ससुरालीमा जस्तै स्वाद र सत्कार दिने सुकदेवको ‘ससुराली’

A+ A A-

‘ए माइलो सालो उहाँहरूलाई खानेकुराको मेन्यु ल्याइदेऊ त', सुकदेव नेपालले पर उभिइरहेका भाइलाई अह्राए । एकैछिनमा मेन्यु बोकेर उनी आए । ‘नानीलाई गार्डेनतिर घुमाइदेऊ है कान्छी साली,’ सुकदेवले छेउमै उभिइरहेकी बहिनीलाई काम लगाए ।

सालो, साली भन्दै बोलाउने यो सुकदेवको साँच्चैको ससुराली घर भने होइन । तर, ‘ससुराली घर’ नामक यो रेस्टुरेन्ट पुग्दा कर्मचारीलाई गरिने सम्बोधन र खानेकुराको स्वादले भने पक्कै ससुराली घर पुगेको अनुभूति गराउनेछ ।

भक्तपुरस्थित दिव्यश्वरी टाउन प्लानिङमा रहेको ससुराली घर पुग्न गेटबाट छिरेपछि लघु सुरुङमार्ग छिचोल्नुपर्छ ।

सुकदेवको ‘ससुराली घर’ पुगेपछि खाना अर्डर गर्दा सालासाली भेटिन्छन् । महिलाका लागि छुट्टै ‘माइतीघर’मा पुग्न सकिन्छ । केटाकेटीका लागि ‘मामाघर’ छँदै छ । यस्तै, नयाँ शैलीमा सुकदेवले साथीहरूसँग मिलेर ६ महिनादेखि रेस्टुरेन्ट चलाइरहेका छन् ।

ससुरालीघरजस्तै ‘ससुराली’

ससुरालीघर भन्नेबित्तिकै ज्वाइँका लागि विशेष घर बुझिन्छ । नेपाली समाजमा ज्वाइँलाई मेजमानी गर्ने चलन छ ससुरालीमा । अझ नेपाली परम्पराअनुसार ज्वाइँ आउनासाथ सिकुवामा राडी ओछ्याएर चरेसको लोटामा पानी दिने चलन कायमै छ । घरमा भन्दा धेरै आतिथ्य पाइने हुनाले पनि होला ज्वाइँहरू ससुराली जान हुरुक्कै हुने । सिन्धुपाल्चोकका सुकदेव पनि त्यही लर्कोमा थिए । ‘ससुरालीमा हुने मानसम्मान देखेरै लोभिएको म ज्वाइँ हुन नसकेपछि आफैँले ससुराली घर खोलेँ', ठट्यौली शैलीमा सुकदेव भन्छन् ।

ससुराली रेस्टुरेन्ट पनि साँच्चैको ससुराली घरभन्दा कम नरहेको सुकदेवको दाबी छ । उनको ससुराली घरमा आउने सबै ग्राहकलाई ज्वाइँकै दर्जा दिएर सम्मान र सत्कार गरिन्छ । नामले मात्र ग्राहकलाई ससुरालीको आतिथ्यता महसुस हुँदैन भन्ने लागेर रेस्टुरेन्टभित्र छिरेपछि ससुरालीकै छनक मिल्ने गरेर यसको डिजाइनिङ गरिएको सुकदेव सुनाउँछन् । ‘यहाँभित्र हामी गाउँघरको भाषा बोल्छौँ । यहाँको सजावट पनि ससुराली नाम सुहाउँदो बनाउने प्रयास गरेका छौँ', उनी भन्छन् ।

मेन्यु पनि ससुरालीकै झल्को आउने खालको बनाइएको छ । ‘ससुराली’को विशेष खाना ज्वाइँ सेट हो । ‘ज्वाइँ सेट नर्मल थकालीभन्दा अलि भिन्न छ,’ सुकेदव प्रस्ट्याउँछन्, ‘ज्वाइँ सेट खाना अर्डर गरेमा वेटरले टेबुलमै ग्राहकको हात धोइदिन्छौँ ।’ ससुराली घरमा ज्वाइँलाई जसरी सत्कार गरिन्छ, त्यस्तै गर्ने प्रयास आफूहरूको रहेको उनी बताउँछन् ।

