एनसीएचएल–ईसीसी र एनसीएचएल–आईपीएस प्रणालीको कारोबार समय सीमामा फेरबदल

A+ A A-

नेपाल राष्ट्र बैंकले हालै आरटीजीएसको समय सीमा थप गरेपछि एनसीएचएल–ईसीसी र एनसीएचएल–आईपीएस प्रणालीको कारोबार समय सीमा फेरबदल गरिएको नेपाल क्लियरिङ हाउस (एनसीएचएल)ले जनाएको छ ।

साथै, शनिबार र आइतबार हुने सार्वजनिक बिदालाई समेत मध्यनजर गरी ती प्रणालीहरू शुक्रबारसमेत पूर्ण रूपमा सञ्चालनमा रहने गरी विद्यमान सत्रहरूको समय संशोधन तथा थप नयाँ सत्रहरूको व्यवस्था गरी ३ जेठदेखि लागू हुने गरी प्रणालीहरूको समय सीमा परिवर्तन गरिएको हो ।

उक्त व्यवस्थाअनुसार एनसीएचएल–ईसीसी प्रणालीको रेगुलर सत्रमा दिउँसो ३ः०० बजेसम्म र एक्सप्रेस सत्रमा दिउँसो ४ः०० बजेसम्म पेस हुन आएमा चेकहरू सोही दिनमा नै राफसाफ भई अन्तिम सेटलमेन्ट ५ः१५ पछि हुने व्यवस्था गरिएको छ ।

त्यस्तै, २०–३० करोड रुपैयाँसम्मको चेक राफसाफका लागि हाई भ्यालु चेक क्लियरिङको सत्र पनि थप गरी दिउँसो ३ः०० बजेसम्म चेक पेस गर्न मिल्ने व्यवस्था गरिएको छ ।

त्यसैगरी, एनसीएचएल–आईपीएस प्रणालीमा साँझको ५ः०० बजेसम्म प्राप्त भएका भुक्तानी आदेशहरू सोही दिनमा (T+0) मा नै राफसाफ हुने व्यवस्था गरिएको छ । साथै, बिहान ९ः०० बजेदेखि ५ः०० बजेसम्म प्राप्त भुक्तानी आदेशहरू हरेक २–२ घण्टामा नै राफसाफ हुने गरी छोटो अवधिका सत्रहरू पनि थप गरिएका छन् ।

हरेक कार्यदिनको ५ः३० बजेसम्म प्राप्त भएका बैंकको आफ्नो ट्रेजरी फण्डिङसम्बन्धी भुक्तानी आदेशहरूसमेत सोही दिनमा फर्छ्योट हुने व्यवस्था गरिएको छ । तोकिएको समय सीमापश्चात् प्रणालीमा पेस हुन आएका कारोबारहरू अर्को कार्य दिनमा राफसाफ हुने व्यवस्था यथावत् रहनेछ भने जाडो महिनामा (कात्तिक १६ गते देखि माघ १५ गतेसम्म) आरटीजीएसको समय सीमासँग मिल्ने गरी एनसीएचएल–आईपीएस प्रणालीको समय सीमा १ घण्टाका लागि कम हुने व्यवस्था गरिएको छ ।

त्यसैगरी, रिटेल पेमेन्ट स्वीचमाफर्त हुने रियल टाइम भुक्तानीलाई थप टेवा पुर्‍याउन बैंकहरूबीच हुने सेटलमेन्टलाई हरेक १ घण्टामा साँझको ६ बजेसम्म गर्ने व्यवस्था गरिएको छ । ग्राहकको खातामा भने उक्त कारोबार रियल टाइममा नै हुने व्यवस्था यथावत् रहनेछ ।

प्रकाशित मिति: आइतबार, जेठ १, २०७९ १७:१८