बालुवाटार बैठकमा प्रधानमन्त्री : तपाईंहरूका कुरा धेरै सुनेँ, सरकार छोड्‍न वा बस्न स्वतन्त्र हुनुहुन्छ

बालुवाटार बैठकमा प्रधानमन्त्री : तपाईंहरूका कुरा धेरै सुनेँ, सरकार छोड्‍न वा बस्न स्वतन्त्र हुनुहुन्छ

A+ A A-

प्रधानमन्त्री शेरबहादुर देउवाले सत्ता गठबन्धनमा रहेका माओवादी केन्द्र र एकीकृत समाजवादीलाई सरकार छोड्न वा सँगै रहन स्वतन्त्र भएको बताएका छन् । बालुवाटारमा बिहीबार साँझ बसेको गठबन्धनको बैठकमा देउवाले एमसीसी अब सदनको विषय बनाउनुपर्ने भन्दै यी दुई विकल्प दिएका हुन् ।

बैठकमा प्रधानमन्त्री देउवाले एमसीसीको निर्क्यौल अब सदनले गर्नुपर्ने अडान राख्दै यसलाई सडकमा धेरै गिजोल्न नहुने धारणा राखेका छन् । उनले सत्ता गठबन्धनमा आबद्ध दललाई एमसीसी सदनमा पेस गर्न सहयोग गरेर विपक्षमा मतदान गर्ने विकल्प दिएका छन् ।

यस्तै देउवाले सरकारबाट बाहिरिन पनि स्वतन्त्र रहेको बताएका छन् । 'तपाईंहरूको धेरै कुरा सुनेँ अब सदनमा लान सहयोग गर्नुस् । विपक्षमा मतदान गर्नसक्नुहुन्छ नभए सरकार छोड्न पनि स्वतन्त्र हुनुहुन्छ,' प्रधानमन्त्रीको भनाइ उद्धृत गर्दै कांग्रेस महामन्त्री गगन थापाले भने ।

प्रधानमन्त्री देउवाले सडकमा एमसीसी धेरै गिजोलिएको भन्दै अब संसदले छिनोफानो गर्नुपर्ने बताएका थिए । 'प्रधानमन्त्री संसदमा एमसीसी टेबल गर्नुपर्ने पक्षमा दृढ हुनुहुन्छ । सरकार अविछिन्न अंग रहेकाले यसलाई अघि बढाउनैपर्ने उहाँको मत छ,' बैठकमा सहभागी सरकारका प्रवक्ता ज्ञानेन्द्रबहादुर कार्कीले बताए ।

एमसीसी मुख्यालयले १६ फागुनसम्मको म्याद दिएकाले त्यस अवधिभित्रै यसको छिनोफानो गर्नुपर्ने पक्षमा प्रधानमन्त्री रहेको कार्कीको भनाइ छ । गठबन्धन बैठकमा एमसीसी संसदमा पेस गर्नका निम्ति सदनको अवरोध अन्त्य हुनुपर्ने मत माओवादी केन्द्र र एकीकृत समाजवादीले राखेपछि प्रधानमन्त्री देउवा एमाले अध्यक्ष ओलीसँग संवाद गर्नका निम्ति बालकोट पनि पुगेका छन् । गठबन्धन बैठकमै जानकारी गराएर देउवा बालकोट पुगेका हुन् ।

एमसीसीमा एकीकृत समाजवादी लचक, टेबल नगर्ने अडानमै माओवादी केन्द्र

बालुवाटारको बैठकमा एमसीसीको सवालमा एकीकृत समाजवादीका अध्यक्ष माधव नेपालले केही लचकता प्रस्तुत गरे पनि माओवादी केन्द्रका अध्यक्ष पुष्पकमल दाहाल प्रचण्डले भने एमसीसी टेबल गर्ननहुने अडान कायमै राखेका छन् । एकीकृत समाजवादीका अध्यक्ष नेपालले आफ्नो पार्टीको स्थायी कमिटीको बैठक रहेकाले सदनको प्रक्रिया केही दिन स्थगित गर्न प्रधानमन्त्री देउवालाई आग्रह गरेका थिए ।

'७ गते हाम्रो पार्टीको स्थायी कमिटी बैठक बस्दैछ । त्यसमा विस्तृत छलफल गरेर हामी उचित निर्णयमा पुग्नेछौँ । भोलिको बैठकमा यसलाई अघि नबढाउनु भनेर प्रधानमन्त्री समक्ष कुरा राखेँ,' बैठकपछि नेपालले शिलापत्रसँग भने ।

यता माओवादी केन्द्रका अध्यक्ष प्रचण्डले भने एमसीसी तत्काल सदनमा पेस गर्न नहुने अडान प्रधानमन्त्रीलाई सुनाएका छन् । 'हाम्रो अडान यथावत नै छ । अहिलेलाई अघि नबढाऔँ । एमसीसीविरुद्ध सडकमा धेरै उत्रिसकेका छन् । यो परिस्थितिलाई पनि ख्याल गरौँ,' बैठकमा प्रचण्डको भनाइ थियो ।

बैठकमा सहभागी जनता समाजवादी पार्टीका नेता बाबुराम भट्टराईले भने एमसीसी अघि बढाउनुपर्ने मत राखेका छन् । 'यो परियोजनालाई धेरै विवादित बनाउँदा मुलुकलाई कूटनीतिक रूपमा अप्ठ्यारो पर्छ । विभिन्न चरणमा यसलाई अघि बढाउने प्रतिबद्धता सबै दलले गरेकै हो । अब राजनीतिक आवरण दिने काम बन्द गरौँ,' भट्टराईको भनाइ थियो ।

एमसीसीको विषयमा दलहरूको अडान यथावतै रहेपछि शीर्ष नेताबीचको बैठक शुक्रबार पनि बस्ने भएको छ । शुक्रबार संसदको बैठक पनि बोलाइएको छ ।

यसअघि बुधबारको बैठकमा एमसीसी पेस गर्ने तयारी भएको थियो । बुधबार माओवादी केन्द्रका अध्यक्ष प्रचण्डले प्रधानमन्त्री देउवालाई भेट गरी शीर्ष नेताको संवाद राख्न आग्रह गरेपछि संसद बैठकमा एमसीसी अघि बढेको थिएन ।

प्रकाशित मिति: बिहीबार, फागुन ५, २०७८ २२:३१