गठबन्धन जोगाउने प्रचण्ड-माधव सुत्र : असहमतिका बुँदासहित एमसीसी पास गर्ने

A+ A A-

अमेरिकी सहायता परियोजना एमसीसीका कारण सत्ता गठबन्धन भत्किन नदिन माओवादी केन्द्र र एकीकृत समाजवादीले वैकल्पिक उपाय खोजेका छन् । उनीहरूले संसदबाट एमसीसी पारितका निम्ति आफूहरूले राख्दै आएको असहमतिका बुँदा पनि अनुमोदन गर्ने उपाय निकालेका हुन् । यस उपायलाई उनीहरूले व्याख्यात्मक घोषणा भनेका छन् ।

माओवादी केन्द्रका अध्यक्ष पुष्पकमल दाहाल प्रचण्ड र एकीकृत समाजवादीका अध्यक्ष माधवकुमार नेपालले यस विषयमा छलफल गरेका हुन् । एमसीसी अनुमोदन गरेरै गठबन्धन जोगाउनुपर्ने बाध्यता भएकाले आफ्नाे दललले राखेका असहमतिका बुँदालाई पनि संसदको स्वामित्व बनाउनुपर्ने उपाय उनीहरूले निकालेका हुन् ।

यसो गर्दा एमसीसी पारितका निम्ति कांग्रेसको जोडलाई पनि सघाउ पुग्ने र आफूहरूको असहमति पनि संसदले अनुमोदन गर्दा कानुन सरह हुने भएकाले व्याख्यात्मक घोषणा पारित गरेर एमसीसी अनुमोदन गर्ने उपाय दुई दलले निकालेका हुन् ।

शनिबार सिंहदरबारमा एकीकृत समाजवादीसँगको छलफलपछि माओवादी केन्द्रका अध्यक्ष प्रचण्डले गठबन्धन जोगिने र एमसीसी पनि पारितका लागि उपाय निकालिएको दाबी गरेका थिए । 'एमससी सहमतिकै आधारमा अघि बढ्छ । यो समस्याको समाधानका निम्ति हामी लागिपरेका छौँ । गठबन्धन पनि टुट्दैन र एमसीसी पनि सहमतिकै बाटोबाट अघि बढ्छ,' प्रचण्डले भने।

माओवादी केन्द्रका नेता हरिबोल गजुरेलले आफ्नो पार्टी कहिल्यै पनि एमसीसी खारेजीको पक्षमा नरहेकाले मध्यमार्गी बाटोबाट अघि बढ्न तयार रहेको बताए । एमसीसीका बुँदा परिमार्जन गर्नुपर्ने मत रहेका कारण आफ्नो दलको असहमतिका बुँदा पनि संसदबाट अनुमोदन गराउने विकल्प अघि सारिएको उनको भनाइ छ । 'नेपालको हितसँग बाजिएका कुराहरूलाई संसदबाट अनुमोदन गराउँदा यो विषय कानुन सरह हुन्छ । व्याख्यात्मक घोषणामा यी विषय पर्दा हाम्रा चासो पनि सम्बोधन हुनेछ, 'गजुरेलले भने, 'गठबन्धन जोगाउनका निम्ति हामी वीन-वीन स्थिति हुनेगरी समझदारीमा आएका हौँ।'

संसदबाट अनुमोदन गराउने व्याख्यात्मक घोषणामा एमसीसीबारे जनमानसमा उठेका प्रश्नलाई समावेश गरिने गजुरेलले बताएका छन् । ती विषयमा एमसीसी हिन्द प्रशान्त रणनीतिअनुसार रहे/नरहेको, कार्यान्वयनका क्रममा राष्ट्रिय हितको सुनिश्चतता र यो सम्झौता नेपालको पूर्णकानुन अधिनमा रहेको लगायतका विषय समावेश हुने उनले बताए ।

एमसीसी पारित गर्नुअघि संकल्प प्रस्ताको अनुमोदन गर्नुपर्ने विषय नेकपाकालीन अवस्थादेखि नै माग हुँदै आएको थियो । पछिल्लो समयमा शीर्ष नेताहरूको बैठकमा कांग्रेस महामन्त्री गगन थापाले यस विषयलाई फेरि उठाएका थिए । उनले यसमा नेपाल सरकाले अमेरिकालाई पठाएको प्रश्न र त्यसको जवाफ पनि उल्लेख गरेर सम्झौता कार्यान्वयनका क्रममा दायाँ-बायाँ गरे एमसीसी नै खारेज हुने प्रस्ताव उल्लेख गर्न उपाय सुझाएका थिए ।

एकीकृत समाजवादी पनि आफ्ना असहमतिका विषय पनि संसदको स्वामित्त्व बन्ने भएपछि यो विकल्पमा तयार देखिएको छ । यसमा के-के विषय समावेश गर्ने भनेर उसले आफू निकट अन्तराष्ट्रिय कानुन विज्ञ गोविन्द बन्दीसँग पनि परामर्श गरिसकेको छ ।

उनी सहितका अन्य कानुन व्यवसायीको परामर्शमा व्याख्यात्मक बुँदा के-के समावेश गर्ने भन्ने खाका तयार भइसकेको छ । एकीकृत समाजवादीका प्रवक्ता जगन्नाथ खतिवडाले यस विषयमा आइतबारको स्थायी कमिटी बैठकले निर्णय लिने बताएका छन् । 'शीर्ष नेताबीच छलफल भएको मध्यमार्गी विकल्पको विषयमा भोलि स्थायी कमिटी बैठकमा छलफल हुनेछ । अहिलेसम्म हाम्रो दलको तर्फबाट केही निर्णय भएको छैन । भोलि उपयुक्त उपाय सुझाउनेछौँ,' उनले भने । एकीकृत समाजवादीकाे भाेलि स्थायी कमिटी बैठक बस्दैछ ।

एमसीसी पारितका लागि सत्ता गठबन्धनबाट विश्वासिलो आधार नआएपछि प्रधानमन्त्री शेरबहादुर देउवाले एमाले अध्यक्ष केपी ओलीसँग निरन्तर संवाद जारी राखेका छन् । प्रधानमन्त्री देउवा र प्रतिपक्षी दलका नेता ओलीबीचको निरन्तर संवादबाट झस्किएका माओवादी केन्द्र र एकीकृत समाजवादीले असहमतिका बुँदासमेत अनुमोदन गरेर एमसीसी पारितको उपाय निकालेका हुन् । व्याख्यात्मक घोषणा अनुमोदन हुने स्थितिमा उनीहरू एमसीसीका पक्षमा मतदानका लागि सकरात्मक देखिन्छन् ।

प्रकाशित मिति: शनिबार, फागुन १४, २०७८ २१:५६