कूटनीति लिड गर्नुपर्ने प्रधानमन्त्री र परराष्ट्रमन्त्री कुन अवस्थामा हुनुहुन्छ, हामीले देखेका छौँ । तपाईंहरू फरक दलको भए पनि राष्ट्रको प्रतिनिधित्व गर्दा हामी सबैको हो । त्यसैले गम्भीरतापूर्वक सोच्नुस्,' उनले भने ।

संसदमा एमालेप्रति विभेद भएकाले त्यसका विरुद्धमा निरन्तर विरोध गरे पनि चुनावपछि नयाँ घटनाक्रम विकसित भएकाले एमालेले संघर्षलाई नयाँ ढंगले अघि बढाउने ज्ञवालीले बताए । 'अनेकौँ विषयमा २४ घण्टाभित्रै फैसला गर्ने अदालतले संवैधानिक अंग नै ठप्प हुने विषयमा फैसला गरेन । तर, पार्टी विभाजनका कारकहरूलाई जनताले उचित ढंगले फैसला दिएकाले त्यसलाई शिरोधार्य गर्दै हामी अघि बढ्छौँ,' उनले भने ।

एमाले विभाजनमा सभामुख अग्नि सापकोटा जोडिनु र अदालत सहयोगी बनेको प्रति एमालेले विरोध जनाएको उनले बताए । त्यसविरुद्धको विरोध एमालेले नयाँ ढंगले अघि बढाउने उनको भनाइ छ ।

प्रकाशित मिति: मंगलबार, जेठ ३, २०७९ १८:५६