केपी ओली: आयोगप्रति असन्तुष्ट, कांग्रेसप्रति आक्रामक र गठबन्धन टुट्नेमा आशावादी

केपी ओली: आयोगप्रति असन्तुष्ट, कांग्रेसप्रति आक्रामक र गठबन्धन टुट्नेमा आशावादी

A+ A A-

निर्वाचन आयोगप्रति असन्तुष्टि र कांग्रेसप्रति आक्रोश पोखेका एमाले अध्यक्ष केपी शर्मा ओली सत्ता गठबन्धन भत्किनेमा आशावादी देखिएका छन् ।

पार्टी केन्द्रीय कार्यालय च्यासलमा आइतबार आयोजित पत्रकार सम्मेलनमा अध्यक्ष ओलीले कांग्रेसको भन्दा एमालेको क्रय शक्ति बढी रहेको बताउँदै १७ असारपछि गठबन्धन भत्किनेमा आफू आशावादी रहेको बताएका हुन् ।

१७ असारपछि गठबन्धन टुट्ने दाबी गरिरहेका ओलीले त्यसको पटाक्षेप ३० वैशाखदेखि नै सुरु हुने दाबी गरे । 'गठबन्धनका निम्ति ३० वैशाख नै सबैभन्दा ठूलो खड्गो हो । त्यही समयमा नै उहाँहरूको ढाँड भाँचिनेवाला छ,' उनले भने, 'ग्रह हेर्ने ज्योतिषले मात्रै होइन, राजनीतिक ज्योतिषले पनि महासंकट देखेका छन् ।'

कांग्रेसभन्दा एमालेको क्रयशक्ति धेरै रहेको दाबी गर्दै ओलीले माओवादीलाई धेरै सिट दिएर भए पनि गठबन्धन टुटाउन सकिने दाबी गरे । माओवादीप्रति इंगित गर्दै उनले भने, 'बिरालोलाई जसले धेरै दूधभात दिन्छ उसकैकहाँ जाने हो । कांग्रेसको भन्दा हाम्रो क्रय शक्ति ज्यादा छ,' उनले भने ।

माओवादीसँग पनि संवाद भइरहेको संकेत ओलीले गरेका छन् । भरतपुरको चुनावीसभामा गत साता सम्बोधन गर्दै माओवादी केन्द्रका अध्यक्ष पुष्पकमल दाहाल प्रचण्डले एमाले माओवादीसँग निरन्तर संवादमा रहेको बताएका थिए ।

ओलीले निर्वाचन आयोग दलीय प्रभावमा चलेको भन्दै असन्तुष्टि जनाए । निर्वाचन आयोगले राजनीतिक रूपमा पूर्वाग्रही भएर कार्यसम्पादन गरिरहेको ओलीको आरोप छ । आयोगले सत्ता गठबन्धनबाहेकका दलसँग कुनै परामर्श नै नगरी आचारसंहिता र मतपत्रको रंग परिवर्तन गर्ने निर्णय गरेको ओलीको भनाइ छ । 'निर्वाचन आयोगले गठबन्धनबाहेकसँग परामर्श नगरेर अरुले पनि मान्नुपर्ने आचारसंहिता ल्यायो । हस्ताक्षर गर्नुपर्ने तहमा प्रक्रिया नै पुर्‍याएन । हामीले जारी गर्‍यौँ तपाईंहरूले मान्ननुपर्छ भनेपछि एमालेले हस्ताक्षर गरेन,' ओलीले भने ।

मतपत्रको रंग परिवर्तन गर्ने विषय मुद्दा मामिला गर्नुपर्ने किसिमको भएको उनको भनाइ छ । 'कांग्रेससँग परामर्श लिएर रुखलाई हरियो बनाउन सूर्यलाई पनि हरियो बनाइयो । यो मुद्दा मामिलाको विषय भए पनि एमालेले अहिले त्यसो गरेन,' ओलीले भने, 'हरियो रुखलाई हरियो पार्न रातो सूर्यलाई हरियो बनाउने कुरा स्वच्छ होइन, के आयोगका निम्ति राजनीतिक दल भनेको कांग्रेसमात्रै हो ?'

