महेन्द्र र चमेरे गुफाका लागि २२ करोड

A+ A A-

पोखराको पर्यटकीय गन्तव्य महेन्द्र गुफा र चमेरे गुफालाई थप आकर्षक बनाएर बृहत् विकास गर्ने गुरु योजना सार्वजनिक गरिएको छ । पछिल्लो समयमा पोखरा पुग्ने आन्तरिक तथा बाह्य पर्यटकहरुको रोजाइमा दुवै गुफा पर्न थालेसँगै गुफाको बृहत् रुपमा विकास गर्ने र थप पर्यटक भित्र्याउने योजनाअनुसार गुरुयोजना तयार पार्न थालिएको हो ।

स्थानीय विन्ध्यवासिनी माविको स्वामित्व एवं संरक्षकत्वमा सञ्चालित दुवै गुफालाई थप आकर्षण बढाउने उद्देश्यले गुरुयोजना निर्माण गरिएको विद्यालय व्यवस्थापन समितिका अध्यक्ष चन्द्रा थापाले जानकारी दिइन् ।

विद्यालयले शुक्रबार गुरुयोजना सार्वजनिक गर्दै विभिन्न योजनासहित गुरुयोजनाको कार्यान्वयनका लागि ५० लाख रुपैयाँ खर्च गर्ने घोषणासमेत गरेको छ । गुरुयोजनामा पर्यटक आकर्षण बढाउन भौतिक निर्माणदेखि आन्तरिक तथा बाह्य व्यवस्थापनलाई प्राथमिकता दिइएको छ ।

गुरुयोजनामा उल्लेख भएका योजनाहरु सम्पन्न गर्न करिब २२ करोड रुपैयाँ खर्च गर्नुपर्ने देखिएको विद्यालयका प्रधानाध्यापक कृष्णप्रसाद आचार्यले बताए । उनका अनुसार गुफाको आम्दानीबाट गर्न सकिने योजना तत्काल सुरु गरिने र ठूला योजनाका सम्पन्न गर्न प्रदेश तथा संघीय सरकारसँग आवश्यक पहल गरिनेछ ।

गुरुयोजना सार्वजनिक गर्दै गण्डकी प्रदेशका सांसद कृष्ण थापाले गुफाहरु पोखराका गौरव भएकाले यसको व्यवस्थित विकास गर्न आवश्यक रहेको बताए । उनले विकासका नाममा विभेद गर्ने छुट कसैलाई नभएको बताउँदै पोखरा नगर क्षेत्रभित्र रहेर पनि पूर्वाधारका क्षेत्रमा आवश्यक विकास हुन नसकेको बताए ।

सांसाद विन्दुकुमार थापाले एकपटक महेन्द्र गुफाको भ्रमण गरेको पर्यटकले अर्कोपटक पनि परिवार र साथीसंगीसहित आउने वातावरण बनाउनुपर्ने बताए । अर्का सांसद पुष्पा केसी भण्डारीले पर्यटकको संख्या बढाउन भए पनि गुफा क्षेत्रमा व्यवस्थित विकास हुनुपर्नेमा जोड दिइन् ।

पोखरा महानगरपालिका-१६ का वडाध्यक्ष जीवनप्रसाद आचार्यले महेन्द्र र चमेरे गुफाले यस क्षेत्रको शैक्षिक एवं भौतिक विकासमा ठूलो योगदान दिएकाले पनि यसको व्यवस्थित विकासमा स्थानीय सरकारले चासो दिएको बताए ।

कार्यक्रममा गुरु योजना निर्माण उपसमितिका संयोजक इन्जिनियर झपटबहादुर थापा, परामर्शदाता माछापुच्छ्रे कन्सल्टेन्सीका प्रबन्धक बाबुराम बराल, महेन्द्र गुफा चमेरे गुफा पर्यटकीय विकास समितिका संयोजक यदुनाथ बन्जरालगायतले गुफा क्षेत्रको पूर्वाधार विकास र व्यवस्थापनका लागि गुरुयोजना महत्त्वपूर्ण हुने बताएका थिए ।