प्रदेश १ को नामकरण गर्ने कसरतमा सत्ता गठबन्धन, १० फागुनको सर्वदलीय बैठकमा सहमति जुट्ला ?

प्रदेश १ को नामकरण गर्ने कसरतमा सत्ता गठबन्धन, १० फागुनको सर्वदलीय बैठकमा सहमति जुट्ला ?

A+ A A-

प्रदेश १ को नामकरणका लागि कसरत सुरु भएको छ । नामाकरणको विषयमा छलफलका लागि १० फागुनमा सर्वदलीय बैठक बोलाइएको छ ।

नामकरणका लागि समन्वय तथा सहजीकरण गर्न यसअघि प्रदेश सरकारले समिति बनाएको थियो । उक्त समितिका तर्फबाट सर्वदलीय बैठक आह्वान गरिएको हो ।

प्रदेश सरकारको १६ माघमा बसेको मन्त्रिपरिषद् बैठकले तत्कालीन सामाजिक विकासमन्त्री जयराम यादवलाई प्रदेश को नामकरणका लागि समन्वय तथा सहजीकरण गर्ने जिम्मेवारी दिएको थियो ।

मुख्यमन्त्री राजेन्द्रकुमार राईको उपस्थितिमा मुख्यमन्त्री कार्यालयमा बसेको उक्त समितिको बैठकले प्रदेशको नाम टुंगो लगाउने प्रक्रिया अघि बढाउन लागेको हो ।

बैठकमा नेपाली कांग्रेसका तर्फबाट संसदीय दलका उपनेता एवम् सडक, पूर्वाधार तथा शहरी विकासमन्त्री हिमाल कार्की, नेकपा माओवादी केन्द्रका संसदीय दलका नेता तथा आर्थिक मामिला तथा योजनामन्त्री इन्द्र आङ्बो र संघीय लोकतान्त्रिक राष्ट्रिय मञ्चकी संसदीय दलकी नेतृ तथा सामाजिक विकास राज्यमन्त्री विष्णु तुम्बाहाम्फे सहभागी थिए ।

बैठकले सत्तारुढ पाँच दलीय गठबन्धनका तर्फबाट सर्वसम्मतिले प्रदेशको नाम प्रस्ताव गर्ने प्रारम्भिक सहमति गरेको स्वास्थ्यमन्त्री तथा प्रदेशको नामकरणका लागि गठित समन्वय तथा सहजीकरण समिति प्रमुख जयराम यादवले जानकारी दिए ।

प्रदेशको नामकरण सम्बन्धमा १० फागुनमा प्रमुख प्रतिपक्षी दल नेकपा एमालेसहितको सर्वदलीय बैठक डाकिएको यादवले बताए । बैठकमा प्रदेशसभामा प्रतिनिधित्व गर्ने सबै राजनीतिक दलका संसदीय दलका नेता, सबै पार्टीका प्रदेश कमिटी अध्यक्ष/सभापति, सरकारका सबै मन्त्रीहरू सहभागी हुने उनले बताए ।

प्रदेशको नामकरणका लागि प्रदेशसभामा दुई तिहाई बहुमत आवश्यक पर्दछ । सत्ता गठबन्धनसँग उक्त संख्या पुग्दैन । एमालेको सहयोगबिना प्रदेशको नामाकरण हुने सम्भावना छैन ।