एन्फा व्यवस्थापक उपाध्यायलाई प्रश्न– खेलाडीको क्याम्प व्यवस्थापनमा एन्फा किन चुक्यो ?

एन्फा व्यवस्थापक उपाध्यायलाई प्रश्न– खेलाडीको क्याम्प व्यवस्थापनमा एन्फा किन चुक्यो ?

A+ A A-

एशियन कप फुटबल छनाेटको बन्द प्रशिक्षणमा रहेका १० जना राष्ट्रिय खेलाडीले खाना बस्नको व्यवस्थापन राम्रो नभएको लगायतका गुनासो राखेर बन्द प्रशिक्षण छोडेका छन् । मुख्यप्रशिक्षक अब्दुला अलमुताइरीसँग गुनासो गर्दा पनि सम्बाेधन हुनुको साटो उल्टै प्रशिक्षणबाट निकालिएको गुनासो खेलाडीको छ ।

यसै विषयमा व्यवसथापनको जिम्मा पाएका व्यवसथापक मधुसूदन उपाध्यायसँग गरिएकाे कुराकानी :

अहिले खेलाडी र व्यवस्थापकबीच देखिएको समस्या के हो ?

खासमा उहाँहरूको समस्याको विषयमा हामीलाई केही थाहा छैन । उहाँहरूले अध्यक्ष वा महासचिवसँग कुरा गरेको भए त मलाई जानकारी भएन । मसँग उहाँलाई के भएको हो भन्ने विषयको समस्या आइसकेको छैन ।

उहाँहरूले क्याम्प छोडेर जानु भएको सम्मको कुरा जानकारी छ । त्योभन्दा बढी कुरा मलाई जानकारी भएन ।

तपाईले जानकारी भएने भने पनि उहाँहरूले पत्रकार सम्मेलन नै गरेर विवाद सार्वजनिक गरेका छन् । सामान्य खाना बस्नको कुरा पनि राम्रो नभएको कुरा उठेका छन् ?

उनीहरूको ट्रेनिङ क्याम्प त सुरूदेखि नै होटलमा भएको थियो । वैशाख २ गतेदेखि बोलाइएको क्याम्प एक दिन पनि उहाँहरूलाई होष्टेल राखेकै छैन । यो विषय कसरी उठ्यो किन भन्नु भयो मैले बुझेको छैन । होस्टेल त हामीले मोरिससकाे म्याचमा बाहेक अधिकांश प्रतियोगिता सधैँ होटलमा नै बसेका छौँ त । होटलमा त्यस्तो समस्या परेको जस्तो लाग्दैन ।

होटल बस्दा खाना बस्ना समेत समयमा भएन रे नि ?

क्लोज क्याम्पमा बोलाएको दिनदेखि होटलमा बस्नु भएको छ त ।

होटलमा बसे पनि व्यवस्थापन भएन भन्‍ने कुरा आयो ?

यदि त्यसो हो भने होटल राम्रो भएन भन्ने कुरा मलाई भन्नु पर्ने हो । मलाई त भन्नु भएन । सर्भिस राम्रो नगरेको हो भने हाम्रो कोटेशनअनुसारको सर्भिस हामी मागी हाल्छौँ । होटलमा समस्या भएको होइन जस्तो लाग्छ । यदि होस्टेलमा बस्यो भने यस्तो समस्या आउँछ भन्ने भाइहरूको बुझाइ होला ।

अवको योजना के छ त ?

भाइहरूको समस्या छ भने समस्या लिएर म कहाँमा आउनु पर्‍यो नि । हरेक पल-पलमा मैले सहयोग गर्ने काम गरिरहेको छु भने अहिलेको समस्या पनि समधान गर्थेँ होला । अध्यक्ष, महासचिव जहाँ कुरा लानुपर्ने थियो मैले लैजाने थिएँ होला । उहाँहरूले मलाई जानकारी नै गराउनु भएन ।

अहिले १० खेलाडी क्याम्पबाट बाहिरिएको अवस्था छ, विवाद छताछुल्ल छ , अब क्याम्पमा फर्काउने प्रयास हुन्छ कि गए ठिकै छ भन्ने हो ?

खेलाडीको हकमा मैले व्यवस्थापकीय कमि कमजोरी नगर्ने हो । यस्तो कमजोरी गरेको छैन । को खेलाडी चाहिन्छ वा को चाहिँदैन भन्ने जिम्मेवारी कोचको नै हो ।

मेरो कुरा सबै मिलेर बस्नु पर्छ भन्ने हो । अहिले उठेको कुरा ठूलो कुरा थिएन । यसरी बाहिर आउनु नै दुखद् छ । होस्टेल बस्ने कि होटल बस्ने भन्ने कुरामा होटल नै बसालिएको थियो । समस्या केही पनि छैन । कोचले के भन्यो भन्ने कुरा त बसेर सल्लाहा गर्ने कुरा हो । कोचले गाली गर्‍यो, निस्केर जा भन्यो भन्ने कुरा त मलाई भन्नु भएन त । यदि भनेको भए त्यही दिनमा बसिन्थ्यो होला नत्र भोलि पल्ट भनिन्थ्यो होला । राति नै होटल छोडेर जानुपर्ने अवस्था त थिएन होला भन्ने बुझाइ मेरो हो ।

अब के हुन्छ ? खेलाडी कहिले क्याम्प फर्किन्छन् ?

त्यस विषयमा एन्फाले उहाँहरूलाई जानकारी गराउँछ । उहाँहरूले कोचसँग पनि भेट गर्नु भएको छ । खेलाडीसँग पनि भेट्नु भयो, उहाँहरू बसेर सचिवालयले निर्णय गर्ने कुरा हो । मेरो तर्फबाट गर्ने भनेको हो व्यवस्थापकीय काम हो । जो खेलाडी भए पनि मैले सहयोग समन्वयन गर्ने हो । प्राविधिक रुपमा को खेलाडी ल्याउनुपर्छ कसले राम्रो गर्छ मैले जान्ने होइन । जो खेलाडी टीममा हुन्छ सबैलाई समान व्यवहार गर्ने हो व्यवसथापकीय ढंगले । प्राविधिक रुपमा उहाँहरूले गर्ने हो । यो समस्या चाँडै सुल्टियोस् भन्ने चाहाना म राख्छु ।

खासमा यो ठूलो समस्या नै होइन । होस्टेल बसेदेखि असुविधा हुन्छ भन्नु भएको छ । तर, हामी होस्टेल नै बसेका छैनौँ ।

किरण चेम्जोङलाई टिमबाट हटाएर अर्को गोलकिपर ल्याउने कुरा पनि छ नि ?

छैन, त्यस्तो केही पनि सल्लाह भएको छैन । निस्कने बस्ने भन्ने कुरा केही पनि भएको छैन । उहाँहरूसँग मैले कुरा गरेको छु नआउने वा नराख्ने कुरा केही पनि भएको छैन ।

प्रकाशित मिति: बिहीबार, वैशाख १५, २०७९ २०:५१