फोटो भन्नु प्रकाश र छायाको कम्पोजिसन रहेछ : ‘नेपाल बिम्ब बेस्ट ल्यान्डस्केप फोटोग्राफी'

फोटो भन्नु प्रकाश र छायाको कम्पोजिसन रहेछ : ‘नेपाल बिम्ब बेस्ट ल्यान्डस्केप फोटोग्राफी'

A+ A A-

पेसाले शिक्षक भए पनि सोखले उनलाई फोटोग्राफर बनायो । रामेछापमा समाजशास्त्र पढाउने ३२ वर्षीय निरोज पौडेललाई किताबका पानाभन्दा समाज पढ्ने हुटहुटी थियो ।

पौडेलका अनुसार उनी नेपालका सबै जिल्ला डुलिसकेका छन् । यात्राका क्रममा उनका सहयात्रीहरू परिवर्तन हुँदै जान्छन् । कहिले साथीभाइ, कहिले परिवार त कहिले को । तर उनीसँग नछुट्ने एक मात्रै सहयात्री हो- क्यामेरा ।

निकोन डी ७५०० को क्यामेरा उनका लागि यसपालि ५० हजार पुरस्कार जिताउने सहयोगी बन्यो ।

गत साल उनी साथीहरूसँग अमादब्लम पुगेका थिए । गोक्योबाट एभरेस्ट जाने बाटोमा पर्छ त्यो ठाउँ । ४८०० मिटर उचाइमा रहेको त्यस ठाउँमा उनीहरू भोलिपल्ट बिहानको घाम हेर्नकै लागि बास बसे । भोलिपल्ट बिहानको घामको प्रकाश हेर्न लालायित थिए उनी । अमादब्लममा सूर्यको पहेँलो किरण कतिखेर पोखिएला भनेर पर्खिरहेका थिए निरोज ।

यत्तिकैमा कोही साथीहरू 'गोप्रो'ले भिडियो खिच्न लागे । कोही फोटो । एक जना साथी भने त्यस्तो उचाइमा योगा गर्न थालिन् । ‘४८०० मिटरको उचाइमा हिमालको ब्यागग्राउन्डमा तिनले योगा गरिरहेको दृश्य मलाई मनमोहक लाग्यो’, निरोज भन्छन्, ‘मलाई लाग्यो, मेरो आँखाले मात्रै होइन, क्यामेराको आँखाले पनि कैद गर्नैपर्छ ।’

त्यसपछि उनले अमादब्लमको ब्यागग्राउन्डमा योगा गरिरहेकी ती साथीको फोटो खिचे । उनले खिचेको उक्त ल्यान्डस्केप फोटोको सुन्दरता भन्नु नै प्रकाश र छायाको कम्पोजिसन हो । निरोज भन्छन्, ‘वास्तवमा फोटो भन्नु नै प्रकाश र छाया हो ।’

उनले खिचेको फोटोमा हिमाल, प्रकाश मात्रै नभएर तलको सानो तलाउमा त्यसको प्रतिबिम्ब देखिएको छ । ‘यतिबिघ्न प्रकाश र छाया मिलेको फोटो सायदै कैद गर्न सकिएला,’ उनी भन्छन् ।

शिलापत्रद्वारा आयोजित नेपाल बिम्ब फोटोग्राफीअन्तर्गत उत्कृष्ट ल्याण्डस्केप फोटोग्राफीमा उनको यो फोटो सर्वोत्कृष्ट भएको छ । जसबापत उनले ५० हजार नगद पुरस्कार हात पारेका छन् ।

हुन त निरोजलाई पशुपन्छीको फोटो खिच्न अझ बढी मन पर्छ । पाएको रकम पुरस्कारले उनी फेरि पनि क्यामेरासँगै देश डुल्न निस्कने योजनामा छन् । ‘यही वैशाखमा अपर डोल्पा जान्छु’, उनले भने ।

शिलापत्रद्वारा आयोजित फोटो प्रतियोगिता ‘नेपाल बिम्ब'मा आइतबार कल्चर फेस्टिबल फोटोग्राफी, ल्याण्डस्केप फोटोग्राफी, पोट्रेट फोटोग्राफी, स्ट्रिट फोटोग्राफी र वाइल्डलाइफ फोटोग्राफी गरी पाँच विधामा उत्कृष्ट फोटोहरू पुरस्कृत भए । सात महिनाअघि आह्वान गरिएको यस प्रतियोगितामा देशभरिबाट ५ हजारभन्दा बढी फोटोहरू संकलन भएका थिए । हरेक विधामा विजयी हुने फोटोलाई ५० हजार नगद पुरस्कार प्रदान गरिएको थियो ।

यो पनि...

प्रकाशित मिति: सोमबार, चैत १४, २०७८ १४:५०