प्रदेश १ मा नामकरणका लागि सरकारको कसरत, सर्वदलीय बैठकमा कसले के भने ?

A+ A A-

प्रदेश १ मा नामाकरणका लागि सरकारले औपचारीक रुपमा छलफल अघि बढाएको छ । मंगलबार सर्वदलीय बैठक बोलाएर नामाकरणका लागि प्रदेश सरकारले औपचारिक छलफल अघि बढाएको हो ।

मंगलबार नामकरणका लागि समन्वय तथा सहजीकरण गर्न प्रदेश १ सरकारले बनाएको समितिका तर्फबाट सर्वदलीय बैठक बोलाइएको थियो ।

बैठकमा नामाकरणका लागि सहमति जुटाउने प्रयास गरिएको छ । बैठकमा मुख्यमन्त्री राईले चेतना र सङ्ख्याको हिसावले प्रदेश १ अगाडि रहे पनि नाम अहिलेसम्म टुङ्याउन नसक्नु लाजमार्दो विषय भएको बताए ।

मुख्यमन्त्री राईले सरकारको कार्यकाल अत्यन्त छोटो रहेको र प्रदेशसभाको दुई वटा अधिवेशनमात्र बाँकी रहेकोले नामलाई चाँडै सहमति कायम गरीे टुङ्याउनु पर्नेमा जोड दिए । उनले दलहरूले नामाकरणका लागि दायित्व ठान्दै लचिलो हुनुपर्ने बताए ।

बैठकमा नेकपा (एमाले) प्रदेश कमिटी अध्यक्ष तुलसी न्यौपानेले विगतको सरकारले प्रदेशसभामा साझा र सर्वसहमतिका लागि नामकरण गर्न लामो समय रोकिएको बताउँदै वर्तमान सरकारले साझा प्रस्ताव ल्याए सहयोग गर्न तयार रहेको बताए ।

बैठकमामा नेपाली कांग्रेस संसदीय दलका नेता राजीव कोइरालाले नामाकरण पेचिलो र जटिल भए पनि साझा सहमतिका आधारमा संघीयता र युग सुहाउँदो हुनुपर्ने बताए ।

नेकपा एकीकृत (समाजवादी) का केन्द्रीय उपाध्यक्ष घनेन्द्र बस्नेतले नामका सम्वन्धमा विविधताभित्र एकताको खोजी गर्नुपर्नेमा जोड दिए । उनले सवैको भावनालाई समेटिनुपर्ने समेत बताए ।

नेपाली कांग्रेसका प्रदेश सभापति उद्धव थापाले प्रदेशमा बसोवास गर्ने नागरिकले अपनत्व स्वीकार गर्ने नामकरण गर्नुपर्नेमा जोड दिए ।

नेकपा (माओवादी) केन्द्रका प्रदेश अध्यक्ष हर्क नेम्वाङले पहिचानका आधारमा नामाकरण हुनुपर्ने बताए ।

जनता समाजवादी पार्टी (जसपा) प्रदेश उपाध्यक्ष राजकुमार यादवले पार्टीको तर्फबाट पहिचानको आधारमा प्रदेशमा नाम किराँत–लिम्बुवान, मधेश– शेपालुङ हुनुपर्ने धारणा राखे ।

संघीय लोकतानित्रक राष्ट्रिय मञ्चका केन्द्रीय अध्यक्ष कुमार लिङदेनले संघीयताको आधार पहिचान हुनुपर्छ भन्दै सहमतिको आधारमा नामकरण गर्न आग्रह गरे ।

स्वास्थ्य मन्त्री जयराम यादवले सरकारले आफ्नो संयोजकत्वमा सर्वदलीय छलफलको आयोजना गरी प्रदेशको नामकरण टुङ्ग्याउन जिम्मेबारी दिएअनुसार छलफल सुरु भएको बताए ।

उनले आगामी दिन दलहरूबीच अझ विस्तृत गहन रुपमा सहमति कायम गरी नाममा सहमति हुने विश्वास व्यक्त गरे । आजको बैठकमा प्रदेशका मन्त्री, राज्यमन्त्री, प्रदेशसभामा प्रतिनिधित्व गर्ने पार्टीका संसदीय दलका नेताहरू, राष्ट्रियसभाका सदस्य, विभिन्न राजनीतिक दलका प्रतिनिधिहरूको उपस्थिति रहेको थियो ।

प्रकाशित मिति: मंगलबार, फागुन १०, २०७८ २०:२४