सरोजनारायणलाई शहीद घोषणाका लागि सिफारिस गरिने, पत्नीलाई नगरपालिकामा जागिर

सरोजनारायणलाई शहीद घोषणाका लागि सिफारिस गरिने, पत्नीलाई नगरपालिकामा जागिर

A+ A A-

प्रहरीको गोली लागेर मृत्यु भएका सर्लाही ईश्वरपुरका सरोजनारायण सिंहलाई शहीद घोषणाका लागि सिफारिस गर्ने सहमति भएको छ । सर्लाहीको स्थानीय प्रशासन र राजनीतिक दलबीच यस्तो सहमति भएको हाे । दुई पक्षबीच सरोजलाई शहीद घोषणा गर्न सिफारिस गर्ने सहमति भएसँगै सर्लाहीको ईश्वरपुरमा केही दिनयता जारी तनाव अन्त्य भएको छ ।

बाँके खोलाको भंगालोमा परी १२ वर्षीय बालक अमित रायको मृत्यु भएको विषयमा स्थानीयले राजमार्ग अवरुद्ध गरीे प्रदर्शन गरीरहेका बेला प्रहरीले गोली चलाउँदा सरोजनारायण सिंहको घटना स्थलमै मृत्यु भएको थियो । घटनाको विरोधमा स्थानीय आन्दोलनमा उत्रिएका थिए ।

बुधबार भएको वार्तामा राजनीतिक दल र स्थानीय प्रशासनबीच १४ बुँदे सहमति भएको छ । जसअनुसार प्रहरीको गोली लागेर मृत्यु भएका सरोजलाई शहीद घोषणा गर्न स्थानीय प्रशासनले अनुरोध गर्ने, उनकी पत्नी रंगिलाकुमारी महतोलाई वडा नम्बर १३ को कार्यालय सहयोगीमा नियुक्त गर्ने र छोरालाई निःशुल्क उच्च शिक्षाको व्यवस्था मिलाउने सहमति भएको छ ।

यसका साथै बाँके चोकमा सरोजको सालिक निर्माण गर्न नगरपालिका र वडा नम्बर १३ लाई अनुरोध गर्ने सहमतिसमेत भएको छ ।

बाँके नदीमा डुबेर मृत्यु भएका बालक अमित रायको परिवारलाई क्षतिपूर्तिबापत ५ लाख रुपैयाँ उपलब्ध गराउने सहमति भएको छ । यसका साथै दुवै मृतकलाई काजकिरिया खर्चबापत २५–२५ हजार रुपैयाँ उपलब्ध गराउने, बाँके खोलाको सिमाना कायम गर्न प्रदेश सरकारलाई अनुरोध गर्ने, मापदण्डविपरीत खोला उत्खनन रोक्ने सहमतिसमेत भएको छ ।

यसैगरी, प्रहरीको लाठी चार्जमा परी घाइते भएकाहरुको यकिन गरी उपचार खर्च उपलब्ध गराउने, गोली लागि घाइते भएका राजकुमार महरालाई उपचार खर्चबापत ५० हजार उपलब्ध गराउने र दोषीमाथि आवश्यक कारबाहीको सिफारिस गर्ने सहमति भएको छ । बैठकमा संघीय सांसद प्रमोद साह, प्रदेश सांसद उपेन्द्र महतो, पूर्वमन्त्री शमभुलाल श्रेष्ठलगायत सहभागी थिए ।

प्रकाशित मिति: बिहीबार, असार १९, २०७६ ०५:१६