चुनावीसभाबाट सन्देश: गठबन्धनको आगामी सहकार्यको परीक्षण भरतपुरबाट

A+ A A-

चितवनमा चुनावीसभामार्फत पाँच दलका नेताहरूले सत्ता गठबन्धनबीच दीर्घकालीन सहकार्यको परीक्षण भरतपुरबाट हुने सन्देश दिएका छन् । बिहीबार सभालाई सम्बोधन गर्न पुगेका नेताहरूले आसन्न संसदीय निर्वाचनसम्मै गठबन्धन कायम राख्नुपर्नेमा जोड दिँदै भरतपुरमा गठबन्धनका उम्मेदवार विजयी भएमात्रै त्यो सम्भावना रहने बताएका हुन् ।

सभालाई सम्बोधन गर्दै प्रधानमन्त्री शेरबहादुर देउवाले सत्ता गठबन्धन भत्काउन अनेकौँ षड्यन्त्र भइरहेको बताएका छन् । सत्ता गठबन्धन भत्किए मुलुक दुर्घटनातर्फ जाने भन्दै त्यस्ता षड्यन्त्रलाई चितवनले असफल पार्नुपर्ने बताए । ‘यो गठबन्धन अझै धेरै टिक्नुपर्छ । गठबन्धन भत्काउन चितवनमा पनि षड्यन्त्र भइरहेका छन् । त्यस्ता षड्यन्त्रलाई चितवनले सफल हुन दिनुहुँदैन,’ उनले भने ।

देउवाले गठबन्धनकी उम्मेदवार रेनु दाहाललाई जिताउनु कांग्रेसको कर्तव्य रहेको बताए । रेनुले चितवनको पूर्वाधार विकासमा गरेको कामले समेत उनी नै उम्मेदवारको योग्य पात्र रहेको देउवाको भनाइ थियो । ‘महानगरमा बेरुजु छैन । जताततै सडक छ, जनताको जग्गाको भाउ बढेको छ । जनतालाई फाइदा भएको छ नि । हाम्रा साथीहरूले राम्रो काम गर्नुभयो भने अर्को पटक उहाँहरूलाई मौका दिउला यसपटक रेनुलाई जिताउनु तपाईंहरूको कर्तव्य हो,’ उनले भने ।

यस्तै, कांग्रेस वरिष्ठ नेता रामचन्द्र पौडेलले पनि प्रतिगमनविरुद्ध बनेको गठबन्धनलाई बलियो बनाउन भरतपुरमा दाहाललाई जिताउनैपर्ने बताए । कांग्रेसको मुख्य प्रतिस्पर्धी एमाले रहेकाले माओवादीसँग दीर्घकालीन सहकार्यका निम्ति भरतपुरमा गठबन्धनका उम्मेदवारले जित्नैपर्ने उनको भनाइ थियो । ‘हाम्रो प्रतिस्पर्धा केपी ओलीसँग हो, प्रचण्डजीसँग होइन । त्यसैले साथीहरूले बुझ्नुपर्‍यो प्रचण्डजीसँग सहकार्य गर्ने हो,’ उनले भने ।

भरतपुरमा बागी उठेका जगन्नाथ पौडेल कुनै तर्कको आधारमा नभएर भावनात्मक उत्तेजनामा उम्मेदवार बनेको पौडेलको भनाइ थियो । संविधान र मुलुकको विकासलाई सुदृढ बनाउन सत्ता गठबन्धनबीच दीर्घकालीन सहकार्य आवश्यक रहेको पौडेलको भनाइ थियो ।

चुनावीसभालाई सम्बोधन गर्दै माओवादी केन्द्रका अध्यक्ष पुष्पकमल दाहाल प्रचण्डले रेनु दाहाल र चित्रसेन अधिकारीले चुनाव जितेमात्रै गठबन्धन लामो समयसम्म जाने बताए । ‘रेनु दाहाल र चित्रसेन अधिकारीले चुनाव जिते म निकै उत्साही हुनेछु र यो गठबन्धन १०-२० वर्षसम्मै लानेछु,’ प्रचण्डले सभामा भनेका छन् ।

