‘पिर’ विवादबारे प्रकाश सपूतले भने– कुनै राजनीतिक पूर्वाग्रह राखेर भिडियो बनाएको होइन

‘पिर’ विवादबारे प्रकाश सपूतले भने– कुनै राजनीतिक पूर्वाग्रह राखेर भिडियो बनाएको होइन

A+ A A-

गायक प्रकाश सपूतले सर्जकलाई निरुत्साहित नपार्न आग्रह गरेका छन् । सपूतको माओवादीका पूर्वलडाकुको कथामा आधारित गीत 'पिर' सार्वजनिक भएपछि उनीमाथि माओवादीका कार्यकर्ता तथा भ्रातृ संगठनहरूले दबाब दएका थिए ।

सोमबार फेसबुकमा स्टाटस लेख्दै प्रकाशले कसैले नियतवश उक्साएर वा कसैले निरन्तर निरुत्साहित गरेर एउटा सर्जकलाई दुविधामा नपार्न आग्रह गरेका हुन् । उनले भिडियो हेरिरहँदा आत्मसम्मानमा चोट पुगेकाहरूमाथि क्षमा समेत मागेका छन् । सपूतले आफूले सिर्जना गरेको गीत र भिडियोको पृष्ठभूमिबारे समेत प्रस्ट पारेका छन् ।

'गीतको पृष्ठभूमिकाबारे केही अवगत गराउन चाहन्छु । ६ वर्षअघि करिब ४ वर्ष दोहोरी साँझमा काम गर्दा गाउने/बजाउने/ पकाउने/ पस्कने मध्यका थुप्रै सहकर्मीहरू पूर्वलडाकु थिए । उनीहरू चरम निराशावादी कुरा गर्थे । त्यो समयमा नै मैले यो विषय डायरीमा नोट गरेको थिएँ । संयोगले अहिले निस्क्यो । यसबाहेक कुनै राजनीतिक पूर्वाग्रह, नियत र उद्देश्य नराखिएको स्पष्ट पार्न चाहन्छु,' उनले भनेका छन्, 'प्रतिकात्मक रूपमा दृश्यहरू निर्माण गरेर बनाएको एउटा कमरेडको कथा हो 'पिर' । योबीचमा मैले यस्ता पात्रहरूको अवस्था, स्वभाव, सोचको अध्ययन गरेँ । केही पात्रहरूसँग भेटेर कुराकानी पनि गरेँ । केही पात्रहरू पढेँ । आम मानिसका भोगाइ र संवेदनाहरू बुने र भिडियो बनाएँ । मेरो पेसा र पहिचान यही हो ।'

विवादले आफूलाई मानसिक तनावसमेत दिएको उनले स्टाटसमा खुलाएका छन् । उनले आफूलाई कुनै राजनीतिक कित्तामा नउभ्याउन समेत आग्रह गरेका छन् । 'मेरो विनम्र अनुरोध मलाई कुनै कित्तामा नउभ्याइदिनु होला ! कुनै विषय जब विवादित बन्छ, त्यो बनेको बन्यै गर्छ । पक्ष /विपक्षमा एकोहोरो भइन्छ ! नेपाली सोसियल मिडियामा यो गलत नजिर स्थापित भएको छ ! विवादले मानसिक तनाव त दिन्छ नै विषयान्तर पनि गर्छ,' उनले लेखेका छन्, 'गीत र भिडियोको भाषा, शैली, प्रस्तुतिलाई कलाका दृष्टिबाट, विचारका दृष्टिबाट हेरौं, समीक्षा गरौँ ! तर गीतले उठाउन खोजेको मुख्य विषयहरूलाई एक पटक इमान्दार भएर विचार गरौँ ।'

हेर्नुस् उनको स्टाटस :

यी पनि पढ्नुस् :

प्रकाश सपूतको ‘पिर’: सर्जकसँग डराएको माओवादी नेतृत्व