सत्ता गठबन्धन जोगाएरै एमसीसी अनुमोदन गर्न तीन विकल्पबारे छलफल

A+ A A-

संसदमा टेबल भएको एमसीसी अनुमोदन गर्ने र सत्ता गठबन्धन पनि निरन्तरता दिने विकल्पमा सत्ता गठबन्धमा छलफल सुरु भएको छ । त्यसैका लागि सत्ता गठबन्धनमा रहेका दलका शीर्ष नेताहरू सक्रिय भएका हुन् । उच्च राजनीतिक स्रोतका अनुसार सत्ता गठबन्धनबीच तीनवटा विकल्पमा छलफल सुरु हुन थालेको छ ।

स्रोतका अनुसार एउटा विकल्पको रूपमा माओवादी केन्द्र र एकीकृत समाजवादीले विपक्षमा मतदान नगर्ने तर संसदमा अनुपस्थित भएर एमसीसी अनुमोदन गर्न सकिने विकल्पमा छलफल चलेको छ । यो विकल्पबारे पहिलादेखि नै छलफल चलेको थियो ।

प्रधानमन्त्री शेरबहादुर देउवाले पनि यसबारे प्रचण्ड र माधव नेपाललाई सुझाव दिइसकेका थिए । तर, उनीहरू एमसीसीको विपक्षमा उभिने निर्णयमा पुगेपछि कांग्रेसले एमालेसँग संवाद अगाडि बढाएको थियो । अहिले पुनः त्यही विकल्पमा छलफल हुन थालेको हो ।

अर्को विकल्प भनेको अमेरिकासँग फेरि केही समय माग्ने । एमसीसी मुख्यालयलाई टेबल भएको एमसीसी सम्झौता अगाडि बढाउने तर केही समय चाहिने भन्दै अमेरिकालाई आश्वस्त बनाउनेबारेमा पनि छलफल हुन थालेको छ । त्यसका लागि देउवा, प्रचण्ड र नेपाल तीनै जना नेताले विशेष आग्रह गर्नेगरी अगाडि बढ्नेमा छलफल भइरहेको माअ‍ोवादीका पूर्व एक स्थायी समिति सदस्यले बताए । ती सदस्यका अनुसार यो विकल्पमा जान अहिले निकै सहज वातावरण पनि बनेको छ ।

अमेरिकाले दिएको १६ फागुनसम्मको म्याद सकिने जम्मा दुई दिनमात्रै बाँकी रहेको र उक्त दुई दिनमा एमसीसी संसदबाट अनुमोदन हुने सम्भावना कम भएकाले यो विकल्पमा पनि छलफल हुन थालेको हो । ती नेताले शिलापत्रसँग भने, ‘पहिला अमेरिका संसदमा टेबल नै नहोला भन्ने डरमा थियो, अब टेबल भइसकेका कारण देशभित्र भएको राजनीति धुव्रीकरणको विषयलाई देखाएर अमेरिकासँग समय थप्न सकिनेबारेमा छलफल हुन थालेको हो । यसमा कांग्रेसका केही नेताहरू पनि सकरात्मक देखिएका छन् ।’

तर, यसमा एमसीसी मुख्यालयले केही दफाहरूको थप स्पष्टीकरण भने दिनु पर्नेबारेमा पनि कुराकानी हुन थालेको छ । यता, अर्को विकल्प भने संसदमा विशेष समिति बनाउने । सभामुखले विशेषाधिकार प्रयोग गरेर राष्ट्रिय महत्वका विषयमा थप अध्ययन आवश्यक परेको खण्डमा संसदमा विशेष समिति बनाउन सक्ने व्यवस्था छ ।

त्यही अधिकार प्रयोग गरेर केही महिना समय दिएर विशेष अध्ययन समिति बनाउने र उक्त समितिले दिएको सुझाव र निष्कर्षलाई पनि साथै राखेर एमसीसी अनुमोदन गर्ने गरी अगाडि बढ्नेबारेमा पनि छलफल भएको हो । त्यसैकारण माओवादीले गठबन्धन जाेगाउन अन्तिम प्रयास गर्ने बताएकाे छ । नेताहरूसँगकाे छलफलमा शुक्रबार बिहान गठबन्धन जाेगाउनुपर्ने बाध्यता रहेकाे सुनाएका थिए ।

एकीकृत समाजवादीका एक पदाधिकारीले सकेसम्म गठबन्धन जोगाउने र एमसीसी अनुमोदन गर्ने वातावरण बनाउन विकल्पहरूमाथि छलफल भइरहेको छ । त्यसैकारण शनिबारमात्रै काठमाडौं आउने माधव नेपालले समय छोट्याएर शुक्रबार बिहानै काठमाडौं फर्किएका छन् । काठमाडौं आउनेवित्तिकै अध्यक्ष नेपालले प्रधानमन्त्री शेरबहादुर देउवासँग बालुवाटार संवाद गरेका छन् ।

कांग्रेस र एमालेबीच संवाद सकारात्मक नभएपछि गठबन्धन जोगाउने विषयमा कांग्रेसका नेताहरू सकारात्मक देखिएका छन् । सभामुख अग्निप्रसाद सापकोटालाई हटाउन एमालेको प्रस्ताव स्वीकार गर्दा सभामुख एमालेकै भागमा पर्न सक्ने भएकाले एमालेकै राष्ट्रपति र सभामुख हुँदा आफू झन् अप्ठ्यारोमा पर्ने कांग्रेसभित्र विश्लेषण भइरहेको छ ।

संसदको सबैभन्दा ठूलो र प्रतिस्पर्धी दलसँग सहकार्य गर्दा आफू थप कमजोर भइने विश्लेषण पनि कांग्रेसभित्र हुन थालेको छ । कांग्रेस उपसभापति पूर्णबहादुर खड्का, रामचन्द्र पौडेल, विजय गच्छदार, कृष्ण सिटौलालगायतका नेताहरू अहिलेको गठबन्धनलाई निरन्तरता दिनुपर्ने पक्षमा उभिएका छन् ।

प्रकाशित मिति: शुक्रबार, फागुन १३, २०७८ १४:४१