गठबन्धन जोगाउनुपर्ने भन्दै एमसीसीमा नेकपा एसको मध्यमार्गी विकल्प : संसदमा टेबुल गर्न दिने, पक्षमा मत नदिने

गठबन्धन जोगाउनुपर्ने भन्दै एमसीसीमा नेकपा एसको मध्यमार्गी विकल्प : संसदमा टेबुल गर्न दिने, पक्षमा मत नदिने

A+ A A-

अमेरिकी सहायता परियोजन एसमीसी संसदमा पेस गर्ने विषयमा नेकपा एकीकृत समाजवादीले सहमति जनाउने भएको छ । सरकारको नेतृत्त्वकर्ता कांग्रेसले गठबन्धनमा रहेका दलले एमसीसी सदनमा पेसका लागि सहमति जनाउनुपर्ने भन्दै दबाब बढाएपछि एकीकृत समाजवादीले मध्यमार्गी विकल्प निकालेको छ ।

शनिबार मीनभवनमा बसेको स्थायी कमिटी बैठकले एमसीसी सदनमा पेस गर्न दिने तर मतदानमा विपक्षमा उभिने निर्णय गरेको पार्टीका प्रवक्ता जगन्नाथ खतिवडाले बताए । एमसीसीको सवालमा सडकमा भइरहेको बहसलाई अब संसदमा प्रवेश गराउनुपर्ने नेकपा एकसको बैठकको निष्कर्ष छ ।

सार्वभौम संसदमा बहस चलाएर मुलुकको हितमा निर्णय सुनिश्चत गर्नका निम्ति संसदमा लानुपर्ने निष्कर्ष बैठकको रहेको खतिवडाले बताएका छन् । 'एमसीसीमा सडकमा भइरहेको बहसलाई बन्द गर्दै सदनमा प्रवेश गराउनुपर्ने जोडमा प्रधानमन्त्री हुनुहुन्छ । हामीले पनि संसदमा लैजानका निम्ति सहमति दिने निर्णय गरेका छौँ,' खतिवडाले भने ।

प्रधानमन्त्री शेरबहादुर देउवाले बिहीबार बसेको गठबन्धन बैठकमा एमसीसीको सवालमा गठबन्‍धनका दलको धेरै कुरा सुनेको भन्दै अब संसदमा लान सहयोगको आग्रह गरेका थिए । संसदमा पेस हुन दिएर पक्ष वा विपक्षमा मतदान गर्ने विकल्प देउवाले दिएका थिए । यो विकल्पमा पनि सहमत नहुने अवस्थामा सरकारमा बस्ने वा बाहिरिने निर्णयका लागि स्वतन्त्र रहेको कुरा देउवाको थियो ।

एमसीसीकै कारण गठबन्धन टुट्न दिन नहुने निष्कर्षमा एकीकृत समाजवादी पुगेको पार्टीका प्रमुख सचेतक जीवनराम श्रेष्ठ बताउँछन् । 'वर्तमान गठबन्धनको कार्यभार सकिएको छैन। राजनीतिक सहकार्य अझै आवश्यक भइरहेको अवस्थामा एमसीसीकै कारण गठबन्धन टुटाउनु हुँदैन भन्ने निष्कर्षमा हामी पुगेका छौँ,' श्रेष्ठले भने ।

आइतबार बस्ने सत्ता गठबन्धनको बैठकमा एकीकृत समाजवादीले प्रधानमन्त्री शेरबहादुर देउवालाई एमसीसी पेसका लागि सहमति दिने भएको छ । एमसीसी संसदमा पेसका लागि सदनमा अवरोध हुन नहुने पार्टीको मत रहेको नेता गंगालाल तुलाधारले बताए । 'यथास्थितिमा एमसीसीको पक्षमा मतदान नगर्ने जानकारी हामी प्रधानमन्त्रीलाई गराउँछौँ । उहाँले सदनमा प्रस्ताव लान जोड गरिरहनुभएको अवस्थामा हामीले सहमति जनाउने कुरा भएको छ। तर, विरोधकाबीच प्रस्ताव लाँदा पर्ने असरको जानकारी पनि प्रधानमन्त्रीलाई भन्नेछौँ,' नेता तुलाधरले भने ।

