मन्दिरका लागि छुट्याइएकाे १० लाखमा ३ लाख गायब !

A+ A A-

जानकी जन्मोत्सव मनाउन प्रदेश २ सरकारले जानकी मन्दिरलाई दिएको १० लाख रूपैयाँमा ३ लाख गायब भएकाे छ । १० लाख दिने भनेकाे प्रदेश सरकारले दिने बेलामा जम्मा ७ लाख रूपैयाँको मात्र चेक थमाएकाे हाे ।

प्रदेश २ सरकारले जानकी नवमीका लागि विनियाेजित बजेट उद्योग वन, पर्यटन मन्त्रालयको जिम्मामा दिएकाे थियाे । तर, रकम लिन जाँदा पर्यटन मन्त्रालयले ७ लाखको मात्र चेक थमाएको जानकी मन्दिरका उत्तराधिकारी महन्थ रामरोशन दास वैष्णवले दिए ।

सहयोग राशि १० लाखको थियो, ३ लाख कुन शीर्षकमा खर्च भयो भनेर सोध्दा ३ लाख पानी र फ्रुटी बाँड्नमा खर्च भएको जवाफ आयाे, वैष्णवले भने ।

धर्म र आस्थाका नाउँमा आएको बजेटमा पनि अनियमितता भएकाे उनले बताए ।

यता, मन्त्रालयका अधिकारीले जानकी नवमीका लागि छुट्याइएकाे १० लाख रूपैयाँ जानकी मन्दिर र प्रदेश सरकारले बेग्लाबेग्लै खर्च गरेकोले रकम कम भएको बताएका छन् ।

मन्दिरका लागि आएको कुल बजेटमा प्रदेश सरकारले २ लाख बराबरको पानी र फ्रुटी बाँडेकाले २ लाख घट्न गई ८ लाखमा झरेको हाे, एक अधिकारीले भने, बाँकी ८ लाखमा १३ प्रतिशत भ्याट र डेढ प्रतिशत आन्तरिक भ्याट कटाैती गर्दा ७ लाख रकम मन्दिरलाई भुक्तानी गरिएकाे छ ।

यस सम्बन्धमा पर्यटन राज्यमन्त्री सुरेश मण्डलसँग कुरा गर्दा प्रदेश सरकारले गरेको खर्च रकमलाई अन्य शीर्षकबाट मिलाउन सकिने भए पनि नमिलाइएकोले तोकिएको रकममा तलमाथि भएको बताए ।

जानकी नवमी मनाउन मन्दिरलाई ठूलो रकम खर्च भएको र दाताबाट नै रकम फर्छ्याेट गर्नुपर्ने भएकोले सहयोग रकममा प्रदेश सरकारले कटौती गरेपछि समस्या भएको मन्दिरका उत्तराधिकार दास वैष्णवले बताए ।

प्रकाशित मिति: बिहीबार, असार २६, २०७६ २३:१७