सिरहामा एक वर्षमा सवारी दुर्घटनामा ७९ को मृत्यु

A+ A A-

चालू आर्थिक वर्ष २०७५/७६ को साउनदेखि जेठसम्मको ११ महिनामा पुरुष ६४, महिला १० र बालबालिका पाँच जना गरी जम्मा ७९ जनाले विभिन्न सडक दुर्घटनामा परी ज्यान गुमाएको जिल्ला ट्राफिक कार्यालय लहान, सिराहा जनाएको छ ।

चालकको लापरबाही, मादक पदार्थ सेवन गरी सवारी चलाउनु, सडक सेन्टरको अभाव, मौसमको खराबी, ओभरटेक, ट्राफिक नियमको उल्लंघन तथा ट्राफिक नियममा चेतनाको अभाव, क्षमताभन्दा बढी यात्रु बोक्ने, साँघुरो सडक, सवारी चालक अनुमतिपत्रबिना सवारी चलाउनु सवारी दुर्घटनाको प्रमुख कारण रहेको जिल्ला ट्राफिक कार्यालय लहान सिराहाका ट्राफिक प्रहरी निरीक्षक मिलन बस्नेतले जानकारी दिए ।

जिल्लामा ट्राफिक जनशक्ति अपुग भएर सबै ठाउँमा ट्राफिकपोस्ट नभए पनि ‘सरप्राइज’ चेकिङ, जेब्राक्रसिङ निर्माण, सवारी चालकको स्वास्थ परीक्षण, विद्यालय सम्पर्क कार्यक्रम, सामुदायिक–प्रहरी साझेदारी कार्यक्रम गरी सडक दुर्घटना न्यूनीकरणका लागि लगातार प्रयास गरिरहेको ट्राफिक प्रहरी निरीक्षक बस्नेतले बताए ।

ट्राफिक नियमको उल्लंघन गरी चलाएको बस, ट्रक, कार, जिप, ट्याक्टर, मोटरसाइकल तथा अन्य सवारीसाधनलाई कारबाही गर्दा आर्थिक वर्ष २०७५/७६ मा १ करोड ५० लाख ६१ हजार जरिमानाबापत राजस्व संकलन भएको ट्राफिक प्रहरी कार्यालय लहानका ट्राफिक प्रहरी नायब निरीक्षक मनोजकुमार चौधरीले बताए ।

गत आर्थिक वर्ष २०७४/७५ मा १ करोड ९८ लाख ८९ हजार विभिन्न सवारीसाधनलाई कारबाही गर्दा राजस्व संकलन भएको थियो । जिल्लामा सदरमुकाम सिराहा, बन्दीपुर, मिर्चैया, गोलबजार, धनगढी, ठाडी र सुखीपुर गरी नौ स्थानमा ट्राफिक प्रहरी चेकपोस्ट कायम गरी ट्राफिक जाँच हुँदै आएको छ ।

प्रकाशित मिति: सोमबार, असार २३, २०७६ १८:५३