‘मीठामीठा खानादेखि लिएर सत्कार, स्वागत, बोलिने भाषा सबै ससुरालीकै जस्तो बनाउने कन्सेप्टमा काम गरेका हौँ', सुकदेव भन्छन् । काठमाडौंमा अत्याधुनिक शैलीका रेस्टुरेन्टहरूको भिडमा परम्परागत शैलीको आफ्नो रेस्टुरेन्ट अलग रहेको उनको बुझाइ छ । स्न्याक्समा, मेजमानी सेट छ । गुन्द्रुक, चिकेन, मःम:लगायतका परिकारमा पनि मौलिक स्वाद पस्किने गरेको उनी बताउँछन् । ‘नर्मल रेस्टुरेन्टमा पाइने परिकारलाई हामीले छुट्टै स्वाद र भाषामा पस्किन्छौँ', नेपाल भन्छन् ।

ससुरालीमा कार्यरत वेटरहरूलाई सालोसाली साइनो लगाएर बोलाइने यो रेस्टुरेन्टको अर्काे विशेषता हो । ‘टिमका सबै जनालाई ससुरालीको साइनो लगाएर बोलाउँछौँ', उनी भन्छन् । लेडिज वेटरलाई जेठी साली, माइली साली भनेर बोलाइन्छ । जेन्स वेटरलाई जेठो सालो, माइलो सालो साइनो लाग्छ । म्यानेजरलाई ससुराबा, हेड सेफलाई महाराज र हेल्परलाई भान्से दाइ भनेर बोलाइन्छ ।

यहाँका हरेक स्थानको पनि भिन्दै नाम छ । शौचालयलाई पाइखाना, बारलाई मधुशाला, किचेनलाई भान्छा । छेउमा एउटा सानो कटेज छ, जसको नाम दिइएको ‘माइती घर’ । ‘माइती घर’ मा आउने चेलीका लागि रेस्टुरेन्टले विशेष छुट पनि दिने गरेको सुकदेवले बताए । ‘यो कटेज हामीले महिला, दिदीबहिनीहरूका लागि विशेष बनाएका हाैँ', कटेजतिर देखाउँदै उनले भने, ‘दिदीबहिनीले माइत आएको महसुस गराउने हामीले सोचेका छौँ ।’

पुरुषका लागि ससुराली घर, महिलाका लागी माइतीघर भनेझैँ बालबच्चाका लागि मामाघर छ । ‘मामाघर’मा चक्लेट, आइसक्रिम, पानीपुरी, चटपटे, पिज्जा राखिएका छन् । ‘ससुरालीघर’मा लाइभ म्युजिक पनि हुने गरेको उनी बताउँछन् ।

झापाको वृक्षले ससुराली पुर्‍यायो

इन्जिनरिङका विद्यार्थी हुन्, सुकदेव । एकफेर काम विशेषले इलामबाट फर्कदा झापामा सुकदेवको आँखा वृक्ष होटलमा अडियो । ‘के रहेछ भनेर त्यहाँ पसियो, त्यहाँको वातावरण साह्रै मन पर्‍याे, अनि यस्तै वातावरण भएको रेस्टुरेन्ट काठमाडौंमा सञ्चालन गर्ने सोच बनाएँ', उनी आफ्नो प्रेरणाको स्रोत खुलाउँछन् । खुला ठाउँमा भएको त्यो हरियाली वातावरणमा लोभिएर करिब ६ घण्टाजसो वृक्षमै बसेछन्, उनी । ‘वृक्ष’को त्यो कन्सेप्ट काठमाडौंमा फस्टाउला भन्ने उनलाई लाग्यो । र, ससुराली घर सुरु गरे ।

मानिसहरू रमाइलो, गफगाफ, आफन्त, साथीभाइबीच जमघटका लागि भिडभाडभन्दा शान्त ठाउँमा रम्ने भएकाले खुला र शान्त ठाउँमा रोजेको उनले सुनाए । ‘ससुराली’मा धेरैजसो ग्राहक सपरिवार आउने सुकदेवको अनुभव छ । ‘तर विवाहितका लागि भन्दा पनि अविवाहितका लागि चाहिँ ‘ससुराली’ खास अनुभवजन्य हुन्छ', उनी भन्छन् ।

