व्याख्यात्मक घोषणाबारे संसदमा घोचपेच: पातलो कछाडले लाज ढाकेकोदेखि जुँगा जोगाएकोसम्म

व्याख्यात्मक घोषणाबारे संसदमा घोचपेच: पातलो कछाडले लाज ढाकेकोदेखि जुँगा जोगाएकोसम्म

A+ A A-

अमेरिकी सहायता परियोजना एमसीसी पारितका निम्ति तयार भएको व्याख्यात्मक घोषणाबारे संसदमा घोचपेच चलेको छ ।

सत्तारुढ दल माओवादी केन्द्र र एकीकृत समाजवादीका सांसदले अमेरिकाले स्वीकार नगर्ने व्याख्यात्मक घोषणाको औचित्य नरहेको बताएपछि सत्तारुढ दलकै सांसदले उनीहरूमाथि कटाक्ष गरेका हुन् । एमसीसीबारेको सैद्धान्तिक छलफलमा बोल्दै माओवादीका प्रमुख सचेतक देव गुरुङले व्याख्यात्मक घोषणाले संशोधनका विषय समावेश गरे/नगरेकोबारे प्रस्ट हुनुपर्ने मत राखेका थिए ।

'सत्तामा रहेका घटकहरूबीच आज केही संशोधन आकर्षित हुनेगरी घोषणा तयार भएको भनिएको छ । अमेरिकाले स्वीकार गरेमा मात्रै यसको सकारात्मक अर्थ हुन्छ,' गुरुङले भनेका थिए । एकीकृत समाजवादीका नेता झलनाथ खनालले एमसीसीको व्याख्यात्मक घोषणा अमेरिकाले स्वीकार नगर्ने हो भने त्यसको औचित्य नरहेको बताएका थिए ।

'यो व्याख्यात्मक घोषणालाई अमेरिकाले स्वीकार नगरेमा एकतर्फी घोषणाको कुनै अर्थ हुनेछैन । यो संसदले थाहा पाउनुपर्छ, यी घोषणा स्वीकार्न अमेरिका तयार छ वा छैन । यथास्थितिमा नो एमसीसी,' उनले भने ।

माओवादी केन्द्रका सांसद गिरिराजमणि पोखरेल र शक्ति बस्नेतले पनि एमसीसीका विषयमा फरक धारणा बैठकमा राखेका थिए । यस्तै एकीकृत समाजवादीका सांसद जीवनराम श्रेष्ठ, मेटमणि चौधरीलगायतले पनि संसद अवरोध कायम रहेको अवस्थामा एमसीसीमाथि छलफल गर्दा राम्रो सन्देश नगएको बताएका थिए ।

उनीहरूप्रति कांग्रेस सांसद मिनेन्द्र रिजालले कटाक्ष गरेका हुन् । उनले एमसीसीको व्याख्यात्मक घोषणाले एमसीसी परिमार्जन नहुने भन्दै प्रचण्ड र माधव नेपाप्रति व्यंग्य गरे । 'एमसीसीका विषयमा आएको व्याख्यात्मक घोषणाले यसलाई परिमार्जन गर्दैन । यो त कसै-कसैको जुँगा जोगाउन मात्रै आएको हो,' उनले भने ।

यस्तै, जनता समाजवादी पार्टीका संघीय परिषद् अध्यक्ष डा. बाबुराम भट्टराईले एमसीसीका विषयमा जनमानसमा भ्रम सिर्जना गरेर सत्ता घटकले निर्वाचन क्षेत्रमा जान दिने स्थिति समेत बिगारेको बताए । जनतामा भ्रम फिँजाएर व्याख्यात्मक घोषणा ल्याउने काम पातलो कछाडले लाज छोप्नुझैँ भएको भन्दै उनले व्यंग्य गरे ।

'हामीले पहिले बुझाउन सकेनौँ । अहिले बुझ्यौँ र व्याख्यात्मक घोषणासहित एमसीसी पारितका निम्ति तयार भयौँ भनेर जनतालाई बुझाऔँ,' उनले भने, 'सत्ता छोड्न सकिएन, त्यसैले पातलो कछाड लगाएर लाज छोप्न व्याख्यात्मक टिप्पणी गर्‍यौँ नभनौँ ।'

प्रकाशित मिति: आइतबार, फागुन १५, २०७८ १९:०७