गठबन्धनका उम्मेदवार राम थापा : सधैँ उठ्ने, सधैँ दोस्रो हुने

A+ A A-

स्थानीय चुनाव २०७९ मा दमकबाट सत्ता गठबन्धन दलले राम थापालाई मेयरको उम्मेदवार बनाएर प्रतिस्पर्धामा आएको छ । एमालेकी उम्मेदवार गिता अधिकारीसँग राप्रपाका नेता थापाकाे प्रतिस्पर्धा हुनेछ । गठबन्धन तोडिएको हल्ला पटक–पटक सार्वजनिक भए पनि अहिलेसम्म दमकमा गठनन्धन कायम नै देखिन्छ । अहिलेसम्मको स्थिति हेर्दा एमाले एक्लै गठबन्धनसँग चुनावी मैदानमा हुनेछ ।

गठबन्धनका उम्मेदवार राम थापा राप्रपा नेपालका प्रदेश १ का अध्यक्ष हुन् । उनी दमकका पूर्व नगर प्रमुख पनि हुन् । २०६१ सालको शाही कालमा ८ महिना दमक नगरपाकिलाको प्रमुखका रुपमा थापाले काम गरेका छन् । यसबाहेका सबै चुनावमा उनी पराजित भएका छन् ।

उनी केही समय अघिसम्म कमल थापाका विश्वास पात्र थिए । पार्टी छाडेर कमल थापा गए पनि उनी भने राप्रपामै छन् । पार्टी विभाजनपछि उनी सार्वजनिक रुपमा त्यति खुलेका छैनन् ।

थापाको अनौठो आदत छ । सबै चुनावमा भाग लिने, र सधैँ उही ‘पोजिसन’ कायम गर्ने । यसअघि राप्रपा नेता थापा संसदीय निर्वाचनमा एमाले अध्यक्ष ओलीसँग चुनावी मैदानमा उत्रिए । अध्यक्ष ओली विजयी भए, नेता थापाले दोस्रो स्थान चित्त बुझाए । यसअघिको स्थानीय निर्वाचनमा पनि नेता थापाको पोजिसन दोस्रो थियो।

एमालेबाट रोमनाथ ओलीले १० हजार ८०६ मत ल्याएर विजयी हुँदा नेता थापाले ७ हजार ६५५ मत ल्याए । नगरमा नेता थापासँगै राप्रपाको समेत दोस्रो पोजिसन स्थापित भयो । दमकमा मेयर बन्ने उनको आकांक्षा अघिल्लो पटकभन्दा यसपटक केही बलियो देखिन्छ ।

नेता थापाको राजनीति २०४६ सालदेखी सुरु भएको हो । राप्रपाको सक्रिय राजनीति गर्दै आएका उनी एक्लैको दमकमा सधैँ दोस्रो स्थान छ । उनलाई दोस्रो बनाउने चुनाव स्थानीय चुनाव मात्र होइन, तत्कालीन झापा जिल्ला विकास समितीको निर्वाचन नेता थापा उप–सभापतिमा १ मतले पराजित भएका थिए । यसपटक भने गठबन्धन दलले इमान्दारिताका साथ सहयोग गरे पहिलो हुने उनको विश्वास छ । अहिले उनलाई कांग्रेस र माओवादी केन्द्रकाे साथ छ ।

नेता थापासँगै एमालेको तर्फबाट मेयरको उम्मेदवार अधिकारी अघिल्लो निर्वाचनमा दमकबाट सबैभन्दा बढी मत ल्याउने जनप्रतिनिधि हुन् । मेयर विजेता ओलीको भन्दा उपमेयर विजेता अधिकारीको १ हजार ८१९ मत बढी थियो । उनले १२ हजार ६२५ मत ल्याएकी हुन् ।

एमाले केन्द्रीय सदस्य अधिकारी बहालवाला उप–मेयर हुन् । उनले दमक बहुमुखी क्याम्पसको उप–प्रमुख भएर २५ वर्ष बिताएकी थिइन् । अहिलेका अधिकांश नेता, कार्यकर्ता मेयरकी उममेदवार अधिकारीका छात्र–छात्रा छन् । जनस्तरसम्म उनको सम्बन्ध भएको एमाले नेताहरुको बुझाइ छ ।

प्रकाशित मिति: आइतबार, वैशाख ११, २०७९ १५:२८