देव गुरुङलाई प्रश्न : प्रचण्डले ओलीलाई प्रधानमन्त्रीको प्रस्ताव गर्नुभएको हो ?

देव गुरुङलाई प्रश्न : प्रचण्डले ओलीलाई प्रधानमन्त्रीको प्रस्ताव गर्नुभएको हो ?

A+ A A-

अमेरिकी सहायता परियोजना एमसीसीमा कांग्रेससँग मतभेद भएपछि माओवादी केन्द्रले सरकार छाड्ने चेतावनी दिइरहेको छ । बिहीबार मात्रै प्रधानमन्त्री शेरबहादुर देउवासँगको छलफलमा माओवादी केन्द्रका अध्यक्ष पुष्पकमल दाहाल प्रचण्डले एमसीसी पारित भएमा सरकार छाड्ने जानकारी गराएका थिए । एमसीसी पास भए कांग्रेससँगको सहकार्य अन्त्य गर्ने चेतावनी दिइरहेको माओवादी केन्द्रले बिहीबार एमालेसँग लामै छलफल गरेको छ । बानेश्वरस्थित संसद भवनमा दुई दलबीच के-के कुरा भयो । के माओवादी केन्द्रले कांग्रेसँगको साथ तोडेर एमालेसँग सहकार्य गर्न लागेको हो बैठकमा सहभागी माओवादीका प्रमुख सचेतक देव गुरुङलाई शिलापत्र संवाददाता शिशिर ढकालले प्रश्न गरेका छन् ।

माओवादी र एमालेबीच निकै लामो छलफल भयो छलफल के विषयमा केन्द्रित थियो ?

अमेरिकी सहायता परियोजना एमसीसीबारे कांग्रेससँग मत नमिलेपछि हाम्रो पार्टीका अध्यक्ष प्रचण्डले एमाले अध्यक्ष केपी ओलीसँग छलफल गर्नुभयो । बैठकमा आ-आफ्ना चासो र चिन्ताको विषय राखियो । एमसीसी र राष्ट्रिय राजनीतिको सेरोफेरोमा कुराकानी भएको छ ।

कांग्रेससँग खटपटपछि संभावित सहकार्यको विषयमा छलफल भएको चर्चा छ बैठकमा के-के विचार प्रकट भयो ?

एमालेले बैठकमा पुरानै कुरा उठाएको छ । सभामुखले पार्टी विभाजनमा भूमिका निर्वाह गरेको आरोप लगाउँदै त्यस कदमलाई सभामुखले सच्याउनुपर्ने विषय एमालेले उठाएको छ । एकीकृत समाजावदीका १४ सांसदलाई वैध मान्न नसकिने कुरा एमाले अध्यक्षले राख्नुभयो । यस्तै नेकपाकालीन अवस्थामा पेस भएका राजनीतिक दस्तावेज खारेज गर्नुपर्ने भन्दै एमाले अध्यक्षले विगतको समीक्षा गर्नुभयो ।

तपाइँहरूले बैठकमा के प्रस्ताव राख्नुभयो त ?

हामीले विगतका विषयमा समीक्षा गर्न तयार नै छौँ भन्यौँ । सबै समीक्षा अहिले संभव छैन पछि पछि गर्दै जाऔँला । अहिले संसदमा एमसीसीको विषय अघि बढेको छ । यो छिट्टै टुंग्याउनुपर्ने प्रधानमन्त्रीको जोड छ । तर, यो विषय राष्ट्रिय हितमा नरहेकाले खारेज गर्ने पक्षमा रहेको जानकारी गरायौँ । कांग्रेस पास गर्नुपर्नेमा अडिग छ । दुई पार्टीबीच मतभेद भयो । अब यो विषय तपाइँहरूको हातमा छ । तपाइँहरूको साथ कता हो के हो प्रस्ट हुनुपर्‍यो भन्यौँ ।

एमसीसीमा तपाइँहरूले प्रस्ट हुनुपर्‍यो भनिरहँदा एमालेको धाराणा के आयो त ?

हामी एमसीसीको प्रक्रियामा सहभागी छैनौँ भन्ने जवाफ एमाले अध्यक्षले दिनुभयो । दोस्रो कुरा यो विषय राष्ट्रघाती र जनघाती नरहेको उहाँको मत रह्यो । यो विषय राष्ट्रघाती नभएकाले नै हाम्रै सरकारको पालामा संसदमा दर्ता गरिएको भन्नुभयो । त्यसबेला अनुमोदन भएन । अहिले अनुमोदनको प्रक्रिया चलिरहेको तर, यस प्रक्रियामा एमालेको कुनै सहभागिता नरहेको बताउनुभयो ।

बैठकमा प्रचण्डले एमाले अध्यक्ष ओलीलाई प्रधानमन्त्रीको प्रस्ताव गर्नुभएको हो ?

संयुक्त बैठकमा सरकारको विषयमा कुनै पनि छलफल भएन । उहाँहरू दुई जनाबीच मात्रै छुट्टै छलफल भएको थियो । यो विषयमा दुबै जनाले केही पनि भन्नुभएको छैन ।

के कांग्रेससँग सहकार्यको स्थिति अब अन्त्य हुँदै गएको हो ?

एजेण्डा नै फरक पर्‍यो । राष्ट्रियताको मुद्दानै फरक पर्‍यो त । उहाँहरू एमसीसीको समर्थनमा हामीहरू एमसीसीको विरोधमा अनि सहकार्य कसरी संभव हुन्छ त ?

प्रकाशित मिति: बिहीबार, फागुन १२, २०७८ १९:२५