हुन नसकेको ससुरालीको सम्झनामा

सुकदेव आफ्नी एक जना केटी साथीसँग म्यासेन्जरमा कुरा गरिरहेका थिए । कुरैकुरामा जिस्किन्थे पनि । ‘म ती साथीको घरअगाडिको बाटो पनि हिँडिरहन्थेँ', उनी ती दिन सम्झिँदै भन्छन्, ‘जिस्किएर म हुन नसकेको ससुरालीघर, हुन नसकेका ससुराबा, हुन नसकेकी सासूआमा भन्दै बोल्थेँ । कहिलेकाहीँ भेट्थे पनि । भेट्दा यस्तैयस्तै गफ हुन्थ्याे । उसका बहिनी र भाइलाई पनि हुन नसकेकी साली, हुन नसकेको सालो भनेर बोलाउँथेँ ।

साथीको घरअगाडिको बाटो हिँड्दा पनि हुन नसकेको ससुराली घर हुँदै आइयो भन्ने बानी लागिसकेको थियो, उनलाई । ‘दैनिक कुरा गर्ने भएर होला, यस्ता ससुराली, ससुराबा, सासूआमा, सालासाली भन्ने शब्दहरू दिमागमा खेलिरहन्थे', उनले भने, ‘रेस्टुरेन्ट खोल्ने सोचसँगै यी शब्दहरूलाई समेटेर ससुराली नाम राख्ने निर्णय गरियो ।’

सुरुङसँगको साइनो

इन्जिनियरिङमा स्नातक गरेका सुकदेवले पढे सिकेको पेसालाई निरन्तरता दिन कोटेश्वरमा इन्जिनियरिङ फर्म र कन्स्ट्रक्सन सेवा पनि चलाइरहेका छन् । ससुरालीको अग्र भागमा पनि आफ्नो पेसागत झल्को दिन सुरुङ आकारको एक संरचना निर्माण गरेका छन् ।

रेस्टुरेन्ट र यो सुरुङको के सम्बन्ध छ त ?

‘ओभसियर पढेर पहिलो पटक जागिरका लागि जाँदा म सुरुङको सर्भेयर थिएँ । मेरो जिन्दगीको पहिलो कमाइ नै सुरुङबाट भएको हो', उनी भन्छन्, ‘त्यही सफलताको प्रतिरूप ठानेर रेस्टुरेन्टअगाडि यो संरचना बनाएको हुँ ।’

सुकदेवसहित तीन जनाको संयुक्त लगानीमा ससुराली सञ्चालित छ । गत भदौदेखि सञ्चालन भएको ‘ससुराली’मा दैनिक १ लाखभन्दा बढीको कारोबार हुने गरेको सुकदेव बताउँछन् । विभिन्न सभा समारोहदेखि शुभजन्मोत्सव, जन्मोत्सवसम्मका कार्यक्रम हुन्छन् । अबको केही वर्षभित्रै संयुक्त अरब इमिरेट्सको दुबईमा ‘ससुराली’ शाखा खोल्ने सुकदेवको योजना छ । ‘नेपालका ठूला शहरमा पनि ससुराली विस्तार गर्ने हाम्रो योजना छ', उनले भने ।

नेपालमा युवाहरूलाई व्यवसाय र उद्यम गर्न अझै पनि सहज नरहेको सुकदेवको बुझाइ छ । व्यावसाय गर्ने योजना भए पनि त्यसलाई सुरुवात गर्न कानुनी र प्रक्रियागत झन्झट रहेको सुकदेवको तितो अनुभव छ । ‘मैले २ करोड लगानी गरेर ससुराली रेस्टुरेन्ट स्थापना गर्दा ५० लाख ऋण लिन गाह्रो भयो', उनी भन्छन् । नेपालमै सफल बन्न चाहनेहरूलाई सरकारले कानुनी प्रक्रियामा सहजता ल्याइदिए राम्रो हुने सुकदेव बताउँछन् ।