केयूकेएलको शुल्क पनि अब ई–सेवामार्फत भुक्तानी गर्न सकिने

A+ A A-

काठमाडौं उपत्यका खानेपानी लिमिटेड (केयूकेएल) को शुल्क अब ई–सेवामार्फत भुक्तानी गर्न सकिने भएको छ । सोसम्बन्धी सम्झौतापत्रमा ई–सेवाका प्रमुख कार्यकारी अधिकृत सु्भास सापकोटा र केयूकेएलका कामु उपकार्यकारी अधिकृत विजय तिमिल्सिनाले सोमबार हस्ताक्षर गरेका छन् ।

यो सम्झौतासँगै अब ई–सेवामार्फत केयूकेएलका ठिमी, भक्तपुर, त्रिपुरेश्वर, क्षेत्रपाटी, कीर्तिपुर, बानेश्वर, महांकालचौर, ललितपुर, महाराजगञ्ज शाखाका ग्राहकले ई–सेवाबाटै महसुल भुक्तानी गर्न सक्नेछन् ।

यसले आमखानेपानी ग्राहकको ठूलो हिस्सालाई सहज बनाउने अपेक्षा गरिएको छ । हाल देशभर रहेका सयौँ खानेपानी समितिहरूको खानेपानी महसुलसमेत ई–सेवा प्रयोगकर्ताले मोबाइलबाटै सिधै अनलाइनबाट भुक्तानी गर्न सक्छन् । ई–सेवा एकाउन्ट नभएका ग्राहकहरूले आफ्नो नजिकै रहेका ई–सेवा जोन तथा पोइन्टमार्फत रकम भुक्तानी गर्न सकिने कम्पनीले जनाएको छ ।

ई–सेवामा हाल प्रत्यक्ष रूपमा खाता खोल्नेको संख्या ५० लाख पुगेको छ । यसैगरी अप्रत्यक्ष रूपमा करिब १ करोड ६० लाख जनसंख्याले ई–सेवामार्फत सेवा लिइरहेका छन् । हाल ई–सेवाका देशभर करिब एक लाख ३० हजारभन्दा बढी एजेन्ट (ई–सेवा जोन तथा पोइन्ट) छन् ।

ई–सेवाबाट मोबाइल, टेलिफोन, इन्टरनेट, बिजुली तथा खानेपानीको महसुल भुक्तानी, रिचार्ज, हवाईजहाज/ बसको टिकट, स्कुल/कलेजको शुल्क भुक्तानी गर्न सकिन्छ । ई–सेवामा हाल ५१ वटा बैंक तथा वित्तीय संस्था सदस्य छन् । यी बैंकबाट ई–सेवामा सहजै रकम जम्मा गर्न तथा ई–सेवाबाट बैंक खातामा रकम पठाउन सकिन्छ ।