एक करोड ६५ लाख धरौटी बुझाउँदा पनि छुटेनन् बिइङ ह्युमनका सञ्चालक बख्रेल

A+ A A-

बिइङ ह्युमन क्लोदिङ स्टोरका सञ्चालक पर्साका ३९ वर्षीय सन्तोषचन्द्र बख्रेलको अवैध धन्दा एकपछि अर्को खुल्दै गएको छ । भारतबाट अवैध रूपमा महँगा ब्रान्डका मदिरा नेपाल भित्र्याएको अभियोगमा पक्राउ परेका बख्रेलमाथि हाल औषधि व्यवस्था विभागले अनुसन्धान गरिरहेको छ ।

बख्रेललाई महानगरीय अपराध महाशाखाको टोलीले राजस्व छली अभियोगमा १५ माघमा पक्राउ परेको थियो । प्रहरीले बख्रेलले अवैध रूपमा नेपाल भित्र्याएको २ सय ९६ कार्टुन ब्ल्याक लेबल, रेड लेबल, चिभास रिगल र एब्सुलेट भोड्का बरामद गरेको थियो ।

पक्राउ लगत्तै बख्रेललाई महाशाखाले राजस्व अनुसन्धान विभाग पठाएको थियो । राजस्व अनुसन्धान विभागले उनीमाथि एक करोड ६५ लाख रुपैयाँ धरौटी मागेको विभागका प्रवक्ता टंक पाण्डेले बताए । ‘हामीले कर छलीमा धराैटी मागेका हाैं, धराैटी त बुझाइ सक्नुभयाे । तर, उनीमाथि अरु पनि अनुसन्धान गर्नु छ भन्दै फेरि प्रहरीले नै लियो,’ पाण्डेले भने ।

विभागले मागेको धरौटी बुझाए पनि उनी थुनामुक्त भने हुन सकेका छैनन् । बख्रेलको अर्को अवैध धन्दा सुत्केरी हुँदा प्रयोग हुने निषेधित औषधि ट्रामाडोलको कारोबारमा समेत संलग्न भएको खुलेपछि औषधि व्यवस्था विभागले उनीमाथि अनुसन्धान जारी राखेको छ ।

मदिरादेखि निषेधित औषधिको समेत कारोबार गर्ने बख्रेलको घरबाट प्रहरीले अवैध सुर्तीजन्य पदार्थसमेत फेला परेको थियो ।
प्रहरीले बख्रेलसँगै उनका सहयोगी काठमाडौं कागेश्वरीका ३० वर्षीय शैलेश पन्त, पर्साका २८ वर्षीय रविन पाख्रिन, सर्लाही बरथवाका ३८ वर्षीय नारायणप्रसाद घिमिरेलाई समेत पक्राउ गरेको थियो ।

प्रहरीको अनुसन्धानले बख्रेलले विगत तीन महिनादेखि भारतबाट राजस्व छली गरेर मदिरा भित्र्याएर बिक्रीवितरण गरिरहेको खुलेको छ । प्रहरीको अनुसन्धानले बख्रेलले बिइङ ह्युमनको नाममा बिक्री गर्ने विश्व बजारमा पाइने महँगा ब्रान्डका कपडा भित्र्याउँदा पनि राजस्व छली गरेर ल्याउन सक्ने आशंका गरेको छ ।

बिइङ ह्युमन क्लोदिङ फाउण्डेसन बलिउड स्टार सलमान खानको हो । राजस्व छलीदेखि निषेधित औषधि कारोबारमा समेत संलग्न बख्रेललाई छुटाउन शक्ति केन्द्रबाट औषधि विभागदेखि राजस्व विभागमा दबाब आएको औषधि विभागका एक अधिकारीको भनाइ छ ।

ती अधिकारीका अनुसार बख्रेललाई छुटाउन महान्याधिवक्ता खम्मबहादुर खातीदेखि कांग्रेसका केन्द्रीय सदस्य कुन्दन काफ्लेले दबाब दिएका हुन् । ‘महान्यायाधिवक्तादेखि काफ्ले र अन्य कांग्रेसकै केही नेताहरूले समेत चासो राखेका थिए । ठ्याक्कै छोड्दिनु भनेनन् तर आशय सहज गर्दिनु भन्ने नै थियो,’ ती अधिकारीले भने । प्रहरीले राजस्व छलीको मदिरासहित पक्राउ गर्दा समेत उनीहरूले चासो देखाएका थिए ।

प्रकाशित मिति: शुक्रबार, माघ २८, २०७८ १४:३७