महान्यायाधिवक्ता खातीको दबाबपछि साधारण तारेखमा छुटे बख्रेल

A+ A A-

बिइङ ह्युमन क्लोदिङ स्टोरका सञ्चालक पर्साका ३९ वर्षीय सन्तोषचन्द्र बख्रेल थुनामुक्त भएका छन् ।

जिल्ला सरकारी वकिल कार्यालयले साधारण तारेखमा छोड्न निर्देशन दिएपछि औषधि व्यवस्था विभागको थुनामा रहेका बख्रेल छुटेका हुन् । औषधि व्यवस्था विभागका निर्देशक भरत भट्टराईले सरकारी वकिल कार्यालयको रायअनुसार नै बख्रेल छुटेको बताए ।

‘सरकारी वकिलको कार्यालयको रायअनुसार नै हामीले उनलाई तारेखमा छाडेका हौँ । तारेखमा रहँदा पनि सोधपुछ गर्ने काम हुन्छ,’ शिलापत्रसँग भट्टराईले भने । विभाग स्रोतका अनुसार उनी शक्ति केन्द्रको चर्को दबाबमा साधारण तारेखमा छुट्न सफल भएका हुन् ।

बख्रेलमाथि सुत्केरी हुँदा प्रयोग हुने निषेधित औषधि ट्रामाडोलको कारोबार गरेको खुलेको थियो । सोही अभियोगमा उनीमाथि विभागले अनसुन्धान गरिरहेको थियो । तर, सरकारी वकिल कार्यालयको निर्देशनपछि उनी छुटेका हुन् । बख्रेललाई महानगरीय अपराध महाशाखाको टोलीले १५ माघमा भारतबाट अवैध रूपमा महँगा ब्रान्डका मदिरा नेपाल भित्र्याएको अभियोगमा पक्राउ गरेको थियो ।

बख्रेलले अवैध रूपमा नेपाल भित्र्याएको २ सय ९६ कार्टुन ब्ल्याक लेबल, रेड लेबल, चिभास रिगल र एब्सुलेट भोड्का प्रहरीले बरामद गरेको थियो । पक्राउ परेलगत्तै राजस्व अनुसन्धान विभाग पठाइएका बख्रेललाई राजस्व अनुसन्धान विभागले भने उनीमाथि एक करोड ६५ लाख रुपैयाँ धरौटी मागेको थियो ।

धरौटी बुझाएर छुट्न खोजेका बख्रेलको औषधिमा समेत अवैध कारोबारको धन्दा खुलेपछि विभागले अनुसन्धान गरेको थियो । त्योबाहेक बख्रेलको अवैध सूर्तीजन्य पदार्थसमेत फेला परेको थियो । बख्रेलसँगै उनका सहयोगी काठमाडौं कागेश्वरीका ३० वर्षीय शैलेश पन्त, पर्साका २८ वर्षीय रविन पाख्रिन, सर्लाही बरथवाका ३८ वर्षीय नारायणप्रसाद घिमिरे पनि पक्राउ परेका थिए । तर, उनीहरू भने यसअघि नै छुटेका थिए ।

प्रहरीको अनुसन्धानले बख्रेलले बिइङ ह्युमनको नाममा बिक्री गर्ने विश्व बजारमा पाइने महँगा ब्रान्डका कपडा भित्र्याउँदा पनि राजस्व छली गरेर ल्याउन सक्ने आशंका गरेको छ । बिइङ ह्युमन क्लोदिङ फाउण्डेसन बलिउड स्टार सलमान खानको हो ।राजस्व छलीदेखि निषेधित औषधि कारोबारमा समेत संलग्न बख्रेलमाथि प्रहरीको लागूऔषध नियन्त्र ब्युरोले समेत अनुसन्धान गरिरहेको छ ।

तर, शक्ति केन्द्रको दबाबमा ब्युरोलाई अनुसन्धानका लागि नबुझाइ छोडिएको रहस्य खुलेको छ । बख्रेललाई छुटाउन महान्यायाधिवक्ता खम्मबहादुर खातीदेखि कांग्रेसका केन्द्रीय सदस्य कुन्दन काफ्लेसम्मले दबाब दिएको आषैधि विभागका एक कर्मचारीले बताए । कांग्रेस नेताबाहेक अख्तियार दुरुपयोग अनुसन्धान आयोगबाट पनि बख्रेललाई छुटाउन दबाब दिइएको विभागका कर्मचारी बताउँछन् ।