सत्ता खेलले सांसद खोसिएका कृष्ण थापा गाउँमा सुन्तला र तरकारी फलाउँदैछन्

A+ A A-

पार्टीको निर्णय अवज्ञा गर्दा सांसद पद गुमाएका बागलुङका कृष्ण थापा आजकल गाउँतिरै व्यस्त छन् । गण्डकी प्रदेशमा कांग्रेस नेतृत्त्वमा गठबन्धन सरकार बनाउन पहल भइरहँदा राष्ट्रिय जनमोर्चाले पनि साथ दिने निर्णय गरेको थियो । बागलुङ १ (ख) बाट प्रत्यक्ष चुनाव जितेका जनमोर्चाका कृष्णले पार्टीको निर्णय मानेनन् । त्यही कारण जनमोर्चाले कारबाही गरेपछि गत जेठमा उनको सांसद पद गुमेको थियो ।

आठ महिनाअघि गठबन्धनविरुद्ध उत्रिएका ६० वर्षीय थापा आजकल गाउँमै सुन्तलाका बोट र तरकारी स्याहार्दै छन् । बागलुङको जैमिनी नगरपालिका, ४ सर्कुवामा खरबारीसहित थापा परिवारको करिब २८ रोपनी जग्गा छ । त्योमध्ये १३ रोपनीमा फलफूल, तरकारी र अन्नबाली लगाउँछन् । १३ रोपनीमध्ये पनि आधाभन्दा बढी जमिनमा पूर्वसांसद थापाले सुन्तला लगाएका छन् ।

ह्वीप उल्लंघन गरेपछि जनमोर्चाका सांसद कृष्ण थापा फेरि पदमुक्त

करिब आठ रोपनीमा सुन्तलाका २ सय २० बोट र एक रोपनीमा तरकारी लगाएको सांसद थापाले बताए । पूर्वसांसद थापा हाँस्दै दैनिकी सुनाउँछन्, ‘खेतीपातीमै भुलेको छु । पोखरातिर हुने भएर सुन्तलाका बोटले दुःख पाएका थिए । यिनले अहिले राम्रो स्याहार पाएका छन् ।’ फल दिने २० वटा बोटबाट वार्षिक ८० हजार रुपैयाँ आम्दानी हुँदै आएको उनले जानकारी दिए । बाँकी २ सय बोटमा एक वर्षभित्र सुन्तला फल्ने आशामा पूर्वसांसद थापा छन् ।

सांसद हुनु पहिल्यैदेखि गाउँमा उनले २० बोट सुन्तला लगाएका थिए । ३ वर्षअघि फेरि एक सय बोट लगाए । २ वर्षअघि थप १ सय बोट सुन्तला लगाएका उनी २ सय सुन्तला बोटको हेरचाह गरिरहेका छन् । एक महिनाअघि बोटमा मलजलसँगै कीटनाशक विषादी छरेका छन् । सुन्तलाबाहेक उनले काउली, ब्रोकाउली, आलु, कागती लगाएका छन् । ‘तरकारी घरमा प्रशस्तै बनाएको छु । काउली, बन्दा, केराउ, आलु, साग, ब्रोकाउली सबै छ । खानाका लागि धेरै भयो । अलिअलि लैजान्छन् । व्यावसायिक खेती गरेको छैन । छिमेकीहरूले लैजानुहुन्छ,’ थापाले पदमुक्त भएयता आफूले गरेको पौरख सुनाए ।

सुन्तलाबाहेक उनले १० बोट अष्ट्रेलियन कटुस र ९ बोट किबी लगाएका छन् । उनलाई पोहोर नै किबी लगाउने रहर थियो । तर, संसद चलेको र गठबन्धनविरुद्ध लागेकाले पोखरामै व्यस्त भएपछि पोहोर लगाउन पाएनन् । ‘दोलखाबाट ९ वटा बोट किबी ल्याएर पुसमा लगाएँ । पोहोर नै लगाउँछु भन्ने योजना थियो । काठमाडौं जाँदा छोरीले बेर्ना बनाइदिइन्,’ पूर्वसांसद थापाले सुनाए, ‘पोहोर गठबन्धन लाग्यो र भ्याइनँ । गठबन्धनविरुद्ध लाग्दा मुद्दामामिलामा परियो । अहिले फुर्सदमा भएपछि लगाएँ ।’

पदमुक्त नभएको भए उनी यतिबेला प्रदेशसभाको हिउँदे अधिवेशनका लागि पोखरामै हुन्थे । साथमा संसदीय समिति सभापतिको हैसियतमा पाएको गाडी हुन्थ्यो । उनी प्रदेश मामिला समितिका सभापति थिए । तर, पदमुक्त भएकै भोलिपल्ट गाडी बुझाएर उनी गाउँ फर्किए । त्यसयता गाउँकै माटोमा पूरै समय बिताइरहेका छन् ।

गाउँमा बसिरहँदा कहिलेकाहीँ सांसद पद गुमेकोमा पछुतो लाग्दैन ? यो प्रश्नमा उनले आठ महिनाअघि दिएकै जवाफ फर्काए, ‘पदमुक्त भएकोमा पछुतो छैन । इमान बाचुन्जेल रहन्छ । पद त केही समयका लागि हुन्छ । मेरो कार्यकाल १५ महिना पहिला सकियो । आजसम्म कुनै चिन्ता, आश्चर्य केही छैन ।’

चट्टानी अडान राखेका कृष्ण, जसकी श्रीमती र दूधे बच्चालाई पञ्चायतकालमा घरबाटै गिरफ्तार गरिएको थियो

