अलमुताइरीमाथि खेलाडीको चर्को असन्तुष्टि, निजी जीवनमा समेत अप्ठ्यारो पारेको आरोप

अलमुताइरीमाथि खेलाडीको चर्को असन्तुष्टि, निजी जीवनमा समेत अप्ठ्यारो पारेको आरोप

A+ A A-

‘हामीमाथि फुटबल ग्राउण्डमा मात्रै होइन । आउटडोर हुँदा पनि शोषण भएको छ । मानसिक तनाव दिइएको छ । व्यक्तिगत जीवन नै अप्ठ्यारोमा परिएको छ । हामीले घुम्न जाँदा कस्तो लुगा लगाइयो ? कोसँग घुम्म गयो ? कपाल कस्तो थियो ? यस्ता कुरामा पनि दबाब दिइएको छ,’ यो राष्ट्रिय फुटबल टिमका चर्चित खेलाडी रोहित चन्दलगायत १० जनाले नेपाली राष्ट्रिय फुटबल टिमका प्रशिक्षक अब्दुल्लाह अलमुताइरीमाथि सार्वजनिक रूपमै लगाएको आरोप हो ।

सामाजिक सञ्जालमा जबर्जस्ती आफ्नो भिडियो शेयर गर्न लगाउनेदेखि भनेको नमाने जुनसुकै बेला टिमबाट निकाल्नेसम्मको धम्की अलमुताइरीले दिने गरेको आरोप खेलाडीको छ ।

एसियन कप छनोटको बन्द प्रशिक्षणमा रहेका खेलाडी र प्रशिक्षक अलमुताइरीबीच विवाद बढ्दै गएपछि खेलाडीहरूले प्रशिक्षण छाडेका छन् । प्रशिक्षण छाडेका खेलाडीहरू रोहित चन्द, अन्जन विष्ट, विशाल श्रेष्ठ, विशाल राई, विमल घर्ती मगर, अनन्त तामाङ, सुमन लामा, तेज तामाङ, सुजल श्रेष्ठ र दिनेश राजवंशीले बिहीबार पत्रकार सम्मेलन गरेरै सो आरोप लगाएका हुन् ।

बन्द प्रशिक्षणको क्रममा खेलाडीको बस्ने र खाने व्यवस्थापनको विषयमा टिमको नेतृत्व गरिरहेका रोहितले प्रशिक्षक अलमुताइरीसँग जिज्ञासा राख्दा अलमुताइरी रोहितमाथि खनिएको खेलाडीको आरोप छ ।

पत्रकार सम्मेलनमा अन्जन विष्टले भनेका थिए, ‘हामीले सामान्य खाने बस्ने होटलको व्यवस्थापन राम्रो हुन पर्‍यो । लग्जरियस होटल मागेको पनि होइन । तर, खेलाडी बस्दा समयमा खाना खुवाउने होटल, सुत्ने व्यवस्था राम्रो भएको होटल त चाहियो भन्दा प्रशिक्षक अलमुताइरीले रोहित दाइलाई क्याम्प छोड्नु भन्नुभयो । त्यो तरिका ठिक होइन ।’

रोहितले सबै खेलाडीको भावना र आफूँहरूकै सल्लाहमा उक्त कुरा राखेको विष्टको भनाइ थियो । खेलाडीमाथि प्रशिक्षक अलमुताइरीको दबाबकै कारण १० जना खेलाडीले क्याम्प नै छोड्नुपरेको उनीहरूको गुनासो थियो ।

उक्त विषयमा एन्फासँग सत्यतथ्य छानबिनको माग राख्दा पनि सुनुवाइ नभएको खेलाडीको गुनासो छ । खेलाडीहरूले यो घटनाको छानबिन नहुँदासम्म र टिमको प्रशिक्षकमा अलमुताइरी रहँदासम्म राष्ट्रिय टिममा फर्किनसमेत असहज हुने बताएका छन् ।

राष्ट्रिय टिमको प्रशिक्षकमा नियुक्त भएदेखि नै अलमुताइरी समय–सयममा विवादमा पर्दै आएका छन् । केही समयअघि मात्रै एसियन कपको तयारीबारे आफैँले राखेका पत्रकार सम्मेलनमा खेलाडीले बोल्दाबोल्दै अलमुताइरीले उठाएर बाहिर पठाएका थिए ।

त्यसअघि गत साउनमा पनि अलमुताइरीले एन्फाका वरिष्ठ उपाध्यक्ष पंकजविक्रम नेम्वाङको कारण आफूले राजीनामा दिन बाध्य भएको भन्दै विवादित स्टाटस सामाजिक सञ्जाल फेसबुकमा राखेका थिए । एन्फासँगको छलफलपछि उनको राजीनामा रोकिएको थियो ।

एसियन कपका लागि किरणकुमार लिम्बु (गोलकिपर), दीप कार्की (गोलकिपर), विशाल श्रेष्ठ (गोलकिपर), रोहित चन्द, सन्तोष तामाङ, सुजल श्रेष्ठ, सुमन अर्याल, सुमन लामा, सुनील बल, सुरज ठकुरी, तेज तमाङ, विशाल राई, मनिष डाँगी, नवयुग श्रेष्ठ, पुजन उपरकोटी, विमल घर्तिमगर, दर्शन गुरुङ, देवेन्द्र तामाङ, अनन्त तामाङ, अन्जन विष्ट, एरिक विष्ट, आयुष घलान, विकास खवास, दिनेश राजवंशी, गौतम श्रेष्ठ गरी २५ जना खेलाडी छनाेटमा परेका थिए ।

खेलहरू कुवेतमा २५ जेठदेखि ३१ सम्म हुँदैछ ।

सम्बन्धित समाचार-

प्रकाशित मिति: बिहीबार, वैशाख १५, २०७९ २०:५३