निर्वाचन आयोगले एउटा राजनीतिक दलले अर्को चुनाव चिह्न लिएर प्रचार गर्न नपाइने भने पनि सत्ता गठबन्धन दललाई छुट दिएको बताए । 'उम्मेदवारी दर्ताको सवालमा गठबन्धनलाई चिन्दैन भनेको निर्वाचन आयोगले चुनाव प्रचार-प्रसारका बेलामा गठबन्धन चिनेको हो । यो गलत भइरहेको छ, आयोग यस्ता कुरामा मुछिनु हुँदैन,' उनले भने ।

निर्वाचन आयोगको कार्यशैलीप्रति ओलीले असन्तुष्टि व्यक्त गरेपछि उनिमाथि आयुक्तहरू आफैँले नियुक्त गरेको विषयमा प्रश्न उठेको थियो र आयोगप्रति विभिन्न आक्षेप लगाएका ओलीले आयुक्त नियुक्तिको अपजस भने लिएनन् । 'आयुक्तहरू नियुक्ति गर्दा नियुक्तिपत्र सहजै हातमा राखिदिने होइन । संवैधानिक परिषद्‌मा विपक्षी दल पनि हुन्छन् । मैले नियुक्ति गर्दा राम्रो काम गर्लान् भनेरै गरेको हुँ । उनीहरूको योग्यताको विषयमा मलाई भन्दा पनि उनीहरूसँगै प्रश्न गर्नुस्, ' ओलीले भने ।

आयोगप्रति चरम असन्तुष्टि व्यक्त गरेका ओलीले कांग्रेसप्रति भने आक्रोश पोखेका छन् । दुई पटक असंवैधानिक तरिकाले संसद विघटन गरेका ओलीले संविधानको प्रभावकारी कार्यान्वयनमा अघि बढिरहँदा कांग्रेसले आफूमाथि षड्यन्त्र गरेको टिप्पणी गरेका छन् ।

आफू नेतृत्वको सरकार सुशासन, सामाजिक परिवर्तन र रुपान्तरणतर्फ अघि बढिरहेको अवस्थामा मुलुकलाई पश्चगमनतर्फ धकेल्न कांग्रेसले षड्यन्त्र गरेको ओलीको आरोप छ। 'जनताप्रतिको कर्तव्यबोधमा कमजोर रहेका शक्तिलाई साथमा लिएर कांग्रेसले देश हितका सन्दर्भमा उल्टो बाटो समात्यो । संसदीय मूल्य मान्यतालाई नै कुल्चियो । संसदलाई बन्धक बनायो । स्वतन्त्र न्यायापालिकामाथि आघात पुर्‍यायो,' उनले भने ।

बहुदलीय व्यवस्थापछि कांग्रेस २७ वर्ष सरकारमा बसे पनि मुलुकको विकासमा भन्दा राजनीतिक विकृतिमा बढी जोड लगाएको ओलीको आरोप छ । आफ्नो सरकारको नीति कार्यक्रम आफैँले फेल गराउने, सांसदलाई विदेश लगेर बन्धक बनाउने जस्ता विकृतिमा लागेको ओलीको आरोप छ ।

संसदबाट प्रधानमन्त्रीको पद त्याग गरेर राजाबाट नियुक्त प्रधानमन्त्री बनेर जनतालाई कांग्रेसले धोका दिएको उनको टिप्पणी छ । कांग्रेसको सरकार सञ्चालनबारे ओलीको टिप्पणी छ, 'देश, जनता र राजनीतिलाई चरम अन्धकारमा धकेल्न सशस्त्र द्वन्द्वलाई मार्गप्रशस्त गर्ने, निजामती सेवा नै खल्बलिने गरी कर्मचारीलाई बर्खास्त गर्ने, प्रहरी, प्रशासन र सम्पूर्ण राज्य संयन्त्रको दुरुपयोग गरी सत्ताभोग गर्नेलगायतका देश र जनताविरोधी कामहरू कांग्रेसको सरकारले गरेको इतिहास छ ।'

कांग्रेसले देशलाई गरिबी, विपन्नता, अभाव र अनिश्यचको दुष्चक्रमा राखेर जनतामाथि शासन गर्न चाहेको ओलीको आरोप छ ।

प्रकाशित मिति: आइतबार, वैशाख २५, २०७९ १४:२६