नेकपा एसकाे निर्णयले प्रचण्ड अप्ठ्याराेमा, एमसीसीबारे निर्णायक छलफल हुँदै

नेकपा एसकाे निर्णयले प्रचण्ड अप्ठ्याराेमा, एमसीसीबारे निर्णायक छलफल हुँदै

A+ A A-

अमेरिकी सहायता परियोजना एमसीसीमा सहमति जुटाउन सत्ताधारी गठबन्धनको 'निर्णायक बैठक' आज बस्दैछ । दिउँसो १ बजे बस्ने प्रतिनिधिसभाको बैठकअघि बिहान १० बजे गठबन्धनका शीर्ष नेताहरूको बैठक प्रधानमन्त्रीको सरकारी निवास बालुवाटारमा बस्न लागेको हो ।

यसअघि एमसीसीबारे शुक्रबारकै बैठकमा निर्णय लिइने तयारी भए पनि सत्ता घटक नेकपा एकीकृत समाजवादीको आग्रहमा दुई दिन पर धकेलिएको हो । एकीकृत समाजवादीको हिजो बसेको बैठकले नेपाली का‌ंग्रेसलाई साथ दिँदै एमसीसी सदनमा टेबल हुन दिने निर्णय गरेको छ । तर अनुमोदनका लागि भने यथास्थितिमा पक्षमा मतदान नगर्ने निर्णय पार्टीले गरेको छ ।

नेकपा एसकाे निर्णयले एमसीसीकाे विराेधमा सँगै सडक तताएकाे माओवादी केन्द्रलाई भने अप्ठ्याराेमा पारेकाे छ । माओवादी केन्द्रको संसदीय दलको बैठकले एमसीसी सदनमा टेबल भए सरकारबाट बाहिरिने निर्णय गरेको थियाे । सरकारबाट बाहिरिनुपरे एमसीसी विराेधी सबै दल बाहिरिने रणनीति माओवादी अध्यक्ष प्रचण्डले बनाएका थिए । तर एमसीसी टेबल गर्न दिने नेकपा एसकाे निर्णयपछि प्रचण्ड अप्ठ्याराेमा परेका हुन् ।

हुन त प्रचण्डले पनि एमसीसी टेबल गर्न दिनेमा सहमति प्रकट गरेकाे सूचना बालुवाटारबाट प्रवाह भएकाे छ । यसबारे माओवादी नेताहरूले भने मुख खाेलेका छैनन् । आजको गठबन्धन बैठकमा एमसीसी सदनमा टेबल गर्नका लागि सहमति जुटाउन अन्तिम प्रयास प्रधानमन्त्री शेरबहादुर देउवाले गर्नेछन् ।

'एमसीसी आज सदनमा टेबल हुन्छ । यसअघि नै भइसक्नुपर्ने हाे, ढिलाे भइसक्याे । टेबल गर्न दिन्नँ, टेबल गर्न पाइन्नँ भन्न कसैले मिल्दैन', कांग्रेस प्रवक्ता प्रकाशशरण महतले भने । महतले आज सदनमा एमसीसी टेलब हुने बताए पनि संसदको सम्भावित कार्यसूचीमा भने याे विषय परेकाे छैन । संसद बैठकअघि बस्ने कार्यव्यवस्था परामर्श समितिको बैठकले अन्तिम कार्यसूची तय गर्नेछ ।