बुवालाई कविताले भनेकी थिइन्– जागिर नपाए विदेश गएर भए पनि तपाईंहरूलाई सुखसँग पाल्छु (भिडियाेसहित)

बुवालाई कविताले भनेकी थिइन्– जागिर नपाए विदेश गएर भए पनि तपाईंहरूलाई सुखसँग पाल्छु (भिडियाेसहित)

A+ A A-

बाबा मलाई डाक्टर पढाउन सक्नुहुन्छ ?

नत्र विदेश त पठाउन सक्नुहुन्छ नि !

धेरै पढेर वा विदेश गएर म तपाईंहरूलाई सुख दिन चाहन्छु ।

१० कक्षा पढ्दै गरेकी छोरी कविताले भनेका कुरा सम्झिँदै भक्कानिन्छन् ४६ वर्षे कृष्ण सुनुवार । उनले जवाफ दिएका थिए- जग्गा बेचेर भए पनि तिमीलाई डाक्टर पढाउँला ।'

पढाइमा मिहनेती र अब्बल छात्रा कविता एसईईको तयारीमा थिइन् । कोसी जनता मावि रामपुरमा बिहान ट्युसन पढाइ भइरहेको छ । बिहान ६ बजेदेखि नै ट्युसन सुरु हुने भएकाले कविता बिहान ५ बजे नै घरबाट हिँड्थिन् । हिजोचाहिँ उनी साढे ४ तिरै ट्युसन जाने तरखरमा थिइन् । मिल्ने साथी सरिता पहिल्यै फोन गरेर कवितालाई लिन आएकी थिइन् ।

बिरामी नातिनीको उपचार गराउन कृष्ण बिहान सबेरै धरान गएका थिए । त्यसै बेला उनलाई फोन आयो, १५ वर्षीया उनकी छोरी कविताजस्ती देखिने किशोरीलाई मारेर खोलाको किनारमा फालिएको छ ।

किराँत चोकस्थित कविताको घरमा उनका बुवाआमालाई सान्त्वना दिँदै गाउँलेहरू ।

कविताकी आमा शोभा घटनास्थलमा पुगिसकेकी थिइन् । तर उनलाई प्रहरीले मृत छोरीसम्म जान दिएको थिएन । किनकि, अनुहारभरि ढुंगा र सिसाको बोतलले प्रहार गरेकाले मृत किशोरी कविता नै भएकाे एकिन गर्न कठिन थियाे ।

नातिनीको उपचार गर्न धरान पुगेका कृष्ण खबर पाएलगत्तै आत्तिँदै बेलका-३, डंगटोलस्थित घटनास्थलमा पुगे । उनलाई पनि पुलिसले शवसम्म जान दिएन । कृष्णले परैबाट कपडा देखेर आफ्नी छोरी हुनसक्ने बताएपछि प्रहरीले शव भएकाे ठाउँमा जान दियो । उनले थाहा पाए, बिहान ट्युसनका लागि घर छोडेकी छोरीले संसारै छोडेर गइछिन् ।

यशोधा खोलाको किनारमा काठका मुढाहरू थोपरिएको ठाउँमा कविताको मृत शरीर घोप्टो पारेर राखिएको थियो । कपालले अनुहार छोपिएको थियो । 'छेउमा रगत लागेको ठूलो ढुंगा थियो । त्यो मेरै छोरी थिई, जो बाबा मलाई डाक्टर पढाउन सक्नुहुन्छ भनेर प्रश्न गर्थी', कृष्णले शिलापत्रसित भने ।

- कविता सुनुवार हत्या प्रकररण

उनका अनुसार छाेरी कसैलाई बिझाएर भन्ने स्वभावकी थिइनन् । कविताको कोहीसँग दुश्मनी रहेको कुरा पनि थाहा छैन उनलाई । तर तिनै छोरीको निर्मम तरिकाले हत्या गरिएको घटनाले उनीहरू शोकमा डुबेका छन् । सुनुवार परिवार मात्र होइन, सिङ्गो किराँत चोक शोक सन्तप्त बनेको छ ।

