भोट हाल्न तीन दिन बाँकी, कांग्रेसमाथि अझै अविश्वास गर्दै प्रचण्ड-माधव

A+ A A-

स्थानीय चुनावमा मतदानका लागि तीन दिन बाँकी हुँदा सत्ता गठबन्धनमा रहेका माओवादी केन्द्र र एकीकृत समाजवादीले कांग्रेसप्रति अझै अविश्वास प्रकट गरेका छन् । चुनावीसभालाई सम्बोधन गर्न पुगेका माओवादी केन्द्रका अध्यक्ष पुष्पकमल दाहाल प्रचण्ड र एकीकृत समाजवादीका अध्यक्ष माधवकुमार नेपालले कांग्रेसको अझै भरोसा नभएको अभिव्यक्ति दिएका हुन् ।

कैलालीको चुनावीसभामा माओवादी केन्द्रका अध्यक्ष पुष्पकमल दाहाल प्रचण्डले कांग्रेसबाट अझै धोका हुन सक्ने सम्भावना रहेको बताउँदै त्यस्तो षड्यन्त्र स्वीकार्य नहुने चेतावनी दिए । यस्तै, एकीकृत समाजवादीका अध्यक्ष नेपालले कांग्रेसले अझै अहंकार देखाएको भन्दै गठबन्धनविरोधी गतिविधि रोक्न ध्यानाकर्षण गराए ।

माओवादी केन्द्रका अध्यक्ष प्रचण्डले कांग्रेसको बेइमानी र षड्यन्त्र मान्य नहुने बताए । गठबन्धनको भावनाविपरीत कांग्रेसको उम्मेदवारी परेको भन्दै आक्रोशित प्रचण्डले कैलालीको कलौरी गाउँपालिकाको चुनावीसभामा भने, 'बेइमानी र षड्यन्त्र स्वीकार्य हुँदैन ।' कांग्रेसले यहाँ पनि गठबन्धनको सहमतिविपरीत उम्मेदवारी दिएको छ ।

२२ वैशाखमा भरतपुरको चुनावीसभामा पनि प्रचण्डले कांग्रेसका कार्यकर्ताले हँसिया हथौडामा मत नहाले मुलुक दुर्घटनामा फस्ने चेतावनी दिएका थिए । 'हँसिया हथौडा र रुखबीचको सहकार्य विगतदेखिकै हो । पञ्चायतविरुद्धको संघर्षमा सहकार्य गर्‍यौँ, ०६२/६३ को जनआन्दोलनमा सहकार्य गरेका हौँ, संविधान निर्माणमा पनि सहकार्य गरेका शक्ति हौँ । यो कुरालाई हेक्का राख्न जरुरी छ,' प्रचण्डले भनेका थिए, 'कतिपय कांग्रेसका साथीहरू हँसिया हथौडामा मत हाल्न सकिँदैन भनिरहनुभएको छ । त्यस्तो भयो भने मुलुक दुर्घटनातर्फ जान्छ ।'

कांग्रेसका बागी उम्मेदवार धेरै ठाउँमा रहेको र कतिपय कांग्रेस नेता गठबन्धनको पक्षमा नरहेकाले सचेत गराउन प्रचण्डले यस्तो अभिव्यक्ति दिएको माओवादी केन्द्रका नेता हरिबोल गजुरेल बताउँछन् । 'कांग्रेसका समर्थकहरू नै धेरै बागी छन् र कतिपय कांग्रेसका शीर्ष नेताहरू नै गठबन्धनप्रति सकारात्मक नरहेकाले अध्यक्षले कांग्रेसलाई खबरदारी गराउन यसो भन्नुभएको होला,' गजुरेलले भने ।

सत्ता गठबन्धनको भागवण्डामा एकीकृत समाजवादीले पोखरा महानगरपालिकामा मेयर पाएको छ । आफूले मेयर नपाएका कारण रुष्ट कांग्रेस कार्यकर्तालाई गठबन्धनको पक्षमा मतदानका लागि आग्रह नगरी अध्यक्ष नेपालले अहंकार नदेखाउन चेतावनी दिए । सबैको शक्तिलाई कांग्रेसले स्वीकार गर्नुपर्ने नेपालको भनाइ थियो ।

'हामी त्यत्तिकै उम्रिएर आएका होइनौँ । विभिन्न आन्दोलनको नेतृत्व गरेको अनुभव हामीसँग छ । दम्भकै कारण ओली सिद्धिए । यस्तै दम्भ देखाउनुभयो भने तपाईंहरू पनि सिद्धिनुहोला । सबैको शक्तिको सम्मान गर्न सिक्नुस्,' नेपालले भने ।

एकीकृत समाजवादीका अध्यक्ष नेपाल कतिपय स्थानमा आफ्नो पार्टीका मेयर, उपमेयर र प्रमुख, उपप्रमुख हुँदा पनि आफ्नो पार्टीलाई कांग्रेसले सम्मानजनक स्थान नदिएको भन्दै कांग्रेसप्रति असन्तुष्ट छन् । कांग्रेसभित्रै बढी विद्रोह भएका कारण नेपाल झनै सशंकित बनेका छन् । 'देशभरको चुनावीसभामा जाँदा देखेको स्थितिका कारण अध्यक्षले अविश्वास प्रकट गर्नुभएको हुन सक्छ । विस्तृत कारण उहाँबाटै नै बुझ्नुपर्छ,' समाजवादीका सचिव जीवनराम श्रेष्ठले भने ।

सत्ता गठबन्धनले ७ सय स्थानीय तहमध्ये २ सय ९ मा मात्रै तालमेल गरेका छन् । तीमध्ये १ सय २६ गाउँपालिका छन् भने ७३ नगरपालिका छन् । परिणाम सुखद नभए गठबन्धनमा भत्किन सक्ने र चेतावनी सत्ता गठबन्धनका नेताहरूले दिइरहेका छन् । स्थानीय तहको तालमेल सफल नभए फेरि वाम गठबन्धन हुन सक्ने सम्भावना रहेकाले प्रधानमन्त्रीसमेत रहेका कांग्रेस सभापति शेरबहादुर देउवा दबाबमा छन् ।

सत्ता गठबन्धन पराजित भए एमाले शक्तिशाली हुने र फेरि संसद विघटन हुने देउवाले बताएका छन् । धनगढीको चुनावी सभामा देउवाले भनेका छन्, 'एमालेले जितेको खण्डमा संसद, प्रदेश, स्थानीय तह भंग गर्न सक्छन् । त्यसैले कांग्रेस र तालमेल भएका ठाउँमा गठबन्धनलाई जिताउनुहोस् ।’

प्रकाशित मिति: सोमबार, वैशाख २६, २०७९ १८:५८