खेलाडीलाई एन्फा अध्यक्ष कर्माले भने- चुनाव छ, प्रशिक्षकलाई केही गर्न सक्दिनँ

खेलाडीलाई एन्फा अध्यक्ष कर्माले भने- चुनाव छ, प्रशिक्षकलाई केही गर्न सक्दिनँ

A+ A A-

आगामी ६ असारमा अखिल नेपाल फुटबल संघ (एन्फा) को चुनाव हुँदैछ । जसका कारण एन्फा निकै व्यस्त छ । खेलकुद क्षेत्रमा पनि यो चर्चाको विषय बनेको छ । केन्द्र, जिल्ला र क्लब चुनावमय भएका छन् ।

यस्तो अवस्थामा एन्फामा अर्को विवाद उत्पन्न भएको छ । मुख्य प्रशिक्षक अब्दुल्लाह अल्मुताइरीले गरेको व्यवहारप्रति असन्तुष्टि जनाउँदै १० खेलाडीले राष्ट्रिय टिमको बन्द प्रशिक्षण छोडेका छन् ।

नियमित तथा अनुभवी सदस्य रोहित चन्दले खेलाडीको समस्या प्रशिक्षक अब्दुल्लाहलाई राख्दा उनले टिम अभ्यासबाट निस्कन दबाब दिएपछि रोहितले होटेल छाडे । आफ्ना विषयमा बोलेका रोहितलाई टिमबाट निकालेपछि अन्य १० खेलाडिले पनि होटेल छाडेका हुन् ।

तर, यो विषय बाहिर आएपछि एन्फा अध्यक्ष कर्मा छिरिङ शेर्पाले खेलाडीसँग छलफल गरेका थिए । उनले सत्यतथ्य बुझेर पुनः भेट्ने बाचा गरे तर भेटेका छैनन् ।

कुराकानीकै क्रममा खेलाडीले प्रशिक्षकको अन्डरमा खेल्ने वातावरण अब नहुने र बर्खास्तसम्मको कुरा उठाएका थिए । तर, अध्यक्ष कर्माले भने इन्कार गरे ।

'भेटमा कुरा हुँदा अध्यक्षले चुनाव छ । केही गर्न सक्दिनँ भन्नुभयो,' मिडफिल्डर विशाल राईले भने । यो विषयमा एन्फाले छानबिन गर्ने भएको छ । एन्फा महासचिव इन्द्रमान तुलाधरले विवाद समाधानका लागि छानबिन गर्ने बताए ।

पत्रकार सम्मेलनमा १० खेलाडी (रोहित चन्द, सुजल श्रेष्ठ, विशाल राई, विशाल श्रेष्ठ, अनन्त तामाङ, विमल घर्ती मगर, तेज तामाङ, सुमन लामा, अञ्जन विष्ट, दिनेश राजवंशी) सहित एन्फा अन्तर्गतको खेलाडी संघबाट अध्यक्ष विक्रम लामा र बिकेश कुथुको सहभागिता रहेको थियो ।

हाल नेपाली टिम अफगानिस्तानसँग हुने दुई मैत्रीपूर्ण खेलको लागि तयारीमा छ । दोहामा हुने मैत्रीपूर्ण खेल जेठ ११ र १५ गते हुनेछ ।

यसपछि नेपाली टिमले एएफसी एसियन कप- २०२३ को छनोट खेल्नेछ । समूह 'ए' मा रहेको नेपालसँगै जोर्डन, कुवेत र इन्डोनेसिया छन् । तीनै टोली फिफा वरीयतामा नेपालभन्दा माथि छन् । छनोटको सबै खेल कुवेतमा हुनेछन् ।

प्रकाशित मिति: बिहीबार, वैशाख १५, २०७९ २०:०६