एमालेले ललितपुर मेयरकाे टिकट दिएका व्यञ्जनकार नेपाल बैंकका पूर्वजागिरे

A+ A A-

सत्ता गठबन्धनका उम्मेदवारविरुद्ध नेकपा एमालेले ललितपुर महानगरपालिकामा उतारेका मेयर उम्मेदवार हरिकृष्ण व्यञ्जनकार नेपालका बैंकका पूर्वकार्यालय सहायक हुन् । उनी बैंककाे जागिर छाेडेर राजनीतिमा हाेमिएका थिए । २०३३ सालदेखि ०४३ सम्म नेपाल बैंककाे जागिर खाएका उनले तत्कालीन ललितपुर नगरपालिका वडा नम्बर ९ काे अध्यक्ष लड्न पदबाट राजीनामा दिएका थिए । जागिरअवधिमै उनले राजनीति थालेका हुन् । आफूले २०३५ सालबाट विद्यार्थी राजनीति सुरु गरेकाे उनी बताउँछन् ।

व्यञ्जनकार व्यवस्थापन संकायमा स्नातकाेत्तर हुन् । ०३३ सालतिर उनले म्यानेजमेन्ट पढ्न कीर्तिपुरस्थित क्याम्पसमा प्रवेश परीक्षा दिए । तर, वैकल्पिकमा नाम निस्क्याे । नेपाल बैंककाे जागिरबाट उनकाे सरुवा विराटनगर भयाे । व्यञ्जनकार महेन्द्र माेरङ क्याम्पसमै डिग्री पढ्ने याेजना बनाएर विराटनगर गए । त्यहाँ रहँदा तत्कालीन मालेका नेताहरूसँग उनकाे सम्पर्क बढ्याे । व्यञ्जनकार भन्छन्, 'म सानैदेखि वामपन्थी विचार बाेक्थेँ । विराटनगरमा मेराे धनकुटाका गाेपाल गुरागाईंदेखि यता प्रमेश हमालसम्मका कम्युनिस्टहरूसित संगत भयाे ।'

उनी ललितपुरकाे च्यासलमा २०१२ सालमा जन्मेका हुन् । विराटनगरमा डिग्री सकेर ०३८ सालमा काठमाडाैं फर्केका उनले ०४३ सालमा वडाअध्यक्ष लड्न जागिर छाेडेका थिए । र, त्याे बेला सर्वाधिक मतसहित विजयी पनि भए ।

०४६ सालकाे ञ्चायतविराेधी आन्दोलनमा उनकाेप सक्रिय सहभागिता थियाे । ०४९ सालमा उनी एमाले ललितपुर नगर कमिटी सचिव भए । त्यसपछि उनले जिल्ला कमिटी सदस्यकाे जिम्मेवारी पाए । ०६६ सालमा ललितपुर जिल्ला उपाध्यक्ष भए । २०७० सालमा एमाले हाइकमाण्डले हरिकृष्णलाई ललितपुरकाे पार्टी अध्यक्ष बनायाे । ०७८ मा पार्टीकाे केन्द्रीय सदस्य बनेका हरिकृष्ण एक्ला व्यक्ति हुन्, जाे ललितपुर अध्यक्षबाट सिधै केन्द्रीय समितिमा पुगे । २८ माग ०७८ मा उनले जिल्ला अध्यक्ष छोडेका थिए ।

०७४ सालकाे स्थानीय चुनावमा उनी ललितपुर महानगरपालिकाको मेयर उठेका थिए । तर, अन्तिम नतिजामा मत कांग्रेसका चिरिबाबु महर्जनभन्दा ३ सय २६ कम आयाे । उनी हारे । त्यसपछि षड्यन्त्रपूर्वक आफूलाई हराइएकाे भन्दै उनी उच्च हुँदै सर्वाेच्च अदालतसम्म पुगे । तर, अदालतले याे मुद्दालाई प्राथमिकतामा राखेन । र, अझै विचाराधीन छ ।

याे पनि...

मत धाँधली मुद्दा जस्ताकाे तस्तै, चिरीबाबु र हरिकृष्ण फेरि मैदानमा

ललितपुर मेयर उम्मेदवारका रूपमा पार्टीले टिकट दिएपछि व्यञ्जनकारले शिलापत्रसित भने, 'चिरिबाबुले अनलाइन, टीभीमा दिँदै हिँडेकाे अन्तर्वार्ताले मतदाता झन् रिसाएका छन् । याे महानगरमा राम्राे काम गर्न सक्ने मान्छे मै हुँ । अब चुनावकाे प्रचारमा लाग्छु् ।'

प्रकाशित मिति: शनिबार, वैशाख १०, २०७९ २१:५५