इटहरीकाे मेयरमा कांग्रेसकै उम्मेदवार, दिलैदेखि सघाउन उपमेयरसहित ७ वडा दिनुपर्ने एसकाे सर्त

इटहरीकाे मेयरमा कांग्रेसकै उम्मेदवार, दिलैदेखि सघाउन उपमेयरसहित ७ वडा दिनुपर्ने एसकाे सर्त

A+ A A-

सत्ता गठबन्धनले सुनसरीको इटहरी उपमहानगरपालिकाको मेयरमा कांग्रेसका उम्मेदवार उठाउने निर्णय गरेको छ । मेयरमै दाबी गरिरहेको नेकपा एसले उपमेयर पाउने सहमति बनेको छ ।

एसबाट मेयरमा सिफारिस केशवकुमार विष्टले केन्द्रबाट इटहरीमा कांग्रेसलाई सहयाेग गर्न निर्देशन आएको जानकारी दिए । कांग्रेस इटहरीका सभापति हेमकर्ण पौडेलले गठबन्धनमा रहेका दलबाट साथ सहयाेग प्राप्त हुने विश्वास व्यक्त गरे ।

कांग्रेस इटहरी नगर समितिले पाैडेलसहित अघिल्लाेपल्टका मेयर उम्मेदवार रोहित प्रसाईं, महाधिवेशन प्रतिनिधिहरू भीम पौडेल, विकास केसी, संविधानसभा सदस्य एवं केन्द्रीय सदस्य कल्पना चौधरी, प्रदेश सदस्य सूर्य राईलाई मेयरमा सिफारिस गरेकाे छ ।

यसैगरी जिल्ला उपसभापति नगेशचन्द्र राई, महाधिवेशन प्रतिनिधि रमेश पोखरेल, नेतृ रेखा प्रसाईं, सुनसरी जिल्ला किसान संघका पूर्वसभापति विष्णु डाँगी र क्षेत्रीय प्रतिनिधि रामरोहन चौधरी मेयरका लागि सिफारिस भएका छन् । यीमध्ये राेहित र हेमकर्ण बलिया दाबेदार हुन् ।

देशभरका ११ उपमहानगरपालिका भाग लगाउँदा इटहरी नेकपा एसकाे पाेल्टामा पर्ने संकेत पाएलगत्तै इटहरीका कांग्रेस नेताहरू रातारात काठमाडाैं आएर पार्टी 'हाइकमाण्ड'लाई दबाब दिएका थिए । २०७४ सालको चुनावमा एमालेसँग कांग्रेस २७०४ मतले हारेको थियो । यसबीचमा एमाले विभाजन भएको छ । एउटा वडा जितेको फोरम लोकतान्त्रिक कांग्रेसमा समाहित भइसकेकाे छ । एमालेकाे भाेट काट्नसक्ने ठानिएकाे नेकपा एस गठबन्धनभित्रै छ । कांग्रेसका लागि योभन्दा अनुकूल समय अरू हुनै नसक्ने भन्दै केन्द्रीय नेतृत्वलाई 'कन्भिन्स' गराएका इटहरीका कांग्रेसीले एसलाई अघि सार्दा एमालेलाई फाइदा हुने गणित सुनाएका थिए ।

'२०७४ सालमा हामीले करिब २० हजार मत पाएका थियाैँ । अहिले ८ हजारजति मतदाता बढाएका छाैँ', इटहरी कांग्रेसका सभापति हेमकर्ण पाैडेलले शिलापत्रसित भने । लगातार तेस्राेपल्ट नगर सभापति बनेर कांग्रेस हाँकिरहेका पाैडेलका अनुसार, अघिल्लाे चुनावमा कांग्रेसका क्रियाशील सदस्य २५ सय थिए, अहिले ५७ सय बढी छन् । 'इटहरीमा कांग्रेस नै त्यस्ताे पार्टी हाे, जसकाे पाँच सयभन्दा ज्यादा टाेल कमिटी छन् । एउटा कमिटी ५१ देखि २ सय सदस्यीय छ', उनले भने । इटहरीमा यसपालि कांग्रेस एक्लै लड्दा जितिने कुरा शीर्ष नेतृत्वलाई आफूहरूले तथ्य अगाडि राखेर बुझाएकाे उनले बताए ।