तत्कालीन मुख्यमन्त्री पृथ्वीसुब्बा गुरुङलाई हटाउन हुँदैन भनेर उनी कांग्रेस नेतृत्त्वको गठबन्धनविरुद्ध दह्रो रूपमा उभिएका थिए । बागलुङमा कांग्रेस र जनमोर्चाबीच तिक्ततापूर्ण सम्बन्ध रहेको र गृहजिल्लाबाट कांग्रेसलाई समर्थन नगर्न दबाब आएकाले आफू गठबन्धनको पक्षमा नरहेको उनी बताउँथे । गठबन्धनलाई समर्थन नगरेकै कारण थापालाई साधारण सदस्यसमेत नरहने गरी १ वर्षका लागि गत ८ जेठमा पार्टीले निलम्बन र केन्द्रीय सदस्यबाट पनि निष्कासन गरेको थियो ।

कांग्रेस नेतृत्वको गठबन्धनविरुद्ध लाग्दा उनी पहिलोपटक २० जेठमा पदमुक्त भएका थिए । पार्टीको निर्णयविरुद्ध सर्वोच्च अदालत पुगेका थापाको पद २३ जेठमा सर्वोच्चले थमौती गरिदिएको थियो । २७ जेठमा तत्कालीन मुख्यमन्त्री पृथ्वीसुब्बा गुरूङले विश्वासको मत माग्दा उनी तटस्थ बसे । पार्टीले दोस्रोपटक कारबाही गरेपछि २८ जेठमा फेरि पदमुक्त भए । पार्टीको निर्णय विपरीत तटस्थ बसेको भन्दै सर्वोच्च अदालतले ३१ जेठमा अन्तरिम आदेश खारेज गरेको थियो ।

कांग्रेस नेतृत्त्वमा प्रदेश सरकार बनाउन नहुने अडानमा अडिग रहँदा पद गुमाए पनि २९ जेठमा बहुमतको आधारमा गठबन्धन सरकार बन्यो । काठमाडौं र पोखरामा रहेका सिंहदरबारले गरिरहेको काम उनी गाउँको घरमा बसेर नियालिरहेका छन् । ‘गठबन्धन बनेपछि प्रदेशमा एकको दुई मन्त्री भए । यसले गर्दा देशको व्ययभार बढ्यो, पेट्रोलियम पदार्थको मूल्य बढ्यो । गठबन्धन सरकारले कुनै नौलो काम गरेको देखिएन । यो काम गर्न बनेको सरकार नै होइन,’ गठबन्धनमाथि उनी रोष पोख्छन् ।

आफू पदमुक्त भएपछि निर्वाचित भएको क्षेत्रका ९० प्रतिशत योजना नै काटिएको पूर्वसांसद थापाको गुनासो छ । टेण्डर भइसकेका र काट्न नमिल्ने दुईवटा सडक र दुईवटा नमुना कृषि गाउँ कार्यक्रमका योजनाबाहेक सबै पोखरेल नेतृत्त्वको सरकारले काटेको उनी सुनाउँछन् ।

कृषि नै गर्ने कि राजनीति ?

थापाका बारीमा सुन्तला पहिल्यै थिए । फुर्सद हुँदा बोटको संख्या बढाएका छन् । उनको आम्दानीको स्रोत केही छैन । श्रीमती शान्तिसँगै गाउँमा आफूलाई पुग्ने उब्जाउ गरेका छन् । कमाउनकै लागि कान्छा छोरालाई एक महिनाअघि साउदी अरब पठाएका छन् । पहिल्यैदेखि खेतीपाती गर्ने भए पनि २०७४ सालको निर्वाचनमा जितेपछि थापा जनता र पार्टीका काममा व्यस्त रहे ।

गठबन्धनलाई साथ नदिएपछि उनलाई पार्टीले गरेको कारबाही फुकुवा भएको छैन । पूर्वसांसद थापालाई अन्य पार्टीले बोलाए पनि उनी कतै गएका छैनन् । आगामी निर्वाचनमा आफ्ना योजना के छन् भन्ने उनले खुलाएनन् । तर, चुनाव लड्ने संकेत भने गरेका छन् । आउँदो ३० वैशाखमा हुने स्थानीय तहको चुनाव भने नलड्ने खुलाए ।

राष्ट्रिय जनमोर्चामा हालसालै टुटफुट देखिएको छ । कांग्रेसलाई साथ दिएको भन्दै थापा अध्यक्ष चित्रबहादुर केसी र महामन्त्री मोहनविक्रम सिंहसँग असन्तुष्ट छन् । त्यसैले उनी जनमोर्चाबाटै भन्दा पनि कुनै पार्टीको समर्थनमा स्वतन्त्र उठेर चुनाव लड्न सक्ने सम्भावना छ ।

थापाले २०७४ सालको निर्वाचनमा एमालेको समर्थनमै चुनाव जितेका थिए । गण्डकीका तत्कालीन मुख्यमन्त्री पृथ्वीसुब्बा गुरुङलाई साथ दिएकाले एमालेले फेरि समर्थन गर्न सक्ने सम्भावना छ । चुनाव लड्नेतर्फ संकेत गर्दै उनले भने, ‘म स्वतन्त्र उम्मेदवार हुँदिनँ । पार्टीगत अवसर मिल्यो भने नहुने भन्ने हुँदैन ।’

प्रकाशित मिति: आइतबार, फागुन ८, २०७८ ०९:३३