माधव नेपाललाई प्रश्न : बालुवाटार छलफलमा सत्ता गठबन्धन जोगिने आधार तय भयो ?

A+ A A-

अमेरिकी सहायता परियोजना एमसीसीका कारण गठबन्धनमा ध्रुवीकरण बढ्दैछ । कांग्रेसले जबरजस्ती गरे सरकार छोड्ने चेतावनी माओवादी केन्द्रले दिएको अवस्था छ । बिहीबार दिउँसो मा‌ओवादी केन्द्रको संसदीय दलको कार्यालयमा एकीकृत समाजवादीका अध्यक्ष माधवकुमार नेपालले माओवादी अध्यक्ष पुष्पकमल दाहाल प्रचण्डसँग छलफल गरेका थिए । छलफलमा उनीहरूबीच साँझको गठबन्धन बैठकमा समान धाराणा राख्ने सहमति भएको थियो । त्यहाँ पाँच दलीय गठबन्धन जोगाउनुपर्ने निष्कर्षमा उनीहरू पुगेका थिए । के बालुवाटारको बैठकमा गठबन्धन जोगिने आधार तय भयो त शिलापत्रका संवाददाता शिशिर ढकालले नेता नेपाललाई प्रश्न गरेका छन् ।

बालुवाटारमा शीर्ष नेताबीच छलफल भएको थियो, प्रधानमन्त्रीसँग के-के कुरा राख्नुभयो ?

प्रधानमन्त्रीजी जसरी पनि अमेरिकी सहायता परियोजना एमसीसी अघि बढाउने पक्षमा दृढ देखिनुभएको छ । हामीले यसलाई केही दिन पर्खन आग्रह गर्‍यौँ । उहाँले भोलिकै संसद बैठकमा टेबल गर्ने प्रस्ताव राख्नुभएको थियो । मैले हाम्रो पार्टीको ७ गते स्थायी कमिटी बैठक छ त्यसअघि नगरौँ भनेको छु । ८ गतेपछि यस सन्दर्भमा छलफल गरौँ भन्ने प्रस्ताव राखेको छु । प्रधानमन्त्री यसमा सकरात्मक हुनुहुन्छ ।

यसले गठबन्धनको भविष्‍यमा संकट निम्त्याउने स्थिति नै देखापरेको छ । बालुवाटारको बैठकले गठबन्धन जोगाउने आधार तय गर्‍यो त ?

माओवादी केन्द्रले मात्रै एमसीसीमा जबरजस्ती गरे सरकारबाट बाहिरिने चेतावनी दिएको हो । एमसीसीको विषयमा असहमति हुनसक्छन्, तर गठबन्धन जोगाउनुपर्छ भन्नेमा प्रचण्डजी पनि हुनुहुन्छ । यो गठबन्धन टुट्नेवाला छैन ।

एमसीसीको पक्षमा तपाईं अलि लचक हुनुभएको भन्ने कांग्रेसको बुझाइ छ नी ?

अमेरिकी सहायता परियोजनाको विषयमा हाम्रो पार्टीले पहिलेदेखि नै स्पष्ट धारणा राख्दै आएको छ । यो विषय संशोधनबिना अघि बढाउन संभव छैन । यसलाई पेस गर्न प्रमुख प्रतिपक्षीको अवरोध हट्नैपर्छ । राष्‍ट्रिय महत्वको विषय प्रस्तुत गर्दा सदनमा अवरोधको स्थिति आउनुहुँदैन । यो अवरोध हटाउन पहल गर्नुपर्छ र राष्ट्रिय सहमति कायम गरेर सदनमा टेबुल गर्नुपर्छ भन्ने हाम्रो मान्यता हो । यसका विषयमा थप छलफल गर्न हामीले पार्टीको स्थायी कमिटी बैठक पनि बोलाएका छौँ । त्यहाँ राष्ट्रिय राजनीतिको विषयमा छलफल गरेर थप धारणा ल्याउनेछौँ ।

यो गठबन्धन जोगाउनैपर्ने कारण के छ ?

संविधानलाई जोगाउन र मुलुकलाई दक्षिणपन्थी अवसरवादको षडयन्त्रबाट जोगाउनका निम्ति यो गठबन्धन जोगाउनैपर्छ । प्रमुख प्रतिपक्षी अझै सुध्रिएको अवस्था छैन । उसले अझै पनि के विध्वंश मच्चाउन सकिन्छ भनेर अवसर कुरिरहेको छ । यस्तो अवस्थामा उसलाई तह लगाउन र संविधानलाई सुदृढ बनाउन गठबन्धनको आवश्यकता झनै बढेको छ ।

माओवादी केन्द्र र एकीकृत समाजवादीलाई चुनावमा सम्मानजनक हैसियत प्राप्तिका लागि मात्रै गठबन्धन चाहिएको भन्ने तर्क पनि छ नि ?

यो सब गलत कुरा हो । चुनावी नाफा-घाटाको लागि मात्रै गठबन्धन बनेको होइन। देशभरि संगठन बनेको हाम्रो पार्टी चुनावको सामाना जसरी पनि गर्न तयार छ । राजनीतिक स्वार्थका लागि मात्रै होइन राष्ट्रिय हितका लागि पनि गठबन्धन आवश्यक छ । यो गठबन्धन जोगाउनैपर्छ ।