गठबन्धनमा आबद्ध एसबाट मेयरमा सिफारिस केशवकुमार विष्टले कांग्रेसलाई सघाउने विषयमा अहिल्यै केही नभन्ने बताए । बरु यसअघि इटहरी कांग्रेसका नेताले दिएका अभिव्यक्तिप्रति उनले आपत्ति जनाए । 'इटहरी हाम्रो पार्टीको भागमा पर्ने चर्चा चल्दा कांग्रेसका साथीहरूले अपमान गर्ने किसिमले बोल्नुभयो । हाम्रो पार्टीलाई पार्टी नै होइनझैं गर्नुभयो । मेयर नपाए समाजवादीलाई सघाउँदैनौँ भन्नुभयो । यसप्रति मेरो आपत्ति छ', उनले शिलापत्रसित भने ।

चुनावमा सघाउन एसले कांग्रेससँग इटहरीका ७ वडा माग्ने बताएको छ । केन्द्रमा गठबन्धनको निर्णयअनुसार उपमेयर एकीकृत समाजवादीकै भागमा परेको छ । अब ७ वटा वडा दिए कांग्रेसलाई दिल खोलेर सघाउने विष्टले बताए । गठबन्धनमा भएकाे सहमतिअनुसार, अघिल्लो निर्वाचनमा जुन दलले जितेको छ त्यो पालिका त्यही दललाई दिने र एमालेले जितेका पालिकामा पहिलाे हक समाजवादीकाे हुनुपर्ने उनले बताए । 'इटहरीमा यसअघि एमालेले जितेकाे थियाे । हामीले मेयर नपाउने भएपछि ७ वडा हामीलाई हुनुपर्छ', उनले भने ।

समाजवादीले मेयर पाउने सुइँको पाएलगत्तै इटहरी कांग्रेसका नेता काठमाडौंमा, राप्रपासँग 'ह्याण्डसेक' गर्ने एमाले तयारी

कांगेसका पाैडेलले वडा बाँडफाँटकाे विषयमा छलफल गर्न बाँकी नै रहेकाे बताए । २०७४ काे चुनावमा कांग्रेसले इटहरीका २० मध्ये ११ वटा वडा जितेकाे थियाे । एउटा वडा जितेकाे फाेरम लाेकतान्त्रिक पनि कांग्रेसमा समाहित भइसकेकाे छ । त्याे चुनावमा मेयर, उपमेयर र आठवटा वडा एमालेले जितेकाे थियाे ।

कांग्रेसको प्रतिस्पर्धी मानिएको नेकपा एमालेले अहिलेका मेयर द्वारिकलाल चौधरीसहित उपमेयर लक्ष्मी गौतम, नगर कमिटी अध्यक्ष यमकुमार सुब्बा, प्रदेश कमिटी सदस्य एवं इटहरी खानेपानीका अध्यक्ष रामप्रसाद चौलागाईं, पूर्व नगर कमिटी अध्यक्ष रेवतीप्रसाद घिमिरे र जिल्ला सदस्य बन्नुलाल चौधरीकाे नाम मेयरमा सिफारिस गरेकाे छ । यीमध्ये द्वारिकलाल र रामप्रसादलाई बलिया दाबेदारका रूपमा हेरिएकाे छ । गठबन्धनले कांग्रेसलाई अघि सारेपछि एमालेले राप्रपासँग तालमेल गरेर भए पनि चुनाव जित्ने तयारी गरेको छ । इटहरीमा १ लाख ४ हजार ६ सय २६ मतदाता छन् ।

याे पनि :