'पहिला उनीहरूले कविताको टाउकोमा बोतलले हाने, त्यसपछि ढुंगा हानेर घिसारे'

A+ A A-

उदयपुरकी १५ वर्षीया बालिका कविता सुनुवारकाे हत्या व्यक्तिगत रिसईबीका कारण गरेकाे आराेपित १७ वर्षीया सरिता ढकाल खत्रीले बताएकी छन् । जिल्ला प्रहरी कार्यालय उदयपुरले आज पत्रकार सम्मेलन गरी दिएको जानकारीअनुसार सरिता केही दिन अघिदेखि नै कवितासँग बदला लिन चाहन्थिन् । उनी कवितासँगै काेसी जनता रामपुरमा १० कक्षामा पढ्थिन् ।

जिल्ला प्रहरी कार्यालय उदयपुरका प्रहरी उपरीक्षक (एसपी) सुवासचन्द्र बाेहराका अनुसार कविताले आफूलाई बारम्बार होच्याउने, चिढ्याउने गरेकाले यही रिसईबीमा ठूलो बुवाको छोरासँग मिलेर कविताको हत्या गरेको सरिताले बताएकी हुन् । जिल्ला प्रहरी कार्यालयले पक्राउ परेका सरिता र विनोदबारे हिजो नै प्रेस विज्ञप्तिमार्फत औपचारिक जानकारी गराएको थियो ।

२२ चैत बिहान ४ः०५ मा सरिताले कवितालाई स्कुल सँगै जानुपर्छ, म आउँदै छु भनेर एसएमएस गरेकी थिइन् । त्यसपछि उनीहरू सँगै स्कुलतिर निस्केका थिए । उनीहरूबीच अन्तिम एसएमएस बिहान ४ः३१ बजे भएकाे देखिन्छ । 'यसकाे मतलब घटना ५ बजेतिर भएकाे हुनुपर्छ', एसपी बाेहराले भने ।

यसरी भएकाे थियाे घटना

प्रहरीसामु सरिताले बताएअनुसार उनलाई कवितासँग व्यक्तिगत रिसईबी थियाे । माैका छाेपेर उनी कवितासँग बदला लिन चाहन्थिन् । उनले ठूलाे बुवाका छाेरा १९ वर्षे विनाेद ढकाललाई कवितासँग बदला लिने कुरा सुनाइन् । भारत सिक्किम घर भएका विनाेद काका जितबहादुर ढकाल खत्री (सरिताका बुवा) काे घरमा बसेर पढ्थे । उनी पनि कविताका सहपाठी नै थिए । उनीहरूले २२ गते (मंगलबार) ट्युसन जाने समय पारेर कवितालाई मार्ने याेजना बनाए । साेहीअनुसार सरिताले कवितालाई मेसेज गरिन् । र, घरसम्म लिन पनि गइन् । उनीहरूकाे घरबीचकाे दूरी करिब एक किलाेमिटर छ ।

कविता र सरिता घरबाट करिब साढे ४ बजेतिर निस्केका थिए । पछिपछि गएका विनाेदले कवितालाई हान्न खाली बियरकाे बाेतल लुकाएर लगेका थिए । घरबाट करिब दुई किलाेमिटर पूर्व डंगटाेलमा पुगेपछि सरिता र विनाेदले कवितालाई राेके र बियरकाे बाेतलले टाउकाेकाे पछाडिकाे भागमा हाने । घाइते कविता चिच्याउन थालिन् ।

त्यसपछि अरूले थाहा पाउने डरले दुवै जनाले कवितालाई ढुंगाले हानेर कर्तव्य गरी मारे । अनि उनीहरूले लासलाई करिब ४० मिटर दक्षिणतिर घिसार्दै लगे । यशाेधा खाेला किनारमा राखिएकाे काठकाे गाेलियाकाे छेउमा लास राखी भागे ।

त्यही दिन साँझ ५ बजे कविताका बुवा कृष्ण सुनुवारले सरिता र विनाेदविरुद्ध इलाका प्रहरी कार्याल रामपुर ठाेक्सीलामा किटानी जाहेरी दिएका थिए । पक्राउ परेका दुई जनामध्ये प्रहरीले विनाेदलाई मात्र सार्वजनिक गरेकाे छ । सरिताचाहिँ बालिका भएकाले उनलाई सार्वजनिक नगरिएकाे एसपी बाेहराले बताए । जिल्ला अदालत उदयपुले सरिताकाे हकमा २२ चैतदेखि लागू हुनेगरी पाँच दिन र विनाेदलाई सात दिन थुनामा राखेर थप अनुसन्धान गर्न अनुमति दिएकाे छ ।

कविता सुनुवार हत्या प्रकरणबारे