मृतक कविताका बुवा कृष्ण सुनुवार ।

कृष्णले छोरीको हत्या आशंकामा पक्राउ परेका १७ वर्षीया सरिता ढकाल खत्री र १९ वर्षका विनोद ढकाल खत्रीविरुद्ध किटानी जाहेरी दिएका छन् । यी दुवैजनालाई प्रहरीले पक्राउ गरिसकेको छ । तैपनि कृष्ण र शाेभा न्याय पाउनेमा ढुक्का हुनचाहिँ सकेका छैनन् ।

'अरूअरू ठाउँमा बालिकाहरू मारिएको, बलात्कृत भएको समाचार सुन्दा आङ सिरिङ्ङ हुन्थ्यो । हाम्रा पनि छोरी छन् भनेर डर लाग्थ्यो । आज आफ्नै गाउँमा, आफ्नै घरमा त्यस्तै विपति आइपर्‍यो', कृष्ण भन्छन्, 'अरू घटनामा जस्तै हामीले पनि न्याय नपाउने हौँ कि भनेर डर लागिरहेकाे छ ।'

यही शंकाले कविताको हत्यामा संलग्नहरूलाई सार्वजनिक गर्न उनीहरू माग गरिरहेका छन् । हत्यारा सार्वजनिक नगरेसम्म शव नबुझ्ने उनीहरूकाे अडान छ । कविताको शव पोस्टमर्टमका लागि धरानस्थित विपी कोइराला स्वास्थ्य विज्ञान प्रतिष्ठान लगिएको छ ।

कृष्णका अनुसार सरिता र कविता मिल्ने साथी थिए । उनीहरू कोसी जनता माविमा १० कक्षामा सँगै पढ्थे । विद्यालय आउजाउ सँगै गर्थे । अरू बेला सरिता घरमै पनि आउँथिन् ।

मृतक कविताकाे घर ।

घटना भएको दिन पनि सरिताकै फोनपछि कविता अरू बेलाभन्दा अलि छिटो घरबाट निस्केकी थिइन् कविता । तर उनलाई विद्यालयसम्म पुग्न दिइएन । घरबाट दुई किलोमिटर पूर्वमा पुगेपछि उनलाई ढुंगा र सिसाको बोतलले हानेर मारियो । हत्याको आशंकामा उनै सरिता र उनका ठूलो बुवाका छोरा विनोद पक्राउ परेका छन् । प्रहरी स्रोतका अनुसार प्रारम्भिक सोधपुछमा विनोदले अपराध स्वीकारेका छन् । कविताले फाेन गरेर बाेलाएपछि विनाेद पछिपछि गएका थिए । आफ्नाे घुँडा र कुइनामा चोट लागेकाले हिजाे बिहान विनोदले स्थानीय स्वास्थ्य चौकीमा गएर उपचार पनि गराएका थिए । विनाेद आफ्ना काका जितबहादुर ढकाल खत्री (सरिताका बुवा) को घरमा बसेर पढ्थे । उनको स्थायी घर भारत सिक्कीमको बियुङ हो ।

कृष्ण र शाेभाकी जेठी छोरीको विवाह भइसकेको छ । हिजो बिहानसम्म उनीहरूका साथमा कविता पनि थिइन् । तर उनलाई कसैको अपराधले कृष्ण र शोभाबाट छिनेर लगेको छ, कहिल्यै नफर्किने गरी । ८ वर्षे छोरालाई काखी च्यापेर कुनामा बसेकी आमा शोभाको आँखा हिजोदेखि ओभाएका छैनन् ।

उनीहरूको अब एउटै माग छ, छोरीका अपराधीले कुनै बहानामा उन्मुक्ति नपाऊन् । हत्यारालाई हदैसम्मको कार्बाही होस् ।
'मुद्दा कमजोर बनाएर ८/१० वर्षमै छुट्ने गरी सजाय सुनाइयो भने फेरि अरू कसैको छोरीको जीवन खतरामा पर्छ । मलाई जस्तै कसैलाई छोरीको शोक नपरोस् भन्ने हो भने तिनलाई जन्मकैदको फैसला सुनाउनुपर्छ', कृष्णले भने ।

कृष्ण सुनुवारसँग गरिएकाे कुराकानीसहितकाे भिडियाेः

प्रकाशित मिति: बुधबार, चैत २३, २०७८ १५:५०