बैठकमा एमसीसी सदनमा लानका निम्ति आवश्यक कानुन निर्माण गर्न प्रधानमन्त्री देउवालाई आग्रह गरिने नेता झलनाथ खनालले बताए ।' अनुदानको संसदीय अनुमोदन गर्ने परम्परा छैन । त्यसका निम्ति संविधानको धारा २ सय ७९ बमोजिम कानुन पनि निर्माण हुनुपर्छ यो जानकारी पनि हामी गराउनेछौँ । संशोधनविना एमसीसीमा मतदान नगर्ने पक्षमा हाम्रो पार्टी अडिग छ । स्थायी कमिटी बैठकले पनि यही निर्णय गरेको छ,' खनालले भने ।

स्थायी कमिटीमा नेपालको ब्रिफिङ : असंलग्न परराष्ट्र नीतिमा अडिग नरहँदा भूराजनीतिक भूमरी

स्थायी कमिटीको बैठकमा अध्यक्ष माधवकुमार नेपालले नेपाल असंलग्न परराष्ट्र नीतिबाट पछि हट्दा भूराजनीतिक भूमरीमा फस्न खोजेको बताएका थिए ।

शुक्रबार अमेरिका र चीनको वक्तव्यबाजीलाई इंगित गर्दै नेता नेपालले कसैको पक्षधरतामा मुलुक उभिन नहुने धारणा राखेका छन् । 'असंलग्न परराष्ट्र नीतिबाट पछि हट्दा मुलुक भूराजनीतिक भूमरीमा पर्ने खतरा बढ्को छ । हामी कसैको पक्षधरतामा उभिन हुँदैन । कुटनीतिमा हाम्रो भूमिका प्रस्ट हुनैपर्छ । अन्यथा भूराजनीतिक संकटकको जोखिमा मुलुक पर्ने खतरा बढ्दै गएको अवस्था देखिरहेका छौँ,' नेपालले बैठकमा भनेका छन् ।

शुक्रबार अमेरिकाले एमसीसीलाई लिएर हुने हिंसात्मक विचार वा उत्तेजना आफूहरूलाई अस्वीकार्य हुने बताएको थियो । त्यही दिन चीनको विदेश मन्त्रालयको नियमित पत्रकार सम्मेलनमा विदेश मन्त्रालयका प्रवक्ता वान बेनविनले अमेरिकाले नेपालमा बलपूर्वक कुटनीति लादेको भन्दै त्यसको विरोध गर्ने बताएका थिए ।

यसैप्रति इंगित गर्दै नेता नेपालले असंलग्न परराष्ट्र नीतिमा मुलुक अडिग रहनुपर्ने बताएका हुन् । नेता नेपालले गठबन्धनको भविष्यसँग एमसीसी जोडिएकाले प्रधानमन्त्रीको इच्छाअनुसार सदनमा लान दिने तर, विपक्षमा मतदान गर्ने बताएका छन् । 'यो गठबन्धनको आवश्यकता दीर्घकालीन छ । प्रधानमन्त्री पनि एमसीसी सदनमा पेस गर्न दिँदा गठबन्धन जोगाउन प्रतिवद्ध हुनुहुन्छ । उहाँले नै विपक्षमा मतदान गर्ने विकल्प पनि दिनुभएको हो। यसकारण सदनमा पेसका निम्ति हामीले सहमति दिऔँ,' बैठकमा नेपालको भनाइ थियो ।

एमसीसी सदनमा अघि बढाउनका निम्ति प्रधानमन्त्री देउवाले एकीकृत समाजवादीकै निर्णय कुरेका थिए । समाजवादीले एमसीसी सदनमा पेस गर्न अनुमति दिएसँगै प्रधानमन्त्रीले प्रस्ताव अघि बढाउने संभावना बढेको छ । आइतबार संसदको बैठक डाकिएको छ । त्यसअघि गठबन्धनका शीर्ष नेताबीच बालुवाटारमा छलफलसमेत हुँदैछ ।

प्रकाशित मिति: शनिबार, फागुन ७, २०७८ १६:४९