सरकार छोड्ने चेतावनी दिएका प्रचण्डको आन्तरिक ब्रिफिङ- गठबन्धन नजोगिए सहज छैन

सरकार छोड्ने चेतावनी दिएका प्रचण्डको आन्तरिक ब्रिफिङ- गठबन्धन नजोगिए सहज छैन

A+ A A-

सत्तारुढ दल नेकपा माओवादी केन्द्रका अध्यक्ष पुष्पकमल दाहाल प्रचण्डले पाँच दलीय गठबन्धन भत्किए आगामी राजनीतिक बाटो सहज नहुने भन्दै गठबन्धन जोगाउने कसरत जारी राख्ने ब्रिफिङ गरेका छन् ।

पार्टीका पूर्वस्थायी कमिटी सदस्यलाई ब्रिफिङ गर्दै अध्यक्ष प्रचण्डले गठबन्धन नजोगिए आगामी राजनीतिक बाटो कठिन हुने बताएका हुन् । संसदको पूर्ण कार्यकाल नै गठबन्धनले सरकार चलाउने प्रतिवद्धता जनाएकाले अमेरिकी सहायता परियोजना एमसीसीकै कारण गठबन्धन भत्किन दिन नहुने मत प्रचण्डले राखेका हुन् ।

बैठकमा प्रचण्डको भनाइ उद्दृत गर्दै नेता हरिबोल गजुरेलले भने, 'यो गठबन्धन भत्किन दिन हुँदैन । गठबन्धन भत्किँदा कांग्रेसलाई पनि कठिन छ, त्योभन्दा बढी हामीलाई अप्ठ्यारो पर्छ । त्यसैले गठबन्धन जोगाएर अघि बढ्नुपर्छ ।'

बैठकमा प्रचण्डले बाम गठबन्धन बन्ने परिस्थिति पनि नभएकाले पाँच दलीय गठबन्धन जोगाउन आफू केन्द्रित हुने बताएको एक नेताले बताए । 'एमालेसँगको छलफलमा सहकार्यको सम्भावना बनेन । हाम्रै सभामुख हटाउनुपर्ने माग छ । प्रधानमन्त्री शेरबहादुर देउवासँग पनि हामीलाई नबोक्न आग्रह गरेको स्थितिमा बाम गठबन्धनको सम्भावना पनि देखिँदैन,' प्रचण्डले बैठकमा भनेका छन् ।

एमालेसँगको सम्भावित सहकार्यका विषयमा प्रचण्डले बिहीबार छलफल गरेका थिए । त्यस बैठकमा अध्यक्ष ओलीले २८ कात्तिकमा राजनीतिक प्रतिवेदनमार्फत आफूमाथि लगाइएको आरोप खारेज हुनुपर्ने, आफ्नो पार्टी विभाजनमा सभामुख अग्निप्रसाद सापकोटाले भूमिका निर्वाह गरेकाले एमालेले १४ सांसदमाथि गरेको कारबाही सदर हुनुपर्ने माग अघि सारेका थिए ।

बैठकले एमसीसीका विषयमा विपक्षमै मतदान गर्ने निर्णयमा अडिग हुने निष्कर्ष निकालेको नेता नारायणकाजी श्रेष्ठले बताए । 'यथास्थितिमा एमसीसीमा समर्थन जनाउनु हुँदैन भन्ने अडानबाट पार्टी पछि नहट्ने भन्ने नै छ । गठबन्धन जोगाउने विकल्पमा भने शीर्ष नेताबीच छलफल गरेर निष्कर्ष निकाल्ने अध्यक्षले बताउनुभएको छ,' श्रेष्ठले भने ।

प्रचण्डले गठबन्धन जोगाउने उद्देश्यसहित शीर्ष नेतासँग छलफल गर्ने भएका छन् । उनले धनगढी पुगेका एकीकृत समाजवादीका अध्यक्ष माधव नेपाललाई फोन गरेर राजधानी बोलाएका छन् । 'गठबन्धन जोगाउने उद्देश्यसहित आफूले गठबन्धनका शीर्ष नेतासँग छलफल गर्ने र केही मध्यमार्गी उपाय निकाल्न प्रयास गर्ने भन्नुभएको छ,' नेता गजुरेलले भने ।

एमसीसीको संसदीय अनुमोदनका निम्ति दलीय छलफल अझै आवश्यक भएको भन्दै संसद बैठक पनि आइतबारसम्मका लागि स्थगित गरिएको छ । कानुनमन्त्री दिलेन्द्र बडुले सभामुख अग्नि सापकोटालाई भेटेर बैठक स्थगित गर्न आग्रह गरेका थिए । एमसीसीमा जसरी पनि पास गराउने प्रधानमन्त्री देउवाको तयारी छ । एमसीसीका सवालमा देउवा र प्रचण्डले एक-अर्कालाई दबाबमा राख्ने कोसिस गरिरहेका छन् ।

दुवै दलले प्रतिपक्षी एमालेसँग सम्भावित सहकार्यका निम्ति पहल गरेका थिए । आसन्न निर्वाचनमा बाम गठबन्धन बस्न सक्ने परिस्थिति देखा नपरेकाले प्रचण्ड वर्तमान गठबन्धन नै जोगाउनुपर्ने निचोडमा पुगेका छन् । प्रधानमन्त्रीसँग भेट गरेर मध्यमार्गी उपाय निकाल्ने प्रचण्डको भनाइ छ ।

प्रकाशित मिति: शुक्रबार, फागुन १३, २०७८ १३:४१