कांग्रेसका कार्यकर्ताले हँसिया हथौडामा मत हाल्न आनाकानी गरेको प्रसंग उप्काउँदै प्रचण्डले रुख र हँसिया हथौठाबीच विगतदेखि नै सहकार्य हुँदै आएको बताए । ‘पञ्चायतविरुद्ध लड्न सहकार्य, शान्ति सम्झौता र संविधान निर्माणदेखि संविधान बचाउन हँसिया हथौडा र रुखबीचको सहकार्य के गलत थियो, यो कुरा साथीहरूले बुझ्नुपर्‍यो,’ उनले भने ।

गठबन्धन भत्काउन एमालेबाट निरन्तर प्रस्ताव आए पनि आफूले अस्वीकार गरेको उनको भनाइ छ । ‘एमालेका साथीहरूले सहकार्यका निम्ति बारम्बार प्रयास गर्नुभएको छ, मैले दुई पटक गल्ती गर्दिनँ भनेर इन्कार गरेको छु,’ प्रचण्डले भने ।

सभामा एकीकृत समाजवादीका अध्यक्ष माधवकुमार नेपालले चितवनमा कांग्रेसबाट गठबन्धनलाई अहसयोगको स्थिति देखापरेको भन्दै त्यसलाई व्यवस्थापन गर्न शीर्ष नेता अझै सक्रिय हुनुपर्ने बताए । भरतपुरसहित अन्य स्थानमा गठबन्धन बलियो भएमात्रै आगामी दिनमा बलियो सहकार्य हुने नेपालको भनाइ थियो ।

‘तालमेल नमिलेका स्थानमा मिलाउन र मिलेका ठाउँमा नतिजालाई सफल बनाउन शीर्ष नेताहरू अझै खटिनुपर्ने देखिन्छ । म गठबन्धनका नेताहरूलाई भन्न चाहन्छु, नतिजा गठबन्धनको पक्षमा ल्याउन लागि परौँ,’ उनले भने । संसदीय निर्वाचनमा समेत गठबन्धन कायम राख्नुपर्ने भन्दै उनले हालको निर्वाचनमा गठबन्धनका उम्मेदवारलाई विजयी गराउनैपर्ने बताए ।

‘हामी संसदीय निर्वाचनमा समेत बलियो बनेर जानुपर्नेछ । एक्लै जाँदा कहिल्यै पनि खोजेको जस्तो वा चाहेको जस्तो परिणाम आउँदैन, त्यसैले परिणाम गठबन्धनको पक्षमा ल्याउन सक्रिय बनौँ,’ उनले भने ।

नेता नेपालले भरतपुरमा दाहाललाई जिताउन आफ्ना कार्यकर्तालाई निर्देशन समेत दिएका छन् । सभामा पुगेका जनता समाजवादी पार्टीका नेता राजेन्द्र श्रेष्ठले पनि प्रतिगमनविरुद्ध लडेको गठबन्धनबीच दीर्घकालीन सहकार्य आवश्यक रहेको बताए ।

‘केपी ओलीले संविधान, लोकतन्त्र र धर्मनिरपेक्षता जस्ता उपलब्धिमाथि आक्रमण गरे । संविधान र त्यसका उपलब्धि जोगाउन हामीले गठबन्धन गर्‍यौँ । अब यसलाई दीर्घकालीन रूपमा अघि बढाउन जनताले गठबन्धनका उम्मेदवारलाई जिताउनुपर्छ,’ श्रेष्ठले भने ।

महानगरपालिकामा सत्ता गठबन्धनकी उम्मेदवार रेनु दाहालले चितवनको पूर्वाधार विकासमा राम्रो भूमिका निर्वाह गरेकाले उनलाई विजयी गराउनुपर्ने श्रेष्ठको भनाइ छ ।

प्रकाशित मिति: बिहीबार, वैशाख २२, २०७९ १७:४३