‘अप्रेसन लिमा’ : चार हजारमा रेड लेबलको डिल गरेर गोदामसम्म यसरी पुग्यो प्रहरी

‘अप्रेसन लिमा’ : चार हजारमा रेड लेबलको डिल गरेर गोदामसम्म यसरी पुग्यो प्रहरी

A+ A A-

उपत्यकाको महँगो सपिङ क्षेत्र हो– दरबारमार्ग । त्यहीँ छ, पर्साका ३९ वर्षीय सन्तोषचन्द्र बख्रेलले सञ्चालन गरेको बिइङ ह्युमन क्लोदिङ स्टोर । क्लोदिङ फाउन्डेसन बलिउड स्टार सलमान खानको हो ।

बिइङ ह्युमनले विश्वबजारमा पाइने महँगा ब्रान्डका कपडा बच्ने काम गर्छ । उनै बख्रेलले बिइङ ह्युमनमार्फत गरेकाे कर्तुतसमेत सार्वजनिक भएको छ । बख्रेलले भारतबाट अवैध रूपमा महँगा ब्रान्डका मदिरा नेपाल ल्याएर बिक्रीवितरण गरिरहेकाे खुलेको छ ।

शुक्रबार महानगरीय अपराध महाशाखाले बरामद गरेको राजस्व छली गरेको २ सय ९६ कार्टुन ब्ल्याक लेबल, रेड लेबल, चिभास रिगल र ऐब्सुलेट भोड्का उनै बख्रेलले नेपाल भित्र्याएको खुलेको छ ।

सोही अभियोगमा प्रहरीले बख्रेलसहित काठमाडौं कागेश्वरीका ३० वर्षीय शैलेश पन्त, पर्साका २८ वर्षीय रविन पाख्रिन, सार्लाही वरथवाका ३८ वर्षीय नारायणप्रसाद घिमिरेलाई पक्राउ गरेको छ ।

बाख्रेले रवि भन्ने भारतीय नागरिकबाट उक्त मदिरा नेपाल भित्र्याउने गरेको खुलेको प्रहरीले जनाएकाे छ । प्रहरीको अनुसन्धानले बख्रेल लागुऔषध कारोबारका फरार आरोपी भएको समेत खुलासा गरेकाे छ । उनले सुत्केरी हुँदा प्रयोग हुने निषेधित औषधि ट्रामाडोलको कारोबारमा संलग्न भएको खुलेको प्रहरी अधिकारीको भनाइ छ ।

उनीबाहेक गत मंसिरमा बिइङ ह्युमनका म्यानेजर पनि पक्राउ परेका थिए । महानगरीय प्रहरी परिसरको टोलीले स्रोत नखुलेको ६५ लाख रुपैयाँ बरामद गरेको थियो ।

'अप्रेसन लिमा'मार्फत यसरी पुग्याे प्रहरी गाेदाममा

प्रहरीले कर छलीको करिब डेढ करोड रुपैयाँबराबरको मदिरा नियन्त्रण गर्न दुई साता लामो अप्रेसन चलायो । महानगरीय अपराध महाशाखाले साे अप्रेसनकाे नाम ‘अप्रेसन लिमा’ राखेकाे थियाे।

महानगरीय अपराध महाशाखाका प्रमुख वरिष्ठ प्रहरी उपरीक्षक (एसएसपी) वसन्तबहादुर कुवँरका अनुसार सुरुमा प्रहरीलाई महंगोको ब्रान्डको रक्सी सस्तो मूल्यमा उपलब्ध गराउने गिरोह सक्रिय रहेको सूचना आएको थियो ।

त्यही सूचना भेरिफाई गरेर प्रहरीले ‘अप्रेसन लिमा’ नाम दिएर गिरोहको पछाडि लागेको कुवँरले बताए । सुरुमा प्रहरी टाेलीले ग्राहक बनेर बानेश्वरकै एक मदिरा पसलमा रेड लेबलको ‘डिल’ गरेकाे थियाे ।

प्रहरीले भनेअनुसार नै सुरुमा १४ कार्टुन रेड लेबल गिरोहका सदस्यले बानेश्वरको मदिरा पसलमा पुर्‍याए । तर, प्रहरीले रेड लेबलको कार्टुनलाई त्यहीँ राखेर थप आवश्यक रहेको भन्दै थप डिल गर्‍यो ।

प्रहरीले सुरुमा एक बोतल रेड लेबलको ४ हजार रुपैयाँको हिसाबले डिल गरेको थियो । प्रहरीसँग त्यसरी डिल गर्ने सर्लाहीका नारायण घिमिरे थिए ।

घिमिरेले प्रहरीले भनेअनुसार रेड लेबलको आवश्यकता पूरा गर्दै गए । उता प्रहरीले घिमिरेलाई पछ्याइरहेको थियो । घिमिरेले उक्त मदिरा सितापाइलास्थित रविन पाख्रिनको घरमा रहेको गोदामबाट ल्याएर बिक्री गर्ने गरेको पत्ता लगाएपछि प्रहरीले गोदामै छापा हानेर उक्त मदिरा बरामद गरेको एसएसपी कुँवरले बताए ।

पाख्रिन नियन्त्रणमा लिएपछि उक्त मदिरा सन्तोषचन्द्र बख्रेलको रहेको पत्ता लागेको हो । बख्रेलले शैलेश पन्तमार्फत उनैले सञ्चालन गरेको इन्फिनिटी लिकरमार्फत बजारमा राजस्व छलीको मदिरा बेच्ने गरेको बयान प्रहरीलाई दिएका छन् ।

प्रहरीले उक्त मदिरा नक्कलीसमेत हुन सक्ने अनुमान गरेको छ । त्यसका लागि नापतौल गुणस्तर विभागमा पठाइको प्रहरीले जनाएको छ ।

प्रहरीको अनुसन्धानबाट सन्तोषले विगत ३ महिनादेखि भारतबाट राजस्व छली गरेर मदिरा भित्र्याएर बिक्रीवितरण गरिरहेकाे खुलेको छ ।

प्रकाशित मिति: आइतबार, माघ १६, २०७